ފެނަކަ ކޯޕަރޭޝަން ލިމިޓެޑްގެ ބޯޑުގެ ޗެއާމަނާއި އެ ކުންފުނީގެ ބޯޑުގެ އިތުރު ދެ މެންބަރަކު އިއްޔެ މަގާމުން ވަކިކޮށްފިއެވެ.
މިކަން ފެނަކައިގެ މެނޭޖިން ޑިރެކްޓަރު މުއާޒް މުޙައްމަދު ރަޝީދު ވަނީ 'ސަން'އަށް ކަށަވަރުކޮށްދެއްވާފައެވެ. އެގޮތުން، އޭނާ ވިދާޅުވީ ފެނަކައިގެ ޗެއާމަންގެ މަގާމުގައި ހުންނެވި އަހުމަދު ޝަހީރުގެ އިތުރުން ބޯޑުގައި ހިމެނޭ ދެ މެންބަރުން ކަމަށްވާ އަހުމަދު އިހާބާއި އިބްރާހީމް ނާއިފް އިއްޔެ މަގާމުން ވަކިކޮށްފައިވާ ކަމަށެވެ.
އޭގެ އިތުރުން، އެ ފަރާތްތައް ވަކި ކުރި ކަމުގެ ސިޓީ އިއްޔެ ޕްރައިވެޓައިޒޭޝަން ބޯޑު (ޕީސީބީ)ން ފޮނުވާފައިވާ ކަމަށް މުއާޒް ވިދާޅުވިއެވެ. ނަމަވެސް، މަގާމުން ވަކިކޮށްފައިވާ ސަބަބެއް ހިއްސާނުކުރައްވައެވެ.
ޝަހީރަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2015ވަނަ އަހަރުން ފެށިގެން 2018ގައި ވެރިކަން ނިމުމާ ހަމައަށް އެސްޓީއޯގެ މެނޭޖިން ޑިރެކްޓަރުކަން ކުރައްވައިފައި ހުުންނެވި ބޭފުޅެކެވެ.
މި ނިންމުން ނިންމިއިރު ކުންފުނީގެ ހިންގުން ހަރުދަނާކުރުމަށް ވެސް ނިންމުންތަކެއް އެ ކުންފުނިން ވަނީ ނިންމައިފައެވެ.
އެގޮތުން ފެނަކައިގެ ކޮންސްޓްރަކްޝަން މަސައްކަތްތަކަށް ނަގާފައި ތިބި ވަގުތީ މުވައްޒަފުން ވަކިކުރަން ވެސް އެ ކުންފުނިން ވަނީ ނިންމާފައެވެ.