އޯޕަންއޭއައިގެ ކުރީގެ އިސް ވެރިޔާ އަދި ސައިންޓިސްޓް އިލްޔާ ސުޓްސްކެވާގެ އާ ކުންފުންޏަށް އެއް ބިލިއަން ޑޮލަރު ލިބިއްޖެއެވެ.
އޯޕަންއޭއައިގެ ކުރީގެ ޗީފް ސައިންޓިސްޓް އިލްޔާ ސުޓްސްކެވާ އަލަށް އުފައްދާފައިވާ "ސޭފް ސުޕަ އިންޓެލިޖެންސް" (އެސްއެސްއައި)އަށް އެއް ބިލިއަން ޑޮލަރުގެ އިންވެސްޓްމަންޓް ލިބިފައިވާއިރު، މި ފައިސާ ބޭނުންކުރާނީ ރައްކާތެރި އާޓިފިޝަލް އިންޓެލިޖެންސް ސިސްޓަމްތައް ތަރައްގީކުރަން ކަމަށް ކުންފުނިން ބުނެފައިވެއެވެ.
މި ވަގުތު 10 މުވައްޒަފުން ތިބި އެސްއެސްއައިއިން ބުނެފައިވާ ގޮތުގައި، މި ފައިސާއިން ކޮމްޕިއުޓިން ޕަވާ އިތުރުކޮށް، މި ދާއިރާއަށް ކުޅަދާނަ މީހުން ވަޒީފާއަށް ނަގާނެއެވެ. އަދި، އެމެރިކާގެ ޕާލޯ އަލްޓޯއާއި އިޒްރޭލުގެ ޓެލް އަވީވްގައި ކުޑަ އަދި އިތުބާރު ހުރި ޓީމެއް އެކުލަވައިލާނެއެވެ.
އެސްއެސްއައިގެ އަގު ހާމަކޮށްފައިނުވި ނަމަވެސް، ކުންފުނީގެ އަގު ފަސް ބިލިއަން ޑޮލަރުގައި ހުރި ކަމަށް ރިޕޯޓުތައް ބުނެއެވެ.
އެސްއެސްއައިގެ ސީއީއޯ ޑެނިއަލް ގްރޮސް ވިދާޅުވި ގޮތުގައި ކުންފުނީގެ މިޝަނަކީ ރައްކާތެރި ސުޕަ އިންޓެލިޖެންސްއަކަށް ސީދާ ވާސިލުވުމެވެ. އަދި، މާކެޓަށް ޕްރޮޑަކްޓެއް ނެރުމުގެ ކުރިން ރިސާޗް އެންޑް ޑިވެލޮޕްމަންޓަށް މަދުވެގެން ދެތިން އަހަރު ދުވަހުގެ ވަގުތު ހޭދަކުރުމަށް ބޭނުންވާ ކަމަށް އޭނާ ވިދާޅުވިއެވެ.
އާޓިފިޝަލް އިންޓެލިޖެންސްގެ ސަބަބުން ލިބިދާނެ ގެއްލުންތަކާ މެދު ކަންބޮޑުވުން އިތުރުވަމުންދާ ދަނޑިވަޅެއްގައި، އޭއައި ސޭފްޓީ ނުވަތަ ރައްކާތެރިކަމަކީ މިހާރު ގިނަ ބަހުސްތަކެއް ކުރެވޭ މައުޟޫއެކެވެ.