ސެމްސަންގް ގެލެކްސީ އޭ ސީރީޒް ފޯނުތަކާއި ގެލެކްސީ ޓެބް އެސް 9 އެފްއީ ސީރީޒަށް "ސާކަލް ޓު ސާޗް" ފީޗާ ތަޢާރަފުކޮށްފިއެވެ.
ސެމްސަންގުން ބުދަ ދުވަހު ހާމަކުރި ގޮތުގައި، ކުންފުނީގެ ބައެއް ގެލެކްސީ ސްމާޓްފޯނުތަކާއި ޓެބްލެޓްތަކަށް "ސާކަލް ޓު ސާޗް" ފީޗާ އަންނަނީ ތައާރަފުކުރަމުންނެވެ. މި ފީޗަރަކީ ސްކްރީނުގައި ހުންނަ ކޮންޓެންޓް މެދުވެރިކޮށް ކްއިކް ސާޗްކުރުމަށް ބޭނުންކުރެވޭ ފީޗަރެކެވެ.
މި ފީޗާ އެންމެ ފުރަތަމަ ތަޢާރަފުކޮށްފައިވަނީ ސެމްސަން ގެލެކްސީ އެސް 24 ސީރީޒް ސްމާޓްފޯނުތަކާއި ޕިކްސެލް 8 ލައިންއަޕްގައެވެ. އޭގެ ފަހުން، މި ފީޗާ ގެލެކްސީ އެސް ސީރީޒް، ގެލެކްސީ ޒެޑް ސީރީޒް އަދި ގޫގުލްގެ ކުރީގެ ޕިކްސެލް މޮޑެލްތަކަށް ވެސް ތަޢާރަފުކޮށްފައިވެއެވެ.
ދެކުނު ކޮރެއާގެ މި ކުންފުނިން ބުނެފައިވަނީ 2023 އަދި 2024 ގައި ނެރުނު މެދު ފަންތީގެ ސްމާޓްފޯނުތަކަށް މި ފީޗާ މިހާރު ލިބެން ހުންނާނެ ކަމަށެވެ.
ސެމްސަންގުން މަޢުލޫމާތު ދީފައިވާ ގޮތުގައި ބައެއް ގެލެކްސީ އޭ ސީރީޒް ސްމާޓްފޯނުތަކަށް "ސާކަލް ޓު ސާޗް" ފީޗާ އަޕްޑޭޓްކުރެވޭނެއެވެ. މި މަހުގެ ފަހުކޮޅު ގެލެކްސީ އޭ55، ގެލެކްސީ އޭ54، ގެލެކްސީ އޭ35 އަދި ގެލެކްސީ އޭ34 އަށް މި ފީޗާ ތަޢާރަފުކުރެވޭނެއެވެ. މި ފީޗާ ފޯނުތަކަށް އަޕްޑޭޓްކުރެވޭނީ ރިމޯޓްކޮށްތޯ ނުވަތަ ސޮފްޓްވެއާ އަޕްޑޭޓެއްގެ ޒަރީއާއިންތޯ މި ވަގުތު ސާފުވެފައެއް ނުވެއެވެ.
ގެލެކްސީ އޭ ސީރީޒް ފޯނުތަކަށް މި ފީޗާ ތަޢާރަފުކުރުމަށް ފަހު، ގެލެކްސީ ޓެބް އެސް 9 އެފްއީ އަދި ގެލެކްސީ ޓެބް އެސް 9 އެފްއީ+ އަށް ވެސް މި ފީޗާ ތަޢާރަފުކުރާނެ ކަމަށް އެ ކުންފުނިން ބުނެއެވެ.
ސެމްސަންގުން ބުނެފައިވާ ގޮތުގައި "ސާކަލް ޓު ސާޗް" ބޭނުންކޮށްގެން ސްކްރީނުގައި ހުންނަ އޮބްޖެކްޓްތަކާއި ޓެކްސްޓް ބަލައި ހޯދުމަށް ގެލެކްސީ އެސް ޕެން ވެސް ބޭނުންކުރެވޭނެވެ.
ސެމްސަންގުގެ މި އާދަޔާ ޚިލާފް ސާޗް ފީޗާ މެދުވެރިކޮށް ސާޗް ކުރާއިރު، ސްކްރީންގައިވާ ފޮޓޯއަކުން ފެންނަ އެއްޗެއްގެ ވަށައިގެން ބޮޅެއް އަޅާލުމުން ވަގުތުން ސާޗްކުރެވެން ފަށައެވެ.