ކެންޔާއަށް ނިސްބަތްވާ އަންހެނަކު ރާއްޖެއަށް ގެނެސް, އެމީހާ ލައްވައި ހަށި ވިއްކުވި ކަމުގެ ކުށް ކްރިމިނަލް ކޯޓުން ސާބިތުވެފައިވާ ދިވެއްސެއްގެ މައްޗަށް މީހަކު ޓްރެފިކް ކުރުމުގެ ކުށް ސާބިތުނުވާ ކަމަށް ސުފްރީމް ކޯޓުން މިއަދު ހުކުމްކޮށްފިއެވެ.
މީހަކު ޓްރެފިކް ކުރުމުގެ ކުށް ސާބިތު ނުވާތަކަށް ސުޕްރީމް ކޯޓުން ހުކުމް ކުރީ، ސ. ހިތަދޫ، ސައުތްކްރޯސް މޫސާ މުންތަސިމްގެ މައްޗަށެވެ.
މި މައްސަލައާ ގުޅުވައި މުންސަތިމްގެ މައްޗަށް މީހަކު ޓްރެފިކް ކުރުމުގެ ދައުވާއާއިި މީހަކު ލައްވައި ހަށި ވިއްކުވި ކަމުގެ ދައުވާ އުފުލާފައިވާއިރު، ކްރިމިނަލް ކޯޓުގައި ސާބިތުވީ ހަމައެކަނި ހަށި ވިއްކުވި ކަމުގެ ދައުވާއެވެ.
އެގޮތުން، އެ ދައުވާއާ ގުޅިގެން މުންތަސިމް ހަތް އަހަރަށް ޖަލަށް ލުމަށް ކްރިމިނަލް ކޯޓުން 2017ގައި ހުކުމް ކުރިއެވެ. އެ ނިންމުމާ ގުޅުވައި 23 ނޮވެންބަރު 2021 ވަނަ އަހަރު އެ ކޯޓުގެ ނިންމުން ދައުލަތުން ހައި ކޯޓުގައި އިސްތިއުނާފު ކޮށްފައިވާއިރު، ހައި ކޯޓުން ނިންމީ ކްރިމިނަލް ކޯޓުގެ ނިންމުމަށް ބަދަލެއް ގެންނަން ނުޖެހޭ ކަމަށެވެ.
ހައިކޯޓު: އެ ކޯޓުން ވެސް ނިންމީ ކްރިމިނަލް ކޯޓުގެ ނިންމުމަށް ބަދަލު ގެންނަން ނުޖެހޭ ކަމަށް --- ސަން ފައިލް ފޮޓޯ/ އިހްތިޝާމް މުހައްމަދު
މީގެއިތުރުން، މި މައްސަލައިގައި މުންތަސިމްގެ މައްޗަށް މީހަކު ޓްރެފިކް ކުރުމުގެ ކުށުގެ ދައުވާ ސާބިތުވާން ޖެހޭ ކަމަށް ދައުލަތުން ގަބޫލުކުރާއިރު، ހައި ކޯޓުގެ ނިންމުން ސުޕްރީމް ކޯޓުގައި ވެސް އިސްތިއުނާފު ކުރީ ދައުލަތުންނެވެ.
ދައުލަތުން މި މައްސަލައިގައި ތުހުމަތުކުރާ އިތުރު ކަންތައްތައް:
- ކެންޔާ އަންހެން މީހާ ރާއްޖެ ގެނައި މުންތަސިމަކީ ފުޅާ ދާއިރާއެއްގައި ވިޔަފާރި ކުރާ މީހެއް ކަމަށް ބުނެ އޮޅުވާލާއިގެން
- އަންހެން މީހާގެ ޕާސްޕޯޓު އަތުލައިގެން މަޖުބޫރުން ގެންގުޅުން
މި މައްސަލައިގައި މުންތަސިމްގެ މައްޗަށް މީހަކު ޓްރެފިކް ކުރުމުގެ ކުށް ސާބިތުވާން ޖެހޭ ކަމަށް ދައުލަތުން ގަބޫލުކުރަނީ ޓްރެފިކް ކުރުން މަނާކުރާ ގާނޫނުގައި ކުށް ސާބިތުވާ ކަމަށް ބުނެފައިވާ ހާލާތްތައް ހިމެނޭތީ ކަމަށެވެ.
ކްރިމިނަލް ކޯޓު: އެ ކޯޓުން ނިންމީ މުންތަސިމްގެ މައްޗަށް ހަށި ވިއްކުވި ކަމުގެ ކުށް ސާބިތުވާ ކަމަށް -- ސަން ފޮޓޯ/ ފަޔާޒު މޫސާ
އޭގެތެރޭގައި، ކެންޔާ އަންހެން މީހާގެ މައްޗަށް މަސައްކަތެއް ކުރުމަށް ލާޒިމު ކުރުމާއި ވަކި ކަމެއް ޝަރުތު ކުރުމާއި ޝަރުތު ބަދަލު ކުރުމުގެ މިނިވަން ކަމެއް ނެތުމުގެ އިތުރުން ގާނުނާ ޚިލާފު މަޖުބޫރު ކަމެއް ކުރުވުން ހިމެނޭކަން ފާހަގަކޮށްފައި ވެއެވެ.
ބެންޗުގައި ތިއްބެވި ތިން ފަނޑިޔާރުންގެ އިއްތިފާގުން ސުޕްރީމް ކޯޓުން މި މައްސަލައިގައި މިއަދު ހައި ކޯޓުގެ ނިންމުން ބަދަލު ކުރަން ޖެހޭ ސަބަބެއް ނެތް ކަމަށް ވަނީ ހުކުމް ކޮށްފައެވެ.
އެފަދައިން ހުކުމް ކޮށްފައިވަނީ ބިދޭސީ އަންހެން މީހާ ލައްވައި ހަށި ވިއްކުވީ އޭނާގެ ނުރުހުމުގައި ކަން ހާމަވާ ކަމެއް ދައުލަތަށް ކިޔާނުދެވުމާއި ހައި ކޯޓާއި ސުޕްރީމް ކޯޓުގައި ހަވާލާދިން ގާނޫނުގެ މާއްދާތައް ކްރިމިނަލް ކޯޓުގައި ފާހަގަކޮށްފައި ނެތުމުން ކަމަށް މިއަދު ކުރި ހުކުމްގައި ބުނެއެވެ.
މި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތު ބެލެހެއްޓެވީ ފަނޑިޔާރު ޑރ. އަޒްމިރަލްދާ ޒާހިރެވެ. ދެން އެ ބެންޗުގައި ތިއްބެވީ ފަނޑިޔާރު ހުސްނުއްސުއޫދާއި ފަނޑިޔާރު ޑރ. މުހައްމަދު އިބްރާހީމެވެ.