ކީރިތި ޤުރުއާނާ ބެހޭ ޤައުމީ މަރުކަޒުގެ މުދައްރިސުންގެ ފެންވަރު މަތިކުރުމަށް ޕްރޮގުރާމެއް އިއްޔެ ފަށައިފިއެވެ.
އިސްލާމިކް މިނިސްޓްރީން ބުނީ ޤުރުއާނާބެހޭ މަރުކަޒުގެ މުދައްރިސުން ތާޒާކޮށް، އެ މީހުންގެ ފެންވަރު މަތި ކުރުމަށްޓަކައި ސިލްސިލާ ޕްރޮގްރާމެއް ފަށައިފައިވާ ކަމަށެވެ. އެ ގޮތުން މި ޕްރޮގުރަމަކީ ބޭރުގެ މަޝްހޫރު ޤާރީވެރިން މެދުވެރިކޮށް ހިންގާ ސިލްސިލާ ޕްރޮގުރާމެއް ކަމަށް އެ މިނިސްޓްރީން ބުނެއެވެ.
މި ޕްރޮގުރާމުގެ ފުރަތަމަ ދަންފަޅިތައް ނަންގަވައިދެއްވަނީ މެލޭޝިއާގެ މަޝްހޫރު ޤާރީ ޑރ. ވަން ޙިލްމީއެވެ. އިސްލާމިކް މިނިސްޓްރީން ބުނީ ޑރ. ވަން ޙިލްމީގެ ކުލާސްތައް ކުރިޔަށްދާނީ އިއްޔެއިން ފެށިގެން މާދަމާގެ ނިޔަލަށް ކަމަށެވެ.
އެ މިނިސްޓްރީން ބުނީ މި ޕްރޮގުރާމުގެ މަޤުސަދަކީ ޤުރުއާނާ ބެހޭ ޤައުމީ މަރުކަޒުގެ މުދައްރިސުންގެ ފެންވަރު މިހާރަށްވުރެ ހަރުދަނާކުރުމާއި ބޭރު ތަޖުރިބާކާރުންގެ އަރިހުން ދަސްކުރުމުގެ ފުރުސަތު ހޯދައިދިނުމުގެ އިތުރުން، ދަރިވަރުންނަށް އުނގަންނައިދޭނެ އާ ގޮތްތައް ދަސްކުރެވޭނެ އިންތިޒާމް ފަހިކޮށްދިނުން ކަމަށެވެ.
ކީރިތި ޤުރުއާނާ ބެހޭ ޤައުމީ މަރުކަޒުގެ ގޮފިތަށް ރާއްޖޭގެ އެކި ރަށްރަށުގައި ވަނީ ޤާއިމްކޮށްފަ އެވެ. އެ ގޮތުން ކީރިތި ޤުރުއާނާ ބެހޭ ޤައުމީ މަރުކަޒުގެ 40 ގޮތްޕެއް ހުޅުވާފައިވެއެވެ.
މީގެ ކުރިން އިސްލާމިކް މިނިސްޓްރީން ވަނީ، މާލޭ ސިޓީގައި ޚުތުބާ ކިޔާ މީހުންގެ ލިސްޓު މުރާޖާކޮށް އިމާމުވެ ހުކުރު ކުރުމަށް ޝައުޤުވެރިވާ މީހުން ހޯދާފައެވެ.