އެޗްޑީސީގެ ހިއްސާ އާންމުންނަށް ވިއްކަނީ

ރައީސް ޑރ. މުޙައްމަދު މުއިއްޒުގެ ވިސްނުންފުޅަކީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ހިއްސާ އާންމުންނަށް ވިއްކުންކަމަށް ހައުސިން މިނިސްޓަރު ޑރ. އަލީ ހައިދަރު މިއަދު ވިދާޅުވެއްޖެއެވެ.

މިނިސްޓަރު އެ ފަދައިން ވިދާޅުވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ކެބިނެޓުގައި ދެކެވުނު ވާހަކަތައް ހިއްސާކުރައްވަމުންނެވެ.

މިއަދުގެ ކެބިނެޓުގައި ވަނީ ފަހި ދިރިއުޅުން ކޯޕަރޭޝަން (އެފްޑީސީ) އަކީ އެޗްޑީސީގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުމަށް ނިންމައިފައެވެ.

އެކަމުގެ އިތުރު ތަފްސީލް ދެއްވަމުން ހައުސިން މިނިސްޓަރު ޑރ. އަލީ ހައިދަރު ވިދާޅުވީ މީގެފަހުން ސަރުކާރުގެ ހުރިހަ އިޖްތިމާއީ ބޯހިޔާވަހިކަމުގެ މަޝްރޫއުތައް ހިންގާނީ އެފްޑީސީގެ ތެރެއިން ކަމަށެވެ.

އަދި އެޗްޑީސީ ވާނީ ސަރުކާރުން ތަރައްގީ ކުރަން ނިންމާ އާބަން ސެންޓަރުތައް ތަރައްގީކުރުމުގެ އެންމެ މުހިންމު މަސައްކަތް ކުރާނެ ކުންފުންޏަށް ކަމަށް ވިދާޅުވިއެވެ.

"އޭރުން އެފްޑީސީން ކުރާ މަސައްކަތްތަކަކީ ހަމައެެކަނި ހުޅުމާލެއަކު ނޫން، މުޅި ރާއްޖޭގައި ވެސް އަސާސީ ބޯހިޔާވަހިކަން ސޯޝަލް ހައުސިން ފޯރުކޮށްދިނުމަށް އެންމެ ބޮޑު ރޯލެއް ކުޅޭނެ ކުންފުންޏަކަށް ވެގެންދާނެ،" ހައިދަރު ވިދާޅުވިއެވެ.

ހައިދަރު ވިދާޅުވީ މިއީ ދައުލަތުގެ ޚަރަދުކުޑަކުރުމުގެ ބޭނުމުގައި، އެއްކަހަލަ މަސައްކަތްތައް ކުރާ ކުންފުނިތައް އެއްކުރުމަށް ރައީސް ގެންގުޅުއްވާ ސިޔާސަތުގެ ތެރެއިން ނިންމި ނިންމުމެއް ކަމަށެވެ.

މީގެ އިތުރުން ރައީސްގެ ވިސްނުންފުޅަކީ ކުރިއަށް ހުރި ދުވަސްތަކުގައި އެޗްޑީސީގެ ހިއްސާ އާންމުންނަށް ވިއްކުންކަމަށް ވެސް ވިދާޅުވިއެވެ.

"މިއަދު ކެބިނެޓުގައި ނުނިންމެވި ނަަމަވެސް ރައީސް ވިސްނަވައިފައި އޮތީ އެޗްޑީސީއަކީ އާންމުންގެ ވެސް ހިއްސާ އޮންނަ ކުންފުންޏަކަށް ހަދަން. ޕަބްލިކް ލިމިޓެޑް ކޮމްޕެނީއަކަށް،" ހައިދަރު ވިދާޅުވިއެވެ.

ހިއްސާ ވިއްކުމާ ގުޅޭ އިތުރު ތަފްސީލް ހައިދަރު ހިއްސާ ނުކުރައްވައެވެ.

މި ވަގުތު އެޗްޑީސީއަކީ ހުޅުމާލޭގެ މުނިސިޕަލް ނޫން، އެހެން ހުރިހާ ކަމެއް ބަލަހައްޓާ ކުންފުންޏެވެ. އެފްޑީސީއަކީ ކުރީގެ ރައީސް އިބްރާހިމް މުޙައްމަދު ޞާލިހު އުފެއްދެވި ކުންފުންޏެކެވެ.

އެޗްޑީސީގެ ސަބްސިޑަރީއަކަށް އެފްޑީސީ ހަދައިފައިވާއިރު، މި ދެ ކުންފުނި މެދުވެރިކޮށް ސަރުކާރުގެ ބޯހިޔާވަހިކަމުގެ ސިޔާސަތު ތަންފީޒުކުރަން މުހިންމު ކަންތައްތަކެއް ކުރާނެކަމަށް މިނިސްޓަރު ވިދާޅުވިއެވެ.