ކުޑައިރު ޖެހޭ ކެންސަރަށް އަހުލުވެރިކުރުމުގެ ގޮތުން، ކެންސާ ސޮސައިޓީ އޮފް މޯލްޑިވްސް (ސީއެސްއެމް) އާއި ގުޅިގެން ދިރާގުން ޚާއްސަ ޓޫލްކިޓެއް ނެރެފިއެވެ.
މި ޓޫލްކިޓް ރަސްމީކޮށް ނެރެދެއްވީ ކެންސާ ސޮސައިޓީ، ދިރާގު، ޔުނިސެފް މޯލްޑިވްސް އަދި އެޑިއުކޭޝަން މިނިސްޓްރީ ގުޅިގެން ބޭއްވި ޚާއްސަ ހަރަކާތެއްގައެވެ.
ދިރާގުން ބުނި ގޮތުގައި އެ ޓޫލްކިޓްގެ މަގްސަދަކީ ކެންސަރު ބަލީގެ ކުދިންނަށް ފަރުވާއަށް ފަހު ދިމާވާ ގޮންޖެހުންތަކާ މެދު ހޭލުންތެރިކަން އިތުރުކޮށް އެ ކުދިންނަށް ސަޕޯޓު ފޯރުކޮށްދިނުމެވެ. މި ޓޫލްކިޓް ޚާއްސަކޮށްފައި ވަނީ ސްކޫލްތަކާއި ބެލެނިވެރިންނަށެވެ.
ދިރާގުން ބުނި ގޮތުގައި އެ ކުންފުނިން ކެންސާ ސޮސައިޓީއަށް ތައުލީމީ ވަސީލަތްތައް ތައާރަފްކުރުމުގައި އެހީތެރިކަން ފޯރުކޮށްދޭނެއެވެ. އޭގެތެރޭގައި ކުޑައިރުގެ ކެންސަރުގެ އަލާމާތްތަކާ ގުޅޭ އެނިމޭޓެޑް ލަވައެއް ހިމެނޭ ވީޑިއޯ ސީރީޒަކާއި، ކެންސަރުން ސަލާމަތްވި މީހެއްގެ ވާހަކައާއި، ކެންސަރު އަވަހަށް ދެނެގަތުމަށް ސަމާލުކަންދޭ ކަންކަން ބަޔާންކުރާ ޑޮކްޓަރުންގެ ވީޑިއޯ ހިމެނެއެވެ.
މި ހަރަކާތުގައި ކެންސާ ސޮސައިޓީ އޮފް މޯލްޑިވްސްގެ ޗެއާޕާސަން ޖުވައިރިޔާ ސައީދާއި، ދިރާގުގެ ސީއީއޯ އަދި އެމްޑީ އިސްމާއިލް ރަޝީދާއި، ޔުނިސެފުން ރާއްޖެއަށް ކަނޑައަޅުއްވާފައި ހުންނަވާ ޑެޕިއުޓީ ރެޕްރެޒެންޓޭޓިވް އީސީ ފައިންގޯލްޑް އަދި މިނިސްޓާ އޮފް ސްޓޭޓް ފޯ އެޑިއުކޭޝަން ހުސައިން ސައީދު މުހައްމަދު ވަނީ ބައިވެރިވެވަޑައިގެންފައެވެ. މީގެ އިތުރުން ބެލެނިވެރިންނާއި އެޑިއުކޭޓަރުން ވެސް ވަނީ ބައިވެރިވެފައެވެ.
ސެޕްޓެމްބަރު މަހަކީ ބައިނަލްއަގުވާމީ ގޮތުން ފާހަގަކުރާ "ޗައިލްޑްހުޑް ކެންސާ" މަހެވެ.
ކެންސާ ސޮސަސައިޓީ އިން ބުނީ ރާއްޖެއަކީ އޭޝިއާ ސަރަހައްދުގައި ކުޑަކުދިންގެ ކެންސަރު އެންމެ ގިނަ އެއް ގައުމު ކަމަށެވެ. އެގޮތުން ރާއްޖޭގެ 18 އަހަރުން ދަށުގެ އާބާދީގެ ގާތްގަނޑަކަށް ފަސް ޕަސެންޓަކީ ކެންސަރަށް ފަރުވާ ހޯދަމުންދާ ކުޑަކުދިން ކަމަށް އެ ސޮސައިޓީން ވަނީ ބުނެފައެވެ.
ކުޑައިރުގެ ކެންސަރުގެ އަލާމާތްތަކާ މެދު މައިންބަފައިންނާއި ބަލަހައްޓާ ފަރާތްތަކާއި ތައުލީމީ ދާއިރާގައި މަސައްކަތްކުރާ ފަރާތްތައް އަހުލުވެރިކުރުމަކީ މުހިންމު ކަމެއް ކަމަށް އެ ސޮސައިޓީން ވަނީ ބުނެފައެވެ.