ރައީސް ޑރ. މުޙައްމަދު މުއިއްޒުގެ ތަޞައްވުރުގައި ހިމެނޭ އެންމެ ބޮޑު މަޝްރޫއުކަމަށްވާ ރަސްމާލެ މަޝްރޫއު މިހާރު ކުރިއަށްދާ ގޮތާ ގުޅޭގޮތުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީންނާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން މިއަދު މަޝްވަރާ ކޮށްފިއެވެ.
މި މަޝްވަރާގައި މިނިސްޓަރު ޑރ. އަބްދުﷲ މުއްޠަލިބާއި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ ބައިވެރިވެވަޑައިގެންފައެވެ.
މި ބައްދަލުވުމުގައި މަޝްވަރާކޮށްފައިވަނީ ރަސްމާލެ މަޝްރޫއުގެ މަސައްކަތް ތަންފީޒުކުރުމާ ގުޅޭ ގޮތުންނެވެ.
އެގޮތުން ރަސްމާލެ ޕްރޮޖެކްޓުގެ މިހާރުގެ ހާލަތާއި، ކުރިއަށް އޮތް ތަނުގައި މަސައްކަތްތައް ގެންދާނެ ގޮތުގެ ތަފްސީލީ މަޢުލޫމާތު ހިއްސާކުރެވުނު ކަމަށް މިނިސްޓްރީން ބުންޏެވެ.
މީގެ އިތުރުން މި މަޝްރޫގެ މަސައްކަތް އަވަސް ކުރުމަށާއި، ފެންވަރު ރަނގަޅު ގޮތެއްގައި ނިންމުމަށް އަޅަންޖެހޭ ފިޔަވަޅުތަކާއި ގުޅޭގޮތުން މަޝްވަރާކުރެވުނު ކަމަށް ވެސް ވަނީ މައުލޫމާތު ދީފައެވެ.
އަދި މަޝްރޫޢު ނިމުމުން ރައްޔިތުންނަށް ލިބޭނެ ފައިދާތަކާއި، މާލެ ސަރަޙައްދުގެ ތަރައްޤީއަށް މި މަޝްރޫޢުން ކުރާނެ އަސަރުތަކާ ގުޅޭގޮތުން ވެސް ވާހަކަދެކެވުނުކަމަށް ވަނީ ބުނެފައެވެ.
ރަސްމާލެ މަޝްރޫއަކީ ރާއްޖޭގައި ބޯހިޔާވަހިކަމަށް ޚާއްސަކޮށްގެން ކުރިއަށްގެންދާ އެންމެ ބިޔަ މަޝްރޫއުއެވެ. އެ މަޝްރޫއުގެ ދަށުން 1،153 ހެކްޓަރުގެ ބިން ހިއްކުމަށް ހަމަޖެހިފައިވާއިރު ސަރުކާރުގެ އަމާޒަކީ އެ މަސައްކަތް އަށް މަސް ތެރޭ ނިންމުމެވެ.
އެ މަޝްރޫއުގެ މަސައްކަތް ފެށީ މިދިޔަ 2023ވަނަ އަހަރުގެ ޑިސެމްބަރު މަހުގެ 18ގައެވެ.