އަހަރުގެ ފަހު ގްރޭން ސްލޭމް މުބާރާތް ކަމަށްވާ ޔޫއެސް އޯޕަން ޓެނިސް މުބާރާތުގެ ފިރިހެން ސިންގަލްސް އިވެންޓްގެ ކުއާޓާ ފައިނަލުން، ފަސް ވަނައަށް ސީޑު ކުރެވިފައިވާ ރަޝިއާގެ ޑަނީލް މެޑްވެޑޭވް ޖާގަހޯދައިފިއެވެ.
މި މުބާރާތުގެ ކުއާޓާ ފައިނަލުން މެޑްވެޑޭވް ޖާގަ ހޯދާފައިވަނީ ހަތަރު ވަނަ ބުރުގައި ޕޯޗުގަލްގެ ނޫނޯ ބޯގެސް އާ ބައްދަލުކުރި މެޗު ފަސޭހަ ކަމާއެކު ސީދާ ތިން ސެޓުން ކާމިޔާބު ކޮށްގެންނެވެ.
އޭނާ މި މެޗުގެ ތިން ސެޓު ކާމިޔާބު ކޮށްފައިވަނީ ހައެއް ސުމެއް، ހައެއް އެކެއް އަދި ހައެއް ތިނަކުންނެވެ. މެޑްވެޑޭވް އަކީ މި ވަގުތު މި މުބާރާތުގައި ކުޅެމުން ދާ ކުޅުންތެރިންގެ ތެރެއިން މި މުބާރާތް ކުރިން ކާމިޔާބު ކުރެވިފައިވާ ހަމައެކަނި ކުޅުންތެރިޔާއެވެ. އަދި ގްރޭން ސްލޭމް އެހެން މުބާރާތެއް ކާމިޔާބު ކުރެވިފައިވާ ކުޅުންތެރިޔަކަށް ވެސް ހުރީ މެޑްވެޑޭވްގެ އިތުރުން އެއްވަނައަށް ސީޑު ކުރެވިފައިވާ އިޓަލީވިލާތުގެ ޔަނިކް ސިނާ އެކަންޏެވެ.
މިއީ ވޭތުވެދިޔަ ހަ އަހަރުގެ ތެރޭގައި މި މުބާރާތުގެ ކުއާޓާ ފައިނަލުން މެޑްވެޑޭވް ޖާގަހޯދި ފަސްވަނަ ފަހަރެވެ.
މި މުބާރާތުގެ އެހެން މެޗުތަކަށް ބަލާލާއިރު ހަތަރު ވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވް ވެސް ވަނީ ކުއާޓާ ފައިނަލުން ޖާގަހޯދައިފައެވެ. އޭނާ ކުއާޓާ ފައިނަލުން ޖާގަ ހޯދީ ހަތަރު ވަނަ ބުރުގައި އެމެރިކާގެ ބްރެންޑަން ނަކަޝީމީ އާ ބައްދަލުކުރި މެޗު ތިނެއް ހައެއް، ހައެއް އެކެއް، ހައެއް ދެއެއް އަދި ހައެއް ދެއަކުން ކާމިޔާބު ކޮށްގެންނެވެ.
މީގެ އިތުރުން ފަންސަވީސް ވަނައަށް ސީޑު ކުރެވިފައިވާ އިނގިރޭސިވިލާތުގެ ޖެކް ޑްރެޕާ އާއި ޗެކް ރިޕަބްލިކްގެ ތޯމަސް މަކާޗް ބައްދަލުކުރި މެޗު ސީދާ ތިން ސެޓުން ކާމިޔާބުކޮށް ޑްރެޕާ ވެސް ވަނީ ކްއާޓާ ފައިނަލްގެ ޖާގައެއް ކަށަވަރުކޮށްފައެވެ. އޭނާ މި މެޗުގެ ސެޓުތައް ކާމިޔާބު ކޮށްފައިވަނީ ހައެއް ތިނެއް، ހައެއް އެކެއް އަދި ހައެއް ދެއަކުންނެވެ. އަދި ވިހި ވަނައަށް ސީޑު ކުރެވިފައިވާ އެމެރިކާގެ ފްރަންސެސް ޓިއަފޯ އާއި އަށާވީސް ވަނައަށް ސީޑު ކުރެވިފައިވާ އޮސްޓްރޭލިއާގެ އެލެކްސީ ޕޮޕިރިން ބައްދަލުކުރި މެޗު ތިން ސެޓު އެއް ސެޓުން ކާމިޔާބު ކޮށްފައިވަނީ ޓިއަފޯއެވެ. އޭނާ މި މެޗުގެ ސެޓުތައް ކާމިޔާބު ކޮށްފައިވަނީ ހައެއް ހަތަރެއް، ހަތެއް ހައެއް، ދެއެއް ހައެއް އަދި ހައެއް ތިނަކުންނެވެ.
މީގެ އިތުރުން ބާރަވަނައަށް ސީޑު ކުރެވިފައިވާ އެމެރިކާގެ ޓޭލާ ފްރިޓްޒް އާއި ނުވަ ވަނައަށް ސީޑު ކުރެވިފައިވާ ބަލްގޭރިއާގެ ގްރިގޯ ޑިމިޓްރޯވް ވެސް ވަނީ ކުއާޓާ ފައިނަލުން ޖާގަ ހޯދައިފައެވެ.