މި ހަފުތާ ބުދަ ދުވަހު ރިލީޒް ކުރުމަށް ހަމަޖެހިފައިވާ ލޯބީގެ ބިރުވެރި ފިލްމު "ސާޔާ"ގެ ފައިނަލް ޓްރެއިލާ އާންމުކޮށްފިއެވެ.
ތަފާތު އެކި ޖޯންރާތަކުގެ ފިލްމުތަކުން ފެނުމުގެ އިތުރުން ފިލްމުތައް އުފެއްދުމުގައި ވެސް މަގުބޫލުކަން ހޯދާފައިވާ އެކްޓަރު އަދި ޑައިރެކްޓަރު ޔޫސުފް ޝަފީއު (ޔޫއްޕެ) އުފައްދާ މި ބިރުވެރި ފިލްމު އިއުލާނުކޮށްފައިވަނީ މިދިޔަ މަހުގެ ފަހުކޮޅުގައެވެ.
ޔޫއްޕެގެ ސްކްރީންޕްލޭއަކަށް އުފައްދާ މި ފިލްމުގެ ޑައިރެކްޝަންގެ މަސައްކަތް ވެސް ކުރާނީ އޭނާއެވެ. މި ފިލްމުގެ މުހިއްމު ރޯލަކުން ވެސް ޔޫއްޕެ ފެންނާނެއެވެ. މިހާރު ޕޯސްޓް ޕްރޮޑަކްޝަންގައި އޮތް ސާޔާގެ ޕްރޮޑަކްޝަންގެ މަސައްކަތް ކޮށްފައިވަނީ އިސްމާއިލް ޝަފީއެވެ.
ޔޫއްޕެގެ ޕްރޮޑަކްޝަން "ޝައި ޕްރޮޑަކްޝަން" އިން އާންމުކޮށްފައިވާ ފިލްމުގެ ފައިނަލް ޓްރެއިލަރުގައި ފިލްމުގެ އާ މަންޒަރުތަކެއް ވަނީ ދައްކާލާފައެވެ. ކުރީގެ ޓްރެއިލަރުގައި ތުރިލާގެ ރަހަތައް ގިނަ ނަމަވެސް މިފަހަރުގެ ތުރިލާއިން ބިރުވެރި ފިލްމުގެ ރަހަތައް ރަނގަޅަށް ވަނީ ދައްކާލާފައެވެ. ފަޅު ރަށެއްގެ ތެރެއިން ގޮތް ނޭނގޭ އަންހެނެއް ފެންނަ ހިސާބުން ކަންތައް ވެގެން ދާ ގޮތް ޓްރެއިލަރުން ފެނިގެންދެއެވެ.
ދަތުރެއްގެ ތެރެއިން ދިމާވާ ބިރުވެރިކަންތައް މި ފިލްމުގެ ޓްރެއިލަރުން ދައްކާލައެވެ.
ޔޫއްޕެއާއި ރަޝްފާގެ އިތުރުން ފިލްމުގެ އިތުރު ރޯލުން އިބްރާހީމް ޖިހާދު (ޖިމީ) ވެސް ފެނިގެންދާނެއެވެ.
ސާޔާއަކީ ޔޫއްޕެ އުފައްދާ ފުރަތަމަ ބިރުވެރި ފިލްމެއް ނޫނެވެ. މިދިޔަ އަހަރު މަޝްހޫރު ބަތަލާ ނިއުމާ މުހައްމަދާއެކު ވަނީ "ކަޅަކި" ނަމުގައި ވެސް ބިރުވެރި ފިލްމެއް ރިލީޒްކޮށްފައެވެ. އޭގެ އިތުރުން "އެ ދަތުރު"އާއި "ދައުވަތު" ފަދަ ފިލްމުތަކަކީ ވެސް ޔޫއްޕެގެ ބިރުވެރި ފިލްމުތަކެވެ.