ލުބުނާނުގެ ހަތިޔާރުއެޅި ޖަމާއަތް ހިޒުބުއްﷲގެ ވެރިޔާ ޙަސަން ނަޞްރުﷲ އަވަހާރަކޮށްލާފައިވާ ކަމަށް އިސްރާއީލުގެ އަސްކަރިއްޔާއިން ބުނެފިއެވެ.
ނަމަވެސް ހިޒްބުއްﷲ އިން އެކަން ކަށަވަރުކޮށްދީފައެއްނުވެއެވެ.
އިސްރާއީލު އަސްކަރިއްޔާއިން ނެރުނު ބަޔާނެއްގައި ބުނީ ނަޞްރުالله އާއި އެކު ހިޒްބުاللهގެ ސަދާން ފްރޮންޓުގެ ކޮމާންޑަރު އަލީ ކަރާކީ ވެސް އަވަހާރަ ކޮށްލާފައިވާ ކަމަށާއި އަދި އިތުރު ކޮމާންޑަރުންތަކެއްވެސް އަވަހާރަކޮށްލާފައިވާ ކަމަށެވެ.
"ޙަސަން ނަޞްރުالله މަރުވެއްޖެ." އިސްރާއީލުގެ އަސްކަރިއްޔާގެ ތަރުޖަމާނު ނަދާވް ޝޮޝާނީ އެކްސްގައި ކުރި ޕޯސްޓެއްގައި ވިދާޅުވެފައިވެއެވެ.
ހިޒްބުއްﷲއާ ގާތް މީހަކާ ހަވާލާދީ އަލް އަހްރަމް ނޫހުން ބުނީ ހުކުރު ދުވަހުގެ ހަވީރުން ފެށިގެން ނަޞްރުاللهއާ ގުޅުން ކެނޑިފައިވާ ކަމަށެވެ. ނަމަވެސް ނަޞްރުﷲ އަވާހަރަވެފައިވާކަން ކަށަވަރެއްނުކޮށްދެއެވެ.
ދެހާސް ހަ ވަނަ އަހަރު އިސްރާއީލުން ހިޒްބުއްالله އާ އެންމެ ފަހުން ކުރި ހަނގުރާމައިގައިވެސް ނަޞްރުއްﷲ އަވާހަރަކޮށްލައިފައިވާ ކަމަށް އަޑުފެތުރުނެވެ. ނަމަވެސް އޭގެފަހުން ނަޞްރުﷲ ވަނީ އާންމުންނަށް ފެނިފައެވެ.
ލުބުނާނުގެ ދެކުނުގައި ހުންނަ ހިޒްބުﷲގެ މިސައިލް ޔުނިޓުގެ ކޮމާންޑަރު، މުޙައްމަދު ޢަލީ ޢިސްމާއީލާއި އޭނާގެ ނާއިބު އަދި އިތުރު ލީޑަރުން ވެސް އަވަހާރަކޮށްލައިފައިވާ ކަމަށް އިސްރާއީލުގެ އަސްކަރިއްޔާއިން މިއަދު ކުރީގެ ވަގުތެއްގައި ވަނީ ބުނެފައެވެ.
އެކަން ހާމަކޮށް އިސްރާއީލުގެ އަސްކަރިއްޔާއިން ނެރުނު ބަޔާނެއްގައި ބުނީ ޢިސްމާއީލަކީ ޓެރަރިޒަމްގެ ގިނަ އަމަލުތަކެއްގެ ޒިންމާ އުފުލަންޖެހޭ މީހެއް ކަމަށެވެ. އޭގެ ތެރޭގައި އިސްރާއީލު ސަރަހައްދަށް ރޮކެޓް ފޮނުވާލުމާއި މިދިޔަ ބުދަ ދުވަހު ލުބުނާނުގެ މެދުތެރެއަށް މިސައިލް ފޮނުވުން ހިމެނޭ ކަމަށް ބުންޏެވެ.
ނަމަވެސް އެ މީހުން އަވަހާރަ ކޮށްލާފައިވާ ކަމަކަށް ހިޒްބުﷲ އިން އަދި ކަށަވަރެއް ނުކޮށްދެއެވެ.
ލުބުނާންގެ ރައްޔިތުންނާ ދެކޮޅަށް އިސްރާއީލުން ދެމުންދާ ހަމަލާތަކުގައި ޝަހީދު ކޮށްލާފައިވާ މީހުންގެ އަދަދު ވަނީ 700އަށް ވުރެ އިތުރުވެފައެވެ.
އިސްރާއީލުން އެންމެ ފަހުން ލުބުނާނަށް ހަމަލާދީފައި ވަނީ މިއަދު ހެނދުނު އެ ގައުމުގެ އިރުމަތީ ސަރަހައްދުގައި އޮންނަ ބެކާ ވާލީއަށެވެ. އެ ހަމަލާގައި ގެއްލުން ލިބުނު މީހުންގެ އަދަދު އަދި ސާފެއް ނޫނެވެ.
ބެއިރޫތުގެ ދަހިއްޔާއަށްވެސް އެކި ވަރުގެ ބޮމުގެ ހަމަލާތައް ދީފައިވާއިރު، އިސްރާއީލު އަސްކަރިއްޔާއިން ބުނީ އެ މީހުންގެ ޓާގެޓަކީ ހިޒްބުﷲގެ ކޮމާންޑް ސެންޓަރާއި ހަތިޔާރު ގުދަން ކަމަށެވެ. ނަމަވެސް އެކަމާ ގުޅިގެން އެއްވެސް ހެއްކެއް އެ މީހުންނަށް މިހާތަނަށްވެސް ދެއްކިފައެއް ނުވެއެވެ.