އަމިއްލަ މަސައްކަތްކުރާ ފަރާތްތައް ދަފުތަރުވާން ހުޅުވާލައިފި

ރާއްޖޭގައި އަމިއްލަ މަސައްކަތްކުރާ މީހުން ދަފުތަރުކުރުމުގެ މަސައްކަތް ބިޒްނަސް ސެންޓާ ކޯޕަރޭޝަން (ބީސީސީ)އިން މިއަދު ފަށައިފިއެވެ.

ބީސީސީން ބުނި ގޮތުގައި މިއީ ރާއްޖޭގައި ވިޔަފާރިކުރާ އެންމެ ކުދި، ކުދި އަދި މެދުފަންތީގެ ވިޔަފާރި މަރުކަޒީކޮށް ރަޖިސްޓްރީކުރުމުގެ ނިޒާމެއް ގާއިމުކުރުމުގެ ތެރެއިން ރާއްޖޭގައި އަމިއްލަ މަސައްކަތްކުރާ ފަރާތްތަކާއި، އެ ފަރާތްތައް މަސައްކަތްކުރާ ދާއިރާތައް ދެނެގަނެ، އެ ފަރާތްތަކަށް ވިޔަފާރީގެ ފަހި މާހައުލެއް ކަށަވަރުކުރުމަށް އެކުލަވައިލާ ދަފުތަރެކެވެ.

އޭގެ އިތުރުން، ދަފުތަރު އެކުލަވާލުމުގެ އެއް މަގުސަދަކީ އެފަދަ ވިޔަފާރިތައް ތަރައްގީކުރުމަށް ބޭނުންވާ އެހީތެރިކަން ފޯރުކޮށްދިނުމެވެ. އެގޮތުން، ބީސީސީން ވަނީ އެ ދަފުތަރުގައި އަމިއްލަ މަސައްކަތްކުރާ ފަރާތްތައް ދަފުތަރު ކުރުމުގައި އަމަލުކުރާނެ އުސޫލެއް ކަނޑައަޅާފައެވެ.

ދަފުތަރުގައި ރަޖިސްޓަރީވުމުގެ ފުރުސަތު މިއަދުން ފެށިގެން އެ ކަމަށް ޚާއްސަ އޮންލައިން ޕޯޓަލެއް މެދުވެރިކޮށް ވަނީ ހުޅުވާލާފައެވެ. އެ ކޯޕަރޭޝަނުން ބުނި ގޮތުގައި އެ ޕޯޓަލްގެ ލިންކު ބީސީސީގެ މީސްމީޑިޔާ މަންސަތަކުންނާއި ބީސީސީގެ ވެބްސައިޓް މެދުވެރިކޮށް މިއަދުން ފެށިގެން ފެންނަން ހުންނާނެއެވެ.

އަދި، ދަފުތަރުގައި ރަޖިސްޓަރީވާން ފުރަންޖެހޭ ފޯމު ފުރުމުގައި އެހީތެރިކަން ބޭނުންވާ ފަރާތްތަކަށް މާލޭގައި ހުންނަ ބީސީސީގެ މައި އޮފީހުންނާއި، އަތޮޅުތަކުގައި ގާއިމުކުރެވިފައިވާ ބިޒްނަސް ސެންޓަރުތަކުން އެހީތެރިކަން ފޯރުކޮށްދޭނެ ކަމަށް ބުންޏެވެ.

ވިޔަފާރީގެ ގޮތުގައި އަމިއްލަ މަސައްކަތްކުރާ ފަރާތްތައް މި ދަފުތަރުގައި ރަޖިސްޓަރީވުމަކީ އެ ފަރާތްތަކަށް ވިޔަފާރީގައި ކުރިއަށް ދިއުމަށް ބޭނުންވާ ވަރަށް ގިނަ ކަންކަމުގައި ލުއިފަސޭހަތައް ލިބޭނެ ކަމެއް ކަމަށާއި، އެފަދަ ހުރިހާ ފަރާތްތަކެއް ވެސް މި ފުރުސަތުގެ ބޭނުން ހިފުމަކީ ވަރަށް މުހިންމު ކަމެއް ކަމަށް ބީސީސީން ބުންޏެވެ.

ދަފުތަރު އެކުލަވާލައި، އަދާހަމަކޮށް އެ ކަމާ ބެހޭ އުސޫލުގައި ބަޔާންކުރާ ކަންކަން ހިންގައި ތަންފީޒުކޮށް ބަލަހައްޓާނީ ވެސް ބީސީސީއިންނެވެ.