ޖަރުމަނު ބުންޑެސްލީގާގައި ބަޔޭން މިޔުނިކާއި އެސްސީ ފްރެއިބާގް ބައްދަލުކުރި މެޗު ބަޔޭން އިން ކާމިޔާބު ކޮށްފިއެވެ.
ބަޔޭންގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބަޔޭންއިންނެވެ. މިމެޗުގެ ފުރަތަމަ ލަނޑު ބަޔޭން އިން ކާމިޔާބު ކޮށްފައިވަނީ މެޗުގެ 38 ވަނަ މިނެޓުގައި ލިބުނު ޕެނަލްޓީ އަކުންނެވެ.
މި ޕެނަލްޓީ ކާމިޔާބުކޮށް އެޓީމަށް ލީޑު ނަގައިދިނީ މިދިޔަ ސީޒަންގައި އެންމެ ގިނަ ލަނޑު ކާމިޔާބު ކޮށްދިން ހެރީ ކޭންއެވެ. މިހާފުގައި ލަނޑު ޖަހާނެ އިތުރު ފުރުސަތު ދެޓީމަށް ލިބިގެންދިޔަ ނަމަވެސް އެއިން އެއްވެސް ފުރުސަތެއްގެ ބޭނުން ހިފޭގޮތެއް ނުވިއެވެ.
ފުރަތަމަ ހާފެކޭ އެއްގޮތަށް މިމެޗުގެ ދެވަނަ ހާފުގައި ވެސް ފެނިގެންދިޔައީ ބަޔޭން އިން ހަމަލާއަށް އިސްކަން ދީގެން ކުޅުނު އިރު ފްރެއިބާގް އިން ލިބޭ ފުރުސަތުތަކުގައި ހަމަލާ އުފެއްދޭތޯ މަސައްކަތް ކުރަމުންދިޔަ ތަނެވެ. މިމެޗުގައި ބަޔޭން އިން ކާމިޔާބު ކުރި ދެވަނަ ލަނޑު މެޗުގެ 78ވަނަ މިނެޓުގައި ކާމިޔާބު ކޮށްދިނީ ތޯމަސް މުލާއެވެ.
މިކާމިޔާބީއާއެކު ބަޔޭން މިވަނީ އާ ސީޒަންގައި މިހާތަނަށް ކުޅުނު ދެމެޗު ކާމިޔާބު ކުރި ތިން ޓީމުގެ ތެރެއިން އެއް ޓީމަށް ވެފައެވެ.
އަދި މިވަގުތު ފައިދާ ގޯލަށް ބަލާއިރު އުޅެނީ ތާވަލްގެ ދެވަނައިގައެވެ. އަދި ފްރެއިބާގް އުޅެނީ 3 ޕޮއިންޓާއެކު 10 ވަނައިގައެވެ.
މިވަގުތު ތާވަލްގެ އެއްވަނައިގާ އުޅެނީ އައުސްބާގް އާއި ބައްދަލުކޮށް 4 ލަނޑު ސުންލަނޑުން މެޗު ކާމިޔާބު ކުރި ހެއިޑެންހެއިމްއެވެ. މިމެޗުގައި ހެއިޑެންހެއިމްއިން ކާމިޔާބު ކުރި ހަތަރު ލަނޑު ކާމިޔާބު ކޮށްދީފައިވަނީ ޕޯލް ވާނާ، ލިއޯ ސައިންޒާ، އެޑްރިއަން ބެކް އަދި މެކްސިމިލިއަން ބުރެއުނިގްއެވެ.