ދިވެހި ފޮތް ކިޔުމަށް ހާއްސަކޮށް "ދިވެހި ފޮތް" މި ނަމުގައި މޯބައިލް އެޕްކޭޝަނެއް ތައާރަފުކޮށްފިއެވެ.
މިއީ އޮންލައިންކޮށް ދިވެހި ފޮތް ގަނެ، ފޮތް ކިޔޭގޮތަށް ފަރުމާކުރި ފުރަތަމަ އެޕްލިކޭޝަނެވެ. މިއެޕްލިކޭޝަނުން ދިވެހި އީ ފޮތް ހިލޭ އަދި ގަނެގެން ވެސް ކިޔޭނެއެވެ.
މިއެޕްލިކޭޝަންގެ ބޭނުމަކީ ދިވެހި ފޮތާއި މަޖައްލާ ޒަމާނީ ވަސީލަތްތަކުގެ އެހީގައި ފަސޭހަކަމާއެކު ލިބޭނޭ ގޮތް ހަދައިދިނުމެވެ. އަދި ޤަދީމީ ފޮތްތަކާއި ލިޔެކިޔުން އާކައިވްކޮށް ރައްކާތެރިކޮށް އެއް މަންސައަކުން ލިބޭނެ ގޮތް ހެދުމެވެ.
މި އެޕްލިކޭޝަންގައި މިހާރުވެސް ދިވެހި ތަފާތު މަޖައްލާތައް ހިމެނެއެވެ. އެގެތެރޭގައި އައްޑަނަ، ހިދާޔަތުގެ އަލި، ދަރުމަ، ދިއިސްލާމް، ފަތްތޫރަ، ޖަމާއަތުގެ ޚަބަރު ހިމެނެއެވެ. ކުރީގެ މަޖައްލާތަކުގެ ތެރެއިން ސަންދާނު، އައްޑުވަސް، ސަންގު، ހުކުރު، އަލްއިސްލާހް ފަދަ މަޖައްލާތައް މި އެޕް ބޭނުންކޮށްގެން ހިލޭ ކިޔާލެވޭނެއެވެ.
މީގެ އިތުރުން ތަފާތު މައުޞޫތަކަށް ލިޔެފައިވާ ފޮތްތަކާއި އެކިއެކި ވާހަކަ ފޮތް ވެސް "ދިވެހި ފޮތް" އެޕްލިކޭޝަނުން ލިބެން ހުރެއެވެ. އޭގެ ތެރެއިން ބައެއް ފޮތްތަކަކީ ފޮތް ލިޔުންތެރީންނާ ގުޅިގެން ވިއްކުމަށް ޖަހާފައިވާ ފޮތްތަކެވެ.
މި އެޕްލިކޭޝަން ޑިވެލޮޕްކުރި މުހައްމަދު ޖައިލަމް ބުނީ އެޕްލިކޭޝަންގައި ހުރި ފޮތްތައް ބީއެމްއެލް ގޭޓްވޭ ބޭނުންކޮށްގެން ގަނެވޭނެއެވެ. އަދި އެފޮތްތައް ފޯނު އަދި ޓެބްލެޓަށް ޑައުންލޯޑްކޮށް މިއެޕްލިކޭޝަންގެ ތެރެއިން އޮންލައިކޮށް ވެސް ކިޔާލެވޭނެއެވެ. މިގޮތަށް ޑައުންލޯޑްކުރެވޭ ފޮތްތައް ހުންނަނީ ސްކީންޝޮޓް ނުނެގޭ ގޮތަށް އަދި އެހެން މީހުންނާ ހިއްސާނުކުރޭނެ ގޮތަށް ރައްކާތެރި ކުރިފައެވެ.
"މި އެޕްލިކޭޝަން އިން ލިޔުންތެރީންނަށް އެމީހުންގެ ފޮތްތައް އޮންލައިންކޮށް ވިއްކައިގެން އާއްމުދަނީ ހޯދޭނެ. މިއީ މިގޮތަށް ދިވެހި ފޮތް ލިޔުންތެރީންނަށް ހާއްސަކޮށް ތައްޔާރުކުރުވުނު އެއްމެ ފުރަތަމަ އެޕްލިކޭޝަން." އޭނާ ބުންޏެވެ.
މިއީ އެއްވެސް ފައިސާއެއް ނުދައްކާ ބޭނުންކުރެވޭ އެޕްލިކޭޝަނެކެވެ. އެޕްލިކޭޝަން ހިންގުމަށް އާއްމުދަނީ ހޯދަނީ އެޕްލިކޭޝަން މެދުވެރިކޮށް ވިކޭ ފޮތްތަކުން ކޮމިޝަން ނަގައިގެންނެވެ.
މިފަދަ އެޕްލިކޭޝަނެއްގެ ސަބަބުން ފޮތް ލިޔުންތަރިންނަށް ފޮތް ޝާއިއުކުރަން ފަސޭހަ ވަނެކަމަށް އެޕްލިކޭޝަން އުފެއްދި ޓީމުން ގަބޫލުކުރެއެވެ. މީގެ އިތުރުން ކިޔުންތެރީންނަށް ދުނިޔޭގެ ކޮންމެ ތަނެއްގައި ހުރެގެން ވެސް ފަސޭހަކަމާއެކު ދިވެހިފޮތް ކިޔާލެވޭނެއެވެ.
އެންޑޮރްއިޑް އަދި އައިއޯސް އެޕްސްޓޯތަކުން މިހާރު ވެސް މި އެޕްލިކޭޝަން ޑައުންލޯޑް ކުރެވޭނެއެވެ.
"ދިވެހި ފޮތް" އެޕްލިކޭޝަނަށް އިތުރު ފީޗާސް ލުމުގެ މަސައްކަތް ކުރަމުން ގެންދާކަމަށް ޖައިލަމް ވަނީ ބުނެފައެވެ. އެގޮތުން ޓެކްސްޓު ފޯމެޓްގައި ކިޔުމާއި، އޯޑިއޯ ފޮތް ލިބޭނެ ގޮތް ހެދުން ފަދަ ކަންކަން ކުރިއަށް ރޭވިފައި ހުރިކަމަށް އޭނާ މައުލޫމާތުދެއެވެ.