އެއާ އެމްބިއުލާންސްގައި ކޮމާޝަލް ދަތުރުތައް އަޅަން ނިންމީ، މެޑިކަލް ޗާޓަރުތައް މަދުވުމުން ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެެއެވެ.
ދައުލަތުގެ މީޑިއާ ޕީއެސްއެމްގައި އެއާ އެމްބިއުލާންސާއި ގުޅޭ ގޮތުން މިނިސްޓަރު ދެއްކެވި ވާހަކަ، ހަގީގަތާ ޚިލާފަށް ފަތުރަމުންދާތީ މިނިސްޓަރުވަނީ އެ ކަން ކުށްވެރިކުރައްވައިފައެވެ.
ޕީއެސްއެމްގައި ވާހަކަ ދައްކަވަމުން މިނިސްޓަރު ވިދާޅުވީ އެއާ އެމްބިއުލާންސްގެ ޚިދުމަތް ތައާރަފުކޮށް، އެ ޚިދުމަތް ފެށިފަހުން ބައެއް މަސްމަހުގައި އެއާ އެމްބިއުލާންސަށް އެއްވެސް ޑިމާންޑެއް ނޯންނަ ކަމަށެވެ.
ރާއްޖެއަކީ މާ މުއްސަނދި ގައުމެއް ނޫންކަން ފާހަގަކުރައްވައި މިނިސްޓަރު ވިދާޅުވީ ލިބިފައިވާ ވަސީލަތްތެއް ދޫކޮށްލުމުގެ އެއްވެސް ބޭނުމެއް ނޯންނާނެ ކަމަށެވެ.
އަމީން ވިދާޅުވީ ހެލްތް މިނިސްޓަރާއެކު ރައީސްގެ އަރިހުގައި އެ ވާހަކަ ދަންނަވާފައިވާނެ ކަމަށެވެ. އެ ގޮތުން މި ފަސް މަސް ދުވަހުގެ ރިކޯޑަށް ބެލުމަށް ފަހު، އިތުރު ޓްވިން އޮޓާ ބޯޓެއް އެއާ އެމްބިއުލާންސެއްގެ ގޮތުގައި ބޭއްވުމުގެ ބޭނުމެއް މި ގައުމުގައި އަދި ނެތްކަން މިނިސްޓަރު ފާހަގަ ކުރެއްވިއެވެ.
އެއީ ބޮޑު ވަސީލަތެއްގެ ބޭނުން އެކަށީގެންވާ ގޮތުގައި ނުހިފޭތީ ކަމަށް މިނިސްޓަރު ވިދާޅުވިއެވެ.
"...ޕަބްލިކަށް މިކަހަލަ ރިކުއަޔާމަންޓެއް ނެތިއްޖިއްޔާ އެ ބޯޓު އަނެއްކާ ވެސް ކުރިން އޮތް ގޮތަށް ކޮމާޝަލް އޮޕަރޭޝަންސްއަށް ބޭނުން ކުރުމުގެ އެއްވެސް، އަޅުގަނޑުމެން ޓެކްނިކަލް ނޫނިއްޔާ މި ކަންތައް ހިންގަން ތިބި ވަޒީރުންނަށް ފެންނަ ކަމަށް ވަންޏާ ގެންދިޔަޔަސް މައްސަލައެއް ނެތް ކަމަށް ރައީސް ވިދާޅުވީ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި އެ ގޮތަށް ނިންމެވީ ވެސް، އެއާ އެމްބިއުލާންސްގެ ދަތުރެއް ކުރަން ޖެހިއްޖެ ހާލަތުގައި، އެ ދުވަހެއްގެ ޝެޑިއުލުން މެޑިކަލް ޗާޓަރަށް އިސްކަންދޭ ގޮތަށެވެ.
މިނިސްޓަރު އިތުރަށް ވިދާޅުވީ ދިވެހި ރައްތިޔެއްގެ މެޑިކަލް ކަމެއްގައި ފްލައިޓެއް އޮޕަރޭޓް ކުރަން ޖެހިއްޖެ ހާލަތުގައި އެ ކަމަށް އެންމެ އިސްކަންދިނުމަށް ސަރުކާރުގެ ފަރާތުން ސޮއިކޮށް އެންގީ ވެސް ޚުދު އޭނާ ކަމަށެވެ.
އެހެން ނަމަވެސް މި ކަމުގެ ހަގީގަތް އޮޅޭގޮތަށް ސިޔާސީ ގޮތުން ވާހަކަ ދެކެވޭތީ، މިނިސްޓަރު ވަނީ އެ ކަމާ ނުރުހުން ފާޅު ކުރައްވައިފައެވެ.
އެއާ އެމްބިއުލާންސްގެ ޚިދުމަތް ސިއްޚީ ވުޒާރާއާ އާސަންދައާ އެންސްޕާ ގުޅިގެން ފަށައިފައި ވަނީ މިއަހަރުގެ މާޗް މަހުގެ އެއްވަނަ ދުވަހުގައެވެ. މި ޚިދުމަތް ފުޅާކޮށް ސީޕްލޭން މެދުވެރިކޮށް މި ޚިދުމަތް ދޭން ވަށާފައި ވަނީ އެ މަހުގެ 15ވަނަ ދުވަހުގައެވެ.
މިކަމަށް ބޭނުންކުރަމުންދާ ސީޕްލޭނަކީ ސަލާމަތީ ގޮތުން ރައްކާތެރި އަދި އިތުބާރު ކުރެވޭގޮތަށް ފަރުމާކޮށްފައިވާ ޑީއެޗްސީ-6ގެ ބޯޓެކެވެ.