އައިކެއާއިން އެ ކުންފުނީގެ ސުކޫކްގައި އިންވެސްޓުކުރި ފަރާތްތަކަށް ފައިދާއަށް 3.4 މިލިއަން ރުފިޔާ އިއްޔެ ޖަމާކޮށްފިއެވެ.
އައިކެއާއިން ބުނީ، މި ސުކޫކްއަކީ ހުޅުމާލޭގެ ލޮލުގެ ފަރުވާއަށް ޚާއްސަ ހޮސްޕިޓަލެއް އައިކެއާ ސެންޓަރުގެ ނަމުގައި ޤާއިމްކުރުމަށް ބޭނުންވާ ފައިސާ ހޯދުމުގެ ގޮތުން އެ ކުންފުނިން ނެރުނު ސުކޫކެއް ކަމަށެވެ.
އިންވެސްޓަރުންނަށް ސުކޫކުގެ ފައިދާ ބަހަނީ ފަސް އަހަރަށް ކަމަށްވާއިރު، އަހަރަކަށް އަށް ޕަސެންޓު ރޭޓުން އިންވެސްޓަރުންނަށް ފައިދާ ބެހި ކަމަށް އައިކެއާއިން ބުނެއެވެ.
މި ފަހަރަކީ އައިކެއާއިން ސުކޫކްގެ އިންވެސްޓަރުންނަށް ފައިދާ ބެހި ފުރަތަމަ ފަހަރު ކަމަށްވާއިރު، ކުންފުނީގެ ސުކޫކް ކާމިޔާބުކަމާއެކީ ކެޕިޓަލް މާކެޓަށް ނެރެދިނުމުގައި ލީޑް އެރޭންޖާގެ ޙައިސިއްޔަތުން މަސައްކަތް ކުރީ ފަސްޓް ނޭޝަނަލް ފައިނޭންސް ކޯޕަރޭޝަން ކަމަށް އައިކެއާއިން މައުލޫމާތުދެއެވެ.
ފަސްޓް ނޭޝަނަލް ފައިނޭންސް ކޯޕަރޭޝަންއަކީ ފައިނޭންސްގެ ދާއިރާގައި، ޚާއްސަކޮށް ރާއްޖޭގެ ކެޕިޓަލް މާކެޓުގައި ގިނަ ކުންފުނިތަކެއްގެ އިތުބާރު ހޯދައިފައިވާ ކުންފުންޏެކެވެ.
ފަސްޓް ނޭޝަނަލް ފައިނޭންސް ކޯޕަރޭޝަނުން ފާހަގަކުރި ގޮތުގައި ސުކޫކްތަކުގައި އިންވެސްޓުކުރުމަށް ލިބޭ ފުރުސަތުތަކަކީ ފައިސާ ފަހަށް ރައްކާކުރަން ބޭނުންފުޅުވާ ފަރާތްތަކަށް ވަރަށް ރަނގަޅު ފުރުސަތުތަކެވެ.
ރާއްޖޭގެ ކެޕިޓަލް މާކެޓުގައި ސުކޫކް ލިސްޓުކުރެވެނީ ކެޕިޓަލް މާކެޓް ޑިވެލޮޕްމެންޓް އޮތޯރިޓީގެ ހުއްދަ ލިބިގެންނެވެ.