ވެނެޒުއޭލާގެ ރައީސް ނިކޮލަސް މަދޫރޯގެ ޕްރައިވެޓް ޖެޓް ޑޮމިނިކަން ރިޕަބްލިކްގައި އޮއްވައި އެމެރިކާއިން ހިފަހައްޓައިފިއެވެ.
އެމެރިކާއިން ބުނީ, ޖެޓު ހިފެއްޓީ މަދޫރޯއާއި އޭނާގެ ސަރުކާރުގެ އޮފިޝަލުން ދަތުރުކުރައްވާ އެ ޖެޓަކީ ވެނެޒުއޭލާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ޚިލާފަށް ގަނެ, ވަގަށް އެމެރިކާއިން ބޭރުކޮށްފައިވާ އެއްޗަކަށްވާތީ ކަމަށެވެ.
އެމެރިކާއިން މިހާރު ވަނީ އެ ޖެޓް އެ ގައުމުގެ ފްލޮރިޑާއަށް ގެންގޮސްފައެވެ. މިއީ "ޕައިރެސީ" ކަމަށް ވިދާޅުވެ, މަދޫރޯ ވަނީ އެމެރިކާ ކުށްވެރިކުރައްވައިފައެވެ.
އެ ކަމާ ގުޅިގެން ވެނެޒުއޭލާގެ ސަރުކާރުން ނެރުނު ބަޔާނެއްގައި ބުނީ, ގައުމަށް ލިބުނު އެ ގެއްލުން ފޫބައްދަން ގާނޫނީ ގޮތުން ފިޔަވަޅު އެޅުމުގެ ހައްގު ލިބިގެންވާ ކަމަށެވެ. މިއީ އެމެރިކާއިން ތަކުރާރުކޮށް ހިންގަމުން ގެންދާ ކުށުގެ އަމަލުތަކުގެ ތެރެއިން އަމަލެއް ކަމަށް ބަޔާނުގައިވެއެވެ.
އެމެރިކާއިން ބުނީ، މަދޫރޯއާ ގުޅުން ހުރި ބަޔަކު 2022 ވަނަ އަހަރުގެ ފަހުކޮޅާއި 2023 ވަނަ އަހަރުގެ ކުރީކޮޅު މި ޖެޓްގެ މުއާމަލާތް ސިއްރުވާނެ ގޮތަށް ހިންގީ ކެރީބިއަންގެ ކުންފުންޏެއް ބޭނުންކޮށްގެން ކަމަށެވެ.
އެމެރިކާއިން އެ ޖެޓް އަތުލައިގެންފައިވަނީ ޖުލައި 28 ވަނަ ދުވަހު ބޭއްވި ވެނެޒުއޭލާގެ އިންތިޚާބު ކާމިޔާބުވީ އޭނާއަށް ކަމަށް މަދޫރޯ އިއުލާނުކުރި ނަމަވެސް އެ އިންތިޚާބު ކާމިޔާބުކުރީ އިދިކޮޅުން ކަމަށް އެ މީހުން ބުނުމާ ގުޅިގެން އެކަމުގެ ޕްރެޝަރު ބޮޑުވެފައިވާ ދަނޑިވަޅެއްގައެވެ.
ވެނެޒުއެލާގެ އިދިކޮޅު ފަރާތްތަކުން ވޯޓުލުމުގެ މައުލޫމާތު އާންމުކޮށް އިދިކޮޅު ޕާޓީގެ ކެންޑިޑޭޓް އެޑްމަންޑޯ ގޮންޒާލޭޒަށް ގަބޫލުކުރެވޭ ފަދަ ކާމިޔާބީއެއް ލިބިފައިވާ ކަމަށް ބުނި ނަމަވެސް އޭނާގެ ކާމިޔާބީ މަދޫރޯއަށް ވަފާތެރި އިންތިޚާބީ ކައުންސިލަކުން ބަލައިގަނެފައެއް ނުވެއެވެ.
ރައީސް ކަމަށް މަދޫރޯ އިންތިޚާބުވެވަޑައިގެންފައިވާ ކަމަށް ވިލާތުގެ އިއްތިހާދުން ވެސް ގަބޫލެއްނުކުރެއެވެ. އެމެރިކާއިން ވެސް ވަނީ އިންތިޚާބު ކާމިޔާބު ކުރެއްވީ އިދިކޮޅުގެ ގޮންޒާލޭޒް ކަމަށް ބުނެފައެވެ.
މިއީ ކޮރަޕްޝަންގެ ތުހުމަތުގައި އެމެރިކާގެ ކަމާބެހޭ ފަރާތްތަކުން މަދޫރޯ ނުވަތަ ވެނެޒުއެލާގެ ސަރުކާރަށް ފިޔަވަޅު އެޅި ފުރަތަމަ ފަހަރެއް ނޫނެވެ. ކުރިން 2020 ވަނަ އަހަރު ޖަސްޓިސް ޑިޕާޓްމަންޓުން ވަނީ މަދޫރޯއާއި ވެނެޒުއެލާގެ 14 އޮފިޝަލެއްގެ މައްޗަށް މަސްތުވާތަކެއްޗާއި ކޮރަޕްޝަން އަދި މަސްތުވާތަކެތީގެ ވިޔަފާރީގެ ދައުވާ އުފުލައިފައެވެ.
މަދޫރޯގެ މައްޗަށް ކުށް ސާބިތުވާނެ ފަދަ މައުލޫމާތެއް ހޯދައިދޭ ފަރާތަކަށް 15 މިލިއަން ޑޮލަރުގެ އިނާމެއް ވެސް އެމެރިކާއިން ހުށަހެޅިއެވެ.