މެޓާ ކުންފުނިން ބޭއްވި އަހަރީ ކަނެކްޓް ކޮންފަރެންސްގައި އޮގްމެންޓެޑް ރިއަލިޓީ (އޭއާރު) އައިނެއް އަދި، އާ ވާޗުއަލް ރިއަލިޓީ ހެޑްސެޓެއް ތައާރަފުކޮށްފިއެވެ.
އެ ކުންފުނިން ވަނީ އާޓިފިޝަލް އިންޓެލިޖެންސް (އޭއައި)އާ ގުޅޭ އާ ވަސީލަތްތަކެއް ވެސް ދައްކާލައިފައެވެ.
"އޯރިއަން"ގެ ނަމުގައި ތައާރަފުކުރި އޭއާރު އައިނަކީ ހަގީގީ ދުނިޔެއާއި މަޖާޒީ ދުނިޔެ އެއްކޮށްލުމަށް ފަރުމާކޮށްފައިވާ އެއްޗެކެވެ. މި އައިނާ މުޢާމަލާތްކުރެވޭނީ އަތުގެ ހަރަކާތް، އަޑު އަދި ނިއުރަލް އިންޓަފޭސް މެދުވެރިކޮށެވެ.
މެޓާއިން ބުނާ ގޮތުގައި މި އައިނު 2027 ގައި ވިއްކަން ފެށޭނެއެވެ.
މެޓާގެ އަހަރީ ޝޯގައި އަގުހެޔޮ ވާޗުއަލް ރިއަލިޓީ ހެޑްސެޓެއްގެ ގޮތުގައި މެޓާއިން ވަނީ "މެޓާ ކުއެސްޓް 3އެސް" ތައާރަފުކޮށްފައެވެ. ޖުމުލަ 300 ޑޮލަރުގެ މި ހެޑްސެޓުގައި ހިމެނެނީ ފްރެސްނެލް ލެންސްތަކާއި ދަށް ރެޒޮލިއުޝަނެކެވެ.
މި ހެޑްސެޓު އޮކްޓޯބަރު 15 އިން ފެށިގެން ވިއްކަން ފަށާނެ ކަމަށް މެޓާއިން ބުނެފައިވެއެވެ.
މީގެ އިތުރުން، ރޭ-ބޭން މެޓާ ސްމާޓް ގްލާސަސްއަށް އާ އޭއައި އެސިސްޓެންޓެއް ތައާރަފުކޮށްފައިވެއެވެ.
މި އަޕްޑޭޓާ އެކު ރިމައިންޑާތައް ސެޓްކުރުމާއި ކިއުއާރު ކޯޑު ސްކޭންކުރުމުގެ ގާބިލުކަން ލިބޭނެއެވެ. އަދި، ދެ ބަސް ދެމެދު ލައިވް ތަރުޖަމާކުރުމުގެ ޚިދުމަތް ވެސް ރަނގަޅުކޮށްފައިވާ ކަމަށް މެޓާއިން ބުނެފައިވެއެވެ.
މެޓާ އޭއައިއަށް ވެސް ގިނަ އަޕްޑޭޓްތަކެއް ގެނެސްފައިވެއެވެ. މިގޮތުން، އަޑުން މުޢާމަލާތްކުރެވޭ ގޮތަށް ތަރައްގީކޮށް، މަޝްހޫރު ތަރިންގެ އަޑު ލެވޭނެ ގޮތް ހަދާފައިވެއެވެ. އަދި، ފޮޓޯތައް އެޑިޓްކުރެވޭނެ ގާބިލުކަމާއި ފޮޓޯތައް ދެނެގަނެ ތަފުސީލު ބަޔާންކުރެވޭނެ ގޮތް ވެސް ހަދާފައިވާ ކަމަށް މެޓާއިން ބުނެފައިވެއެވެ.
މި އާ ޓެކްނޮލޮޖީތައް ތައާރަފުކުރުމާ އެކު، މެޓާއިން ވަނީ ކުއެސްޓް ދެއަކާއި ކުއެސްޓް ޕްރޯ ހެޑްސެޓްތައް މި އަހަރުގެ ނިޔަލަށް ވިއްކުން ހުއްޓާލާނެ ކަމަށް ބުނެފައެވެ.