އޭޑީކޭ ހޮސްޕިޓަލުން ހިތުގެ ވޭލްވް ބަދަލުކޮށްފައިވާ ފަރާތްތަކަށް ޚާއްސަކޮށްގެން އެންޓިކޮއަގިއުލެންޓް ކާޑެއް އެ ހޮސްޕިޓަލުން ތަޢާރަފުކޮށްފިއެވެ.
ހިތުގެ ބައްޔަށް ފަރުވާ ކުރާ މީހުންނަށް ޚާއްސަކޮށްގެން އޭޑީކޭއިން މި ކާޑު ތައާރަފުކޮށްފައިވަނީ މި ވަނީ ރާއްޖޭގައި ހިތުގެ ސާޖަރީ ކުރަން ފެށިތާ ހަ އަހަރު ފުރުމާ ގުޅިގެންނެވެ.
އޭޑީކޭގެ މެނޭޖިން ޑިރެކްޓަރު އަޙްމަދު އަފްޢާލް ވިދާޅުވީ އެންޓިކޮއަގިއުލެންޓް ކާޑެއް ތައާރަފު ކުރުމުގެ ބޭނުމަކީ ހިތުގެ ވޭލެއް ބަދަލު ކުރުމުގެ ސާޖަރީ ހަދާފައި ތިބޭ މީހުންގެ ހަށިގަނޑުގައި އިންޓަނޭޝަނަލް ނޯމަލައިޒްޑް ރޭޝިއޯ (އައިއެންއާރު) ހުންނަންޖެހޭ ވަރަށް ނުހިފެހެއްޓި ހުންނަ ހުރުން ރަނގަޅު ކުރުން ކަމަށެވެ.
ހިތުގެ ވޭލެއް ބަދަލު ކުރެވިފައިވާ މީހުންނަށް ޚާއްސަކޮށްގެން އޭޑީކޭއިން ތައާރަފުކުރާ މި ކާޑުގައި، އެ މީހެއްގެ އައިއެންއާރުގެ މައުލޫމާތު ހުންނާނެ ކަމަށް އޭނާ ވިދާޅުވިއެވެ. އަދި މި ކާޑުގެ ސަބަބުން ސިއްޙީ ޚިދުމަތްތެރިންނަށް ބަލިމީހުންނާ މުއާމަލާތް ކުރުމުގައި ފަސޭހަތަކެއް ލިބިގެންދާނެ ކަމަށް އަފްޢާލް ވިދާޅުވިއެވެ.
އޭނާ ވިދާޅުވީ އޭޑީކޭގައި ހިތުގެ އޮޕަރޭޝަންތައް ކުރުމަށް ފަހު، އެ ހޮސްޕިޓަލުން ދެމުންގެންދާ ޚިދުމަތްތައް އިތުރަށް ފުޅާކޮށް، ކުރިއަރުވަމުން އަންނަ ކަމަށެވެ.
އެންޓިކޮއަގިއުލެންޓް ކާޑަކީ ބަލިމީހާގެ މައުލޫމާތާއި، ފަރުވާއާއި އެ މީހެއްގެ ޑޮކްޓަރާ ގުޅޭނެ މައުލޫމާތު ހިމެނޭ ކާޑެކެެވެ.
ރާއްޖޭގައި ހިތު ސާޖަރީ ކުރަން ފެށިތާ ހަ އަހަރު ފުރުމާ ގުޅިގެން އޭޑީކޭއިން މި ކާޑު ތަޢާރަފު ކުރިއިރު، ރާއްޖޭގައި ފުރަތަމަ ހިތުގެ ސާޖަރީއެއް ކާމިޔާބުކަމާ އެކު ނިންމައިލީ އޭޑީކޭއިންނެވެ.
ރާއްޖޭގައި ފުރަތަމަ ފަހަރަށް އޯޕަން ހާޓް ސާޖަރީއަކަށް ނުގޮސް ބަލިމީހެއްގެ ހިތުގެ ވޭލެއް ބަދަލުކޮށްފައިވަނީ ވެސް ހަމަ އެ ހޮސްޕިޓަލުންނެވެ.
އެ ހޮސްޕިޓަލުން ދަނީ ސިއްޙީ ދާއިރާގައި ބޮޑެތި ކުރިއެރުންތަކެއް ހޯދަމުންނެވެ.