ހދ. ހިރިމަރަދޫ ރައްޔިތުން ކ. ތުލުސްދުއަށް ބަދަލުކޮށްދޭން އެ ރަށު ކައުންސިލުން ލޯކަލް ގަވަރުމަންޓް މިނިސްޓްރީގައި މިއަދު އެދިއްޖެއެވެ.
ހިރިމަރަދޫ ކައުންސިލުން މިއަދު ވަނީ ލޯކަލް ގަވަނަންސް މިނިސްޓްރީއާ ބައްދަލުކޮށް މި ކަމުގެ މަޝްވަރާތައް ކޮށްފައެވެ.
ލޯކަލް ގަވަނަންސް މިނިސްޓަރު އާދަމް ޝަރީފް އުމަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވާން ރައްޔިތުން ނިންމާފައިވާ ކަމަށް މިއަދުގެ ބައްދަލުވުމުގައި އެ ރަށު ކައުންސިލްގެ މެންބަރުން ވިދާޅުވި ކަމަށެވެ.
އަދި، އެ ރަށުގެ ރައްޔިތުން ބަދަލުވާން ބޭނުންވަނީ ކ. ތުލުސްދުއަށް ކަމަށް މިނިސްޓަރު ވަނީ ހާމަކުރައްވައިފައެވެ.
މި ކަމާ ގުޅިގެން ހިރިމަރަދޫ ކައުންސިލްގެ ރައީސް މުޙައްމަދު ވަހީދު "ސަން"އަށް ވިދާޅުވީ، އެ ރަށުގެ ރައްޔިތުން ބޭނުންވަނީ މާލެ ސަރަހައްދުގެ ރަށަކަށް ހިޖުރަކުރަން ކަމަށެވެ. އެ ގޮތުން، ތުލުސްދޫ ޚިޔާރުކޮށްފައިވަނީ އެ ރަށަށް ހިޖުރަކުރެވޭ ވަރަށް ބިން އޮތުމުން ކަމަށް އޭނާ ވިދާޅުވިއެވެ.
ވަހީދު ވިދާޅުވި ގޮތުގައި ހިރިމަރަދޫ ރައްޔިތުންގެ ފަރާތުން ރައީސުލްޖުމްހޫރިއްޔާއަށް މިކަން ދެންނެވުމުން އެ މަނިކުފާނު ވަނީ، އެ ރަށުގެ ރައްޔިތުން ބޭނުންވާ ގޮތަށް ތުލުސްދުއަށް ހިޖުރަކުރެވޭނޭކަމުގެ ޔަގީންކަން ދެއްވައިފައެވެ.
"ރައީސުލްޖުމްހޫރިއްޔާއަށް ދަންނަވައިގެން އެ ކަން ތަންފީޒުކުރުމަށް މިހާރު އޮތީ ހައުސިން މިނިސްޓްރީއާ ވެސް ހަވާލުކޮށްފައި. މިއަދު މިނިސްޓްރީއާ އެކު ދިޔައީ އެ ކަމުގެ މަޝްވަރާތައް،" ވަހީދު ވިދާޅުވިއެވެ.
ހިރިމަރަދޫގެ އާބާދީއަކީ 589 އެވެ. އެހެން ނަމަވެސް އެ ރަށު ރައްޔިތުންގެ ތެރެއިން ގިނަ ބަޔަކު ވަނީ ރަށް ދޫކޮށް ހިޖުރަކޮށްފައެވެ.