އޯލެވެލްގެ ނަތީޖާ މިއަދު ދަރިވަރުންނަށް ދޫކުރަން ފަށާފައި ވާއިރު، ދަރިވަރުންނަށް ލިބުނު ނަތީޖާ ބަލަން ނުގުޅުމަށް ކުރީގެ ރައީސް އިބްރާހީމް މުހައްމަދު ޞާލިހްގެ އަނބިކަނބަލުން، ފަޒްނާ އަހުމަދު އިލްތިމާސް ކުރައްވައިފިއެވެ.
އެކަމަނާ ފޭސްބުކްގައި ކުރެއްވި ޕޯސްޓެއްގައި ވަނީ، ކުދިންގެ ނަތީޖާ ކިހިނެތްތޯ ބަލަން އެއް ބެލެނިވެރިއަކު އަނެއް ބެލެނިވެރިއަކަށް ގުޅުމަކީ، އިމްތިހާނުގެ ނަތީޖާ ލިބޭދުވަހު ނުކުރާންވީ ކަމެއްކަމަށެވެ.
ނަތީޖާ ހިއްސާކުރަން ބޭނުން މީހުން އެކަން ކުރާނެކަން ފާހަގަކުރައްވާ ފަޒްނާ ވިދާޅުވީ، އެ މީހުން ނަތީޖާ ކަރުދާސް ސޯޝަލް މީޑިއާގައި ހިއްސާ ވެސް ކުރާނެކަމަށެވެ.
ނަމަވެސް އެކަން އެހެން ކުރަން ބޭނުންނުވާ މީހުންގެ ނިންމުމަށް އިހުތިރާމު ކުރުމަށް ފަޒްނާ ވަނީ އިލްތިމާސް ކުރައްވާފައެވެ.
މީގެ އިތުރުން، ފަޒްނާ ވަނީ ރަނގަޅު ނަތީޖާއެއް ހާސިލްކުރި ކުދިންގެ އުފަލުގައި ބައިވެރިވެ، މަރުހަބާ ކިޔާފައެވެ. އަދި އުންމީދުކުރި ނަތީޖާ ނުލިބުނު ދަރިވަރުން އާ ހިތްވަރަކާއެކު މަސައްކަތް ފެށުމަށް ފަޒްނާ ވަނީ އެދިވަޑައިގެންފައެވެ.
ފަޒްނާގެ މި ވާހަކަތަކަށް ގިނަ ބަޔަކު ވަނީ އެއްބަސްވެފައެވެ. އަދި 212އަށްވުރެ ގިނަ މީހުން ވަނީ މި ޕޯސްޓު ޝެއާކޮށްފައެވެ.
މިއަދު އޯލެވެލް އިމްތިހާނުގެ ނަތީޖާ ދޫކުރަން ފަށާފައި ވާއިރު، މިއަހަރު 7000އަށްވުރެ ގިނަ ދަރިވަރުން ވަނީ މުޅި ރާއްޖެއިން އޯލެވެލް ހަދާފައެވެ.
އެޑިއުކޭޝަން މިނިސްޓްރީން ބުނީ މި އަހަރުގެ އޯލެވެލް އިމްތިހާނުގައި 7،501 ދަރިވަރުން ބައިވެރިވެރިވި ކަމަށެވެ. އަދި އިސްލާމާއި ދިވެހި މާއްދާ ހިމެނޭ އެސްއެސްސީ އިމްތިހާނުގައި 7،133 ދަރިވަރުން ބައިވެރިވި ކަމަށެވެ.