ބަންގްލަދޭޝްގެ ބޮޑުވަޒީރު ޝައިޚް ހަސީނާ މަގާމުން ދުރުކުރުމުގައި އެމެރިކާގެ އެއްވެސް ދައުރެއް ނޯންނާނެ ކަމަށް އެގައުމުން ބުނެފިއެވެ.
ބަންގްލަދޭޝްގައި ސަރުކާރާ ދެކޮޅަށް ކުރިއަށްގެންދިޔަ މުޒާހަރާތަކާ ގުޅިގެން ހަސީނާ އިސްތިއުފާ ދެއްވައި ގައުމުން ފިއްލެވީ މިމަހުގެ ފަހެއްގައެވެ.
އޭގެ ފަހުން ހަސީނާގެ އަވާމީ ލީގް ޕާޓީގެ މެންބަރުންގެ މެދުގައި، އެކަމަނާ ލިޔުއްވާފައިވާ ކަމަށް ބުނާ ސިޓީއެއް ދައުރުވެފައިވެއެވެ. އެ ސިޓީގައިވާ ގޮތުން ހަސީނާ އިސްތިއުފާ ދެއްވަން މަޖުބޫރުވި އެންމެ ބޮޑު އެއް ސަބަބަކީ ބޭ އޮފް ބެންގަލްގައި އޮންނަ، ބަންގްލަދޭޝްގެ ކުޑަ ރަށެއް ކަމަށްވާ ސެއިންޓް މާޓިން އައިލެންޑް އެމެރިކާއަށް ދޭން އެއްބަސްނުވުމެވެ.
އިންޑިއާގެ ނޫސްތަކުން ރިޕޯޓުކޮށްފައިވާ އެ ތުހުމަތާ ގުޅޭ ގޮތުން ވައިޓް ހައުސްގެ ތަރުޖަމާނު ކަރީން ޖީން-ޕިއޭރު ވިދާޅުވީ ހަސީނާގެ އިސްތިއުފާގައި އެމެރިކާގެ އެއްވެސް ދައުރެއް އޮތް ކަމަށް ބުނެ ދައްކާ ވާހަކަތަކަކީ ދޮގު ވާހަކަތައް ކަމަށެވެ.
އެ ސިޓީއާ ހަވާލާދީ ހަސީނާގެ ތުހުމަތުތަކެއް މީޑިއާތަކުގައި ރިޕޯޓުކޮށްފައިވީ ނަމަވެސް އެކަމަނާ އެ ފަދަ ތުހުމަތެއް ނުކުރައްވާ ކަމަށް އޭނާގެ ދަރިފުޅު ސަޖީބް ވާޒިދު އެކްސްގައި ކުރެއްވި ޕޯސްޓެއްގައި ވަނީ ވިދާޅުވެފައެވެ.
ހަސީނާ އިސްތިއުފާ ދެއްވުމާ ގުޅިގެން ބަންގްލަދޭޝްގައި ވަނީ ވަގުތީ ސަރުކާރެއް އެކުލަވައިލައިފައެވެ. ސަރުކާރު ހިންގެވުން ހަވާލުކޮށްފައި ވަނީ ނޮބެލް ސުލްހައިގެ އިނާމު ހާސިލުކުރައްވާފައިވާ މުޙައްމަދު ޔޫނުސްއާއެވެ.
ހަސީނާގެ ސަރުކާރާ ދެކޮޅަށް ކޮލެޖުތަކާއި ޔުނިވާސިޓީތަކުގެ އެތަކެއް ހާސް ދަރިވަރުން މުޒާހަރާ ކުރަން ފެށީ ސަރުކާރުގެ ވަޒީފާތަކަށް މީހުން އައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށެވެ. މުޒާހަރާތައް ހުއްޓުވަން ފުލުހުން ވަނީ ބާރުގެ ބޭނުން ކޮށްފައެވެ.
ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި 300އަށްވުރެ ގިނަ މީހުން މަރުވިއެވެ. އަދި، އެތަކެއް ހާސް ބަޔަކު ޒަޚަމުވިއެވެ. އޭގެ ތެރޭގައި ގިނައީ ދަރިވަރުންނެވެ.