ނިމިދިޔަ ދެ މަހު އަރިދަފުސް ރޯގާ ޖެހިގެން 60،000އަށް ވުރެ ގިނަ ކޭސް ރިޕޯޓްކޮށްފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭގެ ތަފާސްހިސާބުތަކުން ދައްކާގޮތުގައި، މިދިޔަ މަހު ޑެންގީ ޖެހިގެން ރިޕޯޓްކޮށްފައި ވަނީ 556 ކޭހެއް ކަމަށްވާއިރު، އެ ބަލި ޖެހިގެން ޖޫން މަހު ރިޕޯޓްކުރީ 798 މީހުންނެވެ.
އެހެން ބަލިތަކަށް ބަލާއިރު، މިދިޔަ މަހާއި ނިމުނު ޖޫން މަހުގެ ތެރޭގައި އަރިދަފުސް ރޯގާ ޖެހިގެން ރިޕޯޓްކުރި އަދަދު 60،000އަށް ވުރެ މައްޗަށް އަރައެވެ. އެގޮތުން، މިދިޔަ މަހު އެކަނި ވެސް އެބަލީގެ 30،293 ކޭސް ރިޕޯޓްކޮށްފައިވާއިރު، ޖޫން މަހު އެ ބަލި ޖެހުނީ 32،738 މީހުންނަށެވެ.
މީގެއިތުރުން، މި އަހަރުގެ ޖޫން މަހާ އަޅާބަލާއިރު މިދިޔަ މަހު އިންފުލުއެންޒާގެ އަލާމާތްތައް ހުރުގެން 439 މީހުން ވަނީ ޓެސްޓުކޮށްފައެވެ. ނަމަވެސް، ބައްޔަށް ޕޮޒިޓިވް ވީ 100 މީހުންނެވެ.
ބޭރަށް ހިންގުމުގެ ކޭސްތައް ވެސް މިދިޔަ މަހު ދަށްވެފައިވާ ކަމަށް ތަފާސްހިސާބުތަކުން ދައްކައެވެ. އެގޮތުން، މިދިޔަ މަހު އެޗްޕީއޭއަށް ބޭރަށް ހިންގުމުގެ 5053 ކޭސް ރިޕޯޓްކޮށްފައިވީ ނަމަވެސް، ޖޫންމަހު އެދަދު ހުރީ 5179ގައެވެ.
މިދުވަސްވަރަކީ މުޅި ރާއްޖެއަށް ވިއްސާރަ ކުރަމުންދާ ދުވަސްވަރަކަށް ވުމުން މަދިރީގެ ޒަރިއްޔާއިން ބަލިތައް ފެތުރުމުގެ ފުރުސަތު ވަރަށް ބޮޑެވެ. އެހެން ކަމުން މަދިރީގެ ސަބަބުން ޖެހޭ ބަލިތަކުން ސަލާމަތްވުމަށް އެންމެ މުހިންމު ކަމަކީ މަދިރި ހެފުމުން ރައްކާތެރިވުމެވެ.
މަދިރި ހެފުމުން ރައްކާތެރިވުމަށް، މަދިރި ލޯޝަން ބޭނުންކުރުމާއި މަދިރި ގިނަވާ ވަގުތުތަކުގައި ގޭގެ ދޮރުތައް ލައްޕާފައި ބެހެއްޓުމަކީ މުހިންމު ކަމެކެވެ.