ބޮލީވުޑްގެ ބަތަލާ ޕަރިނީތީ ޗޯޕްރާއާއި ފިރިމީހާ ރާގަވް ޗައްދާގެ އަލަތު ކައިވެންޏަށް އަހަރު ފުރުން ރާއްޖޭގައި ފާހަގަކޮށްފިއެވެ.
މިދިޔަ އަންގާރަ ދުވަހު ޕަރިނީތީގެ ދެމަފރިންގެ ކައިވެންޏަށް އަހަރު ފުރިފައިވާއިރު ޕަރިނީތީ ވަނީ ރާގަވާ އެކު ރާއްޖޭގެ ރިޒޯޓެއްގައި ނަގާފައިވާ ފޮޓޯތަކެއް ސޯޝަލް މީޑިއާގައި ޕޯސްޓްކޮށްފައެވެ. ނަމަވެސް، ދެ ތަރިން ޗުއްޓީ ހޭދަކޮށްފައިވަނީ ރާއްޖޭގެ ކޮން ރިޒޯޓެއްގައި ކަމެއް ހާމަކޮށްފައެއް ނުވެއެވެ.
މިދިޔަ އަހަރުގެ ސެޕްޓެމްބަރު މަހުގެ 25 ވަނަ ދުވަހު ދެ މީހުންގެ ކައިވެނިކުރިތާ މާ ގިނަ ދުވަސްތަކެއްނުވެ، ޕަރިނީތީ ވަނީ ރާގަވްގެ މަންމައާއި ބަތަލާގެ މަންމަ ގޮވައިގެން ވެސް ރާއްޖެއަށް ޒިޔާރަތްކޮށްފައެވެ.
ރާގަވާ ލޯބީގެ ގޮތުން ގުޅުމުގެ މާ ކުރިން ވެސް ޕަރިނީތީއަކީ އެކި ފަހަރުމަތިން ރާއްޖެއަށް ޒިޔާރަތްކޮށްފައިވާ ބަތަލާއެކެވެ. މިދިޔަ އަހަރު މާސްޓަ ސްކޫބާ ޑައިވަރެއްގެ ލައިސަންސް ލިބުނު ބަތަލާ ވަނީ ސްކޫބާ ޑައިވިންއަށް ޚާއްސަ ސެޝަންތަކެއް ވެސް ރާއްޖޭގައި ފުރިހަމަކޮށްފައެވެ.
ޕަރިނީތީ އާއި ރާގަވް ރާއްޖޭގައި ހޭދަކުރި ދުވަސްތަކުގެ ފޮޓޯތައް ސޯޝަލްމީޑިއާގައި ހިއްސާކޮށްފައި--ފޮޓޯ/ޕިންކްވިލާ
ފިލްމީ ދާއިރާގައި މަސައްކަތްކުރުމުގެ އިތުރުން ޕަރިނީތީ ވަނީ މިއުޒިކީ ދާއިރާގައި ކެރިއަރު ބިނާކުރަން ނިންމާ ރަސްމީކޮށް ލަވަކިޔުމުގެ ދާއިރާއިން ކުރިއަށްދާން ނިންމިކަން ވެސް އިއުލާނުކޮށްފައެވެ.
ޕަރިނީތީގެ ފިރިމީހާ ރާގަވަކީ އިންޑިއާގެ ސިޔާސީ ޕާޓީ، އާމް އާދްމީ ޕާޓީއަށް ނިސްބަތްވާ މީހެކެވެ. ރާގަވަކީ އިންޑިއާގެ ގާނޫނޫ ހަދާ މަޖިލީހުގެ މަތިގެ، ރާޖިއަ ސަބާގެ މެންބަރެކެވެ.
މި އަހަރުގެ އޭޕްރިލް މަހު ރިލީޒްކޮށް، ބޮޑު މަގުބޫލުކަމެއް ހޯދި ފިލްމު "އަމަރު ސިންގް ޗަމްކީލާ"އަށް ފަހު ޕަރިނީތީ އިތުރު ފިލްމަކަށް ސޮއިކުރިކަން ކަށަވަރެއް ނުވެއެވެ.