ކޮންމެ އަހަރަކު ވެސް ދެފަހަރަކަށް ހުޅުވާލާ ޔުނިވާސިޓީ ރިސާޗް ގްރާންޓްސްއާއި ޔުނިވާސިޓީ ބުކް ރައިޓިން ގްރާންޓްސްގެ ދެވަނަ ބުރަށް ކުރިމަތިލާން ގައުމީ ޔުނިވާސިޓީ (އެމްއެންޔޫ)އިން ހުޅުވާލައިފިއެވެ.
އެމްއެންޔޫއިން ބުނީ، ހުޅުވާލި ދެ ގްރާންޓްއަކީ އެ ޔުނިވާސިޓީގެ މުވައްޒަފުންނަށާއި ދަރިވަރުންގެ މެދުގައި ދިރާސާތައްކޮށް، އެ ދިރާސާތަކުގެ އަލީގައި އިލްމީ ހޯދުންތައް ހޯދާ ދެނެގަތުމުގެ ސަގާފަތެއް ބިނާކުރުމަށާއި ތަފާތު އެކި ދާއިރާތަކާ ގުޅޭ އިލްމީ ފޮތް ލިޔަން ބޭނުންވާ ފަރާތްތަކަށް އެ ފުރުސަތު މަގުފަހިކޮށްދިނުމަށް ކުރިއަށް ގެންދާ ޕްރޮގްރާމެއް ކަމަށެވެ.
އެގޮތުން، ފޮތް ލިޔުމަށް އެމްއެންޔޫއިން 10،000 ރުފިޔާއާއި އެއްލައްކަ ރުފިޔާއާ ދެމެދުގެ މާލީ އެހީ ދޭއިރު، ދިރާސާތައް ކުރަން 10،000 ރުފިޔާއާއި އެއް މިލިއަން ރުފިޔާއާ ދެމެދުގެ އެހީއެއް ދެއެވެ. މި އެހީތަކަށް އެދި ނޮވެންބަރު މަހުގެ ނުވަ ވަނަ ދުވަހުގެ ނިޔަލަށް ހުށަހެޅޭނެއެވެ.
އެމްއެންޔޫ: ދިރާސާ ކުރުމަށާއި ފޮތް ލިޔަން މާލީ އެހީއަށް އެދެން އެމްއެންޔޫއިން ހުޅުވާލައިފި ---- ސަން ފޮޓޯ/ ނާއިޝް ނާހިދު
އެމްއެންޔޫއިން ބުނީ، މިހާތަނަށް ފޮތް ލިޔުމަށާއި ދިރާސަތައް ހަދަން 18 މިލިއަނަށް ވުރެ ގިނަ ރުފިޔާ ދީފައިވާ ކަމަށެވެ.
އޭގެތެރޭގައި، ފޮތް ލިޔުމަށް ދެ މިލިއަނަށް ވުރެ ގިނަ ރުފިޔާ ދީފައިވާއިރު، ދިރާސާ ކުރުމަށް 16.4 މިލިއަނަށް ވުރެ ގިނަ ރުފިޔާ ދީފައިވާ ކަމަށް އެ ޔުނިވާސިޓީން ބުނެއެވެ.
އެ ޔުނިވާސިޓީން ބުނީ، އެހީދޭ ފަރާތްތަކުން ހޯދާ އިލްމީ އާ ހޯދުންތައް ކޮންމެ ދިރާސާއެއް ނިންމުމަށް ފަހު ކަމާ ގުޅުން ހުރި އިދާރާތަކާއި އަމިއްލަ ފަރާތްތަކާއި މުޖުތަމައުއާ ހިއްސާކުރާ ކަމަށެވެ. އަދި، އެކަމުން އެހީތަކުގެ މަގްސަދު ހާސިލް ކުރެވޭކަން އެ ޔުނިވާސިޓީން ފާހަގަކުރެއެވެ.