ސ. ހުޅުދޫއިން ފަރީދު ނަމަކަށް ކިޔާ ހާލެއް ގެއްލިގެން ހޯދުމަށް އާންމުންގެ އެހީތެރިކަމަށް އެދިއްޖެއެވެ.
ފަރީދު ނަމަކަށް ކިޔާ ހާލެއް ގެއްލިގެން ހޯދުމަށް ސޯޝަލް މީޑިއާގައި ކޮށްފައިވާ ޕޯސްޓެއްގައިވަނީ އެ ހާ ގެއްލުނީ ސ. ހުޅުދޫއިން ކަމަށެވެ.
އަދި އެ ހާލުގެ ކަނާތު ފައިގައި ރަން ކެވެލި ފަށެއް އިންނާނެ ކަމަށް އެ ޕޯސްޓުގައިވެއެވެ. އެ ހާ ފެނިއްޖެ ނަމަ، 7587911އަށް ގުޅައި އެކަން އެންގުމަށް އެ ޕޯސްޓުގައި ވަނީ އާންމުންގެ ކިބައިން އެދިފައެވެ.
ޕޯސްޓުގައި ވާގޮތުން ފަރީދުގެ ނަމުން ގޮވުމުން ގޮވާމީހެއް ކައިރިއަށް މި ހާ ދާނެއެވެ.
އާންމު ގޮތެއްގައި މި ގޮތަށް ގެއްލިގެން ހޯދަން އިއުލާންކުރަނީ ގުރަޔާއި ބުޅާފަދަ އޮޅުކޮށްގެން ގެންގުޅޭ ބައެއް ޖަނަވާރެވެ. އަދި އެ ފަދަ ޖަނަވާރެއް ގެއްލިގެން ހޯދަން އިއުލާންކުރާއިރު، އެ ހޯދައިދީފި މީހަކަށް އާންމު ގޮތެއްގައި އޭގެ ވެރިފަރާތުން އިނާމެއް ވެސް ދެއެވެ.
މިއީ މިފަދަ ނަމެއް ދީފައިވާ ހާލެއް ގެއްލިގެން ހޯދަން އިއުލާނުކޮށް، ގިނަ ބައެއްގެ ސަމާލުކަން މިކަމަށް ލިބުނު ފުރަތަމަ ފަހަރެވެ. އެގޮތުން ފަރީދު ގެއްލުންކަން އިއުލާނުކޮށް ސޯޝަލްމީޑިއާގައި ހިއްސާކޮށްފައިވާ ޕޯސްޓުތައް ގިނަ ބަޔަކު ވަނީ ޝެއާކޮށްފައެވެ.