ގދ. ހޯނޑެއްދޫ ކައުންސިލުން އެ އަތޮޅުގައި އޮންނަ ފަޅު ރަށެއް ކަމަށްވާ ކަނޑެވާރެހާގައި ރިސޯޓެއް ތަރައްގީކުރާނެ ބަޔަކު ހޯދަން އިއުލާނުކޮށްފިއެވެ.
ކަނޑެވާރެހާއަކީ ހޯނޑެއްދޫ ކައުންސިލްގެ އިހުތިސާސްގެ ތެރޭގައި އޮންނަ 4.6 ހެކްޓަރުގެ ރަށެކެވެ.
ހޯނޑެއްދޫ ކައުންސިލުން އިއްޔެ ގެޒެޓުކޮށްފައިވާ އިއުލާނުގައިވަނީ ކަނޑެވާރެހާގައި ޓޫރިސްޓު ރިސޯޓެއް ތަރައްގީކުރަން ޝަރުތު ހަމަވާ ދިވެހި، އަދި ބޭރުގެ އިންވެސްޓަރުންނަށް ޝައުގުވެރިކަން ފާޅު ކުރުމަށް ހުޅުވާލައިފައެވެ.
އެ ރަށަށް ބިޑުކުރުމަށް ހުޅުވާލާފައިވާ ފުރުސަތު ހަމަވާނީ 17 ނޮވެމްބަރަށެވެ.
އެ އިއުލާނުގައިވާ ގޮތުން، މި ކަމަށް ޝައުގުވެރިވާ ފަރާތްތަކަށް މައުލޫމާތު ދިނުމަށް ޕްރީބިޑު މީޓިންއެއް އަންނަ މަހުގެ 15ވަނަ ދުވަހުގެ 13:30ގައި ޒޫމް މެދުވެރިކޮށް ބާއްވާނެއެވެ.
މައުލޫމާތު ދިނުމަށް ބާއްވާ މީޓިންގައި ބައިވެރިވުމަށް އަންނަ މަހުގެ 13ވަނަ ދުވަހުގެ 14:00ގެ ކުރިން، [email protected] އަށް، ޝައުގުވެރިވާ ފަރާތުގެ ނަމާއި، އީމެއިލް އެޑްރެސް އަދި ފޯނު ނަންބަރު ފޮނުވަން ޖެހޭނެއެވެ.
ކަނޑެވާރެހާއަކީ ހޯނޑެއްދޫއާއި އެއް ފަޅެއްގައި އޮންނަ ރަށްތަކުގެ ތެރެއިން އެންމެ ކައިރީގައި އޮންނަ ރަށެވެ. އެ ރަށުގައު ރިސޯޓެއް ތަރައްގީކުރަން މީގެ ކުރިން ވެސް 2021ވަނަ އަހަރު ޓޫރިޒަމް މިނިސްޓްރީން ހުޅުވާލިއެވެ.