ބައިނަލްއަގުވާމީ ގާނޫނުތަކާ ހިލާފުވުމާއި ހުޅަނގު އައްސޭރީގައި އިތުރުވަމުންދާ އަނިޔާވެރިކަމުގައި އިސްރާއީލުން ބައިވެރިވާތީ، އެ މީހުންނާ ދެކޮޅަށް ކެނެޑާއިން ދަތިކުރުމުގެ ފިޔަވަޅު އަޅައިފިއެވެ.
ކެނެޑާގެ ޚާރިޖީ ވަޒީރު މެލާނީ ޖޯލީ ބުދަ ދުވަހު ނެރުއްވި ބަޔާނެއްގައި ހާމަކުރައްވާފައިވާ ގޮތުގައި ކެނެޑާއިން އިސްރާއީލުގެ ވަޒަންވެރިންނާ ދެކޮޅަށް އާ ދަތިކުރުމުގެ ފިޔަވަޅުތައް އަޅަނީ ސްޕެޝަލް އިކޮނޮމިކް މީސާސް (އެކްސްޓްރިމިސްޓް ސެޓްލާ ވައިލެންސް) ގަވާއިދުގެ ދަށުންނެވެ.
އެ ގޮތުން، މިހާތަނަށް ހަތަރު މީހަކާއި، ދެ މުއްސައްސާއަކަށް ފިޔަވަޅު އަޅައިފައިވާ ކަމަށް ޖޯލީ ވިދާޅުވިއެވެ.
"ފަލަސްތީނާއި އެ މީހުންގެ މުދަލަށް ހައްދުފަހަނަޅާފައިވާ ވަޒަންވެރިން ދޭ އަނިޔާވެރިކަމަކީ ބަލައިގަނެވޭނެ ކަމެއް ނޫން ކަމަށާއި އެކަމުގެ ސަބަބުން ސުލްހައިގެ ފުރުސަތުތައް ގެއްލިގެންދޭ. އިސްރާއީލުގެ ކަމާބެހޭ ފަރާތްތަކަށް އަޅުގަނޑުމެން ގޮވާލަން އާންމުންގެ ރައްކާތެރިކަން ކަށަވަރުކޮށްދީ، މިފަދަ އަނިޔާވެރިކަން ހިންގާ މީހުން ޖަވާބުދާރީ ކުރުވުމަށް،" ޖޯލީ ވިދާޅުވިއެވެ.
ހިފާފައިވާ ސަރަހައްދުތަކުގައި ގަވާއިދާ ޚިލާފަށް ވަޒަންވެރިވުމަކީ ހަތަރުވަނަ ޖެނީވާ މުއާހަދާއާ ސީދާ ޚިލާފު ކަމެއް ކަމަށް ކެނެޑާ ސަރުކާރުން ތަކުރާރުކޮށް ބުނެފައިވެއެވެ.
ކެނެޑާއިން ހުޅަނގު އައްސޭރިއާއި އިރުމަތީ ގުދުސްގައި އިސްރާއީލުގެ އާބާދީތައް ފުޅާކުރުމާ ދެކޮޅު ކަމަށާއި، މެދުއިރުމަތީގައި ފުރިހަމަ، އަދި އިންސާފުވެރިކަމާ އެކު ދެމިއޮންނަ ސުލްހައެއް ގާއިމްކުރުމަށް ކެނެޑާއިން މަސައްކަތްކުރާނެ ކަމަށް ވެސް އެ ގައުމުގެ ސަރުކާރުން ނެރުނު ބަޔާނުގައި ބުނެފައިވެއެވެ.
އޮކްޓޫބަރު ހަތްވަނަ ދުވަހު އިސްރާއީލުން ފަލަސްތީނުގެ ޣައްޒާގައި ލޭއޮހޮރުވުން ފެށި ފަހުން އިސްރާއީލުން ހިފައިފައިވާ ހުޅަނގު އައްސޭރިއާއި އިރުމަތީ ޤުދުސްގައި ގަވާއިދާ ޚިލާފަށް ވަޒަންވެރިވެގެން އުޅޭ އިސްރާއީލު މީހުންގެ ފަލަސްތީނުގެ އާންމުންނަށް ކުރާ އަނިޔާތައް ވެސް ވަނީ އިންތިހާއަށް އިތުރުވެފައެވެ.