އައިޖީއެމްއެޗުން ދޭ ޚިދުމަތްތަކުގެ ފެންވަރު ރަނގަޅުކުރެވޭނީ އެ އިމާރާތަށް ދިމާވެފައިވާ ޖާގައިގެ ދަތިކަން ހައްލުކޮށްގެން ކަމަށް މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މިއަދުގެ ބައްދަލުވުމުގައި އޭނާ ވިދާޅުވީ އައިޖީއެމްއެޗުގައި 32 ސްޕެޝަލިޓީ ޚިދުމަތް މިހާރު ވެސް ފޯރުކޮށްދެމުންދާ ކަމަށެވެ. އޭގެ ސަބަބުން ރާއްޖޭން ބޭރުން ޚިދުމަތް ހޯދާ މީހުންގެ އަދަދު ވަރަށް ބޮޑަށް މަދުވެފައިވާ ކަމަށް ހަލީމް ވިދާޅުވިއެވެ.
އިޖުތިމާއީ ކޮމިޓީ: މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ ވިދާޅުވީ އައިޖީއެމްއެޗްގެ ޚިދުމަތް ރަނގަޅުކުރެވޭނީ އެ ތަން ބޮޑޫކޮށްގެން ކަމަށް -- ފޮޓޯ/ މަޖިލިސް
އަދި އެ ޚިދުމަތްތައް ހަރުދަނާކޮށް، އިތުރު ޚިދުމަތްތައް ތައާރަފު ކުރުމަށް ވެސް ކޮންމެ ދުވަހަކު މަސައްކަތްތަކެއް ކުރަމުން އަންނަ ކަމަށް އޭނާ ވިދާޅުވިއެވެ. އެހެން ނަމަވެސް ހޮސްޕިޓަލުންދޭ ޚިދުމަތުގެ ފެންވަރުގެ ރަނގަޅު ކުރުމަށް ޓަކައި ދިމާވާ އެންމެ ބޮޑު ގޮންޖެހުމަކީ ޖާގައިގެ ދަތިކަން ކަން އޭނާ ވަނީ ފާހަގަ ކުރައްވައިފައެވެ.
"ހަގީގަތަކީ ހޮސްޕިޓަލް ތަރައްގީވެ، ހޮސްޕިޓަލުގެ ޑޮކްޓަރުން ތަރައްގީވެ، މުވައްޒަފުން އިތުރަށް ހޯދައި، ސްޕެޝަލައިޒްޑް ޚިދުމަތްތަކެއް ތަރާފު ކުރެިވިގެންދާއިރު، މި ކޮންމެ ޚިދުމަތަކާ އެކީގައި ޓާޝަރީ ފެންވަރުގެ ޚިދުމަތްދޭއިރު، އެޑްމިޓުކޮށްގެން ފަރުވާދޭއިރު، އެކަށީގެންވާ ގޮތެއްގައި އެނދު ނުލިބުމަކީދިމާވާ އެންމެ ބޮޑު ގޮންޖެހުން" ސީއީއޯ ވިދާޅުވިއެވެ.
އައިޖީއެމްއެޗަށް ޖާގަ އިތުރު ކުރުމަށް ޓަކައި، ދަރުމަވަންތަ ހޮސްޕިޓަލުގެ ގޯތި ތެރޭގައި ތަރައްގީ ކުރުމަށް ނިންމާފައިވާ ކެންސަރު ހޮސްޕިޓަލުގައި، ކެންސަރަށްދޭ ފަރުވާގެ އިތުރުން، ޕްރައިވެޓް ރޫމްތަކާއި ވޯޑުތައް ހިމަނަން ނިންމާފައިވާ ކަމަށް އޭނާ ވިދާޅުވިއެވެ.
މީގެ ކުރިން އައިޖީއެމްއެޗުގައި ގާއިމްކޮށްފައިވާ ފްލޫ ކްލިނިކެއް -- ފޮޓޯ: އައިޖީއެމްއެޗް
އަދި މުސްތަގުބަލުގައި އައިޖީއެމްއެޗް ގޯތި ދެ ބަޔަކަށް ބަހާލުމަށް ފަހު، މިހާރު އެ ހޮސްޕިޓަލުގެ ވޯޑުހުރި ސަރަހައްދުގައި އިތުރު ޓަވަރެއް ހެދުމަށް ފަހު ދަރުމަވަންތަ ހޮސްޕިޓަލާ ގުޅައިލުންމުގެ ވިސްނުން ގެންގުޅުއްވާކަމަށް އޭނާވަނީ ވިދާޅުވެފައެވެ.
އެ ތަން ނިމޭއިރު، އައިޖީއެމްއެޗް އަދި ދަރުމަވަންތަ ހިމެނޭ ގޮތަށް ޖުމްލަ 650 އެނދު އިތުރުކުރެވިގެންދާނެ ކަމަށް ހަލީމް ވިދާޅުވިއެވެ.
އައިޖީއެމްއެޗް ގާއިމްކޮށްފައިވަނީ 1995ގައެވެ. އެޑްމިޓުކޮށްގެން ފަރުވާދޭ 186 އެނދާ އެކުގައި އެ ހޮސްޕިޓަލު ހުޅުވިއިރު، އޭރު މާލެ ސަަަރަހައްދުގެ އާބާދީއަކީ 62،000 މީހުންނެވެ.
މިހާރު މާލެ ސަރަހައްދުގެ އާބާދީ ގާތްގަނޑަކަށް 215،000ގައި ހުރިއިރު، މި އަހަރާ ހަމައަށް މާލެ ސަރަހައްދުގެ ހުރިހާ ހޮސްޕިޓަލެއްގައި ވެސް 216 އެނދު ގާއިމް ކުރެވިފައިވެއެވެ.
އެހެން ނަމަވެސް އާބާދީއާ އަޅާބަލާއިރު، އެނދުގެ އަދަދު އެކަށީގެންވާ ގޮތެއްގައި އިތުރުކުރެވިފައި ނުވުމުގެ ސަބަބުން ސިއްޙީ ޚިދުމަތް ހޯދުމުގައި ދިމާވާތާ ދަތިތަކާ ގުޅިގެން ވަނީ ވަރަށް ބޮޑަށް ކަންބޮޑުވުން އުފެދިފައެވެ.