ތުރުކީގެ ސަރުކާރުން އިންސްޓަގްރާމް މަނާކުރުމަށްފަހު އެ ޕްލެޓްފޯމް އަލުން ހުޅުވާލައިފިއެވެ.
ބްލޫމްބާގް އިން ރިޕޯޓުކުރި ގޮތުގައި، ސެންސަޝިޕް އަދި ކުށްތަކާ ގުޅޭ ކޮންޓެންޓްތަކާ ގުޅޭގޮތުން ތުރުކީގެ ސަރުކާރުން ހުށަހެޅި ޝަރުތުތަކަށް އިންސްޓަގްރާމުން އެއްބަސްވުމާ ގުޅިގެން މި ނިންމުން ނިންމާފައިވެއެވެ.
ތުރުކީގެ ޓްރާންސްޕޯޓް މިނިސްޓަރު އަބްދުލްކާދިރު އުރަލޯގުލު މި އެއްބަސްވުމުގެ ޚަބަރު އެކްސްގައި ޕޯސްޓްކުރެއްވިއެވެ.
އިންސްޓަގްރާމް މަނާކޮށްފައި އޮތީ އެންމެ ހަފްތާއެއްހާ ދުވަހުއެވެ. އޯގަސްޓް ދެވަނަ ދުވަހު ކުއްލިއަކަށް ތުރުކީގެ ޔޫޒަރުންނަށް އިންސްޓަގްރާމް ބްލޮކްވެފައިވާކަން ފާހަގަކުރެވުނެވެ.
ނަމަވެސް އެ ވަގުތު މި ނިންމުމާ ގުޅޭ ރަސްމީ އެއްވެސް މަޢުލޫމާތެއް ހިއްސާކޮށްފައެއް ނުވެއެވެ.
ދާދިފަހުން ޝަހީދުކޮށްލައިފައިވާ ހަމާސްގެ ލީޑަރު އިސްމާޢީލް ހަނިޔާއަށް ތަޢުޒިޔާ ފާޅުކުރި ޕޯސްޓްތައް ސެންސަރުކުރިކަމަށް އިންސްޓަގްރާމް ބްލޮކްކުރުމުގެ ކުރިން، ތުރުކީގެ މުވާސަލާތީ ވުޒާރާގެ އިސްވެރިޔާ ފަހްރެޓިން އަލްޓުން ތުހުމަތުކުރެއްވިއެވެ.
ހޮނިހިރު ދުވަހު އުރަލޯގުލު ކުރެއްވި ޕޯސްޓްގައި، ކެޓަލޮގް ކުށްތަކާ ގުޅޭ ކޮންޓެންޓްތަކާއި އިންސްޓަގްރާމް ބޭނުންކުރާ ފަރާތްތަކަށް ކުރިމަތިވާ ސެންސަރޝިޕްގެ މައްސަލަތަކަށް އިޝާރާތްކުރެއްވިއެވެ.
ރޮއިޓާސް އިން ބުނާ ގޮތުގައި ކެޓަލޮގް ކުށްތަކުގެ ތެރޭގައި މަރުގެ ކުށާއި، ޖިންސީ ގޯނާ އަދި މަސްތުވާތަކެތި ވިޔަފާރިކުރުމާއި އަނިޔާވެރިކަމުގެ ކުށްތައް ހިމެނެއެވެ.
މި މަހުގެ ކުރީކޮޅު ތުރުކީގައި އިންސްޓަގްރާމް ބްލޮކްކޮށްފައިވާކަން ފުރަތަމަ ރިޕޯޓުކުރި ނެޓްބްލޮކްސް އިން ވެސް ހޮނިހިރު ދުވަހު ކަށަވަރުކޮށްދީފައިވަނީ ތުރުކީގައި އިންސްޓަގްރާމް އަލުން ބޭނުންކުރެވެން ފަށާފައިވާ ކަމަށެވެ.