އާސީޒަނާ ދިމާކޮށް ސްޕެނިޝް ލަލީގާގެ އެންމެ ވާދަވެރި ދެޓީމު ކަމުގައިވާ އެންމެ ފަހުގެ ޗެމްޕިއަން ރެއާލް މެޑްރިޑާއި އެފްސީ ބާސެލޯނާގެ މެދުގައި ކުޅުނު ފުރަތަމަ އެލް ކްލަސިކޯ މެޗު ބާސާއިން ކާމިޔާބު ކޮށްފިއެވެ.
އެމެރިކާއަށް މިހާރު ޕްރީ ސީޒަން ޓުއާ ކުރަމުންދާ މިދެޓީމު ބައްދަލުކޮށްފައިވަނީ ނިއުޖާޒީގެ މެޓްލައިފް ސްޓޭޑިއަމްގައެވެ. މިމެޗު ބާސާއިން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ދެޓީމުގެ ފަރާތުން ވެސް ފެނިގެންދިޔައީ ވަރަށް ހަމަހަމަ ކުޅުމެކެވެ.
މިގޮތުން އެންމެ އިންސައްތައަކުން ރެއާލް ގިނައިރު ބޯޅަ ގެންގުޅެފައިވާއިރު ހަމަލާ އުފެއްދިފައިވަނީ ދެޓީމަށް ވެސް ހަމަހަމަ ކޮށެވެ. މިމެޗު ފެށިތާ މާގިނަ އިރުތަކެއް ނުވެ މޫސުން ގޯސް ވުމުގެ ސަބަބުން 70 މިނެޓަށް މެޗު މެދު ކަނޑާލަން ޖެހުނެވެ. މިމެޗު ބާސާއިން ވަރުގަދަކޮށް ފެށި ނަމަވެސް މެޗު މެދުކަނޑާލުމަށްފަހު އަލުން ފެށުމާއެކު ދެން ފެނިގެންދިޔައީ ރެއާލް އިން ބޮޑަށް މެޗު ކޮންޓްރޯލް ކޮށްގެން ކުޅުނު ތަނެވެ.
ނަމަވެސް، ފުރަތަމަ ހާފު ނިމެން ގާތްވެފައިވަނިކޮށް ބާސާއިން ވަނީ އަނެއްކާވެސް އެޓީމުގެ ކުޅުން ރަނގަޅުކޮށް ރެއާލްއަށް ނުރައްކާ ކުރަން ފަށައިފައެވެ. މިގޮތުން މިމެޗުގެ ފުރަތަމަ ލަނޑު ބާސާއިން ޖަހާ ލީޑު ނަގައިފައިވަނީ ފުރަތަމަ ހާފު ނިމެން ތިން މިނެޓަށް ވެފައިވަނިކޮށެވެ.
ބާސާގެ އެލެކްސް ވާލޭ ވަރަށް ބަލާލާފައި ރެއާލް ކުރިމައްޗަށް ނަގައިދިން ހުރަސް އެޓީމުގެ ތަޖްރިބާކާރު ފޯވަޑް ރޮބަޓް ލެވަންޑޯސްކީ ގޯލަށް ވައްދާލުމުގެ ބަދަލުގައި ފެނިގެންދިޔައީ ކައިރީގައި ހުސްކޮށް އޮތް ޕައު ވިކްޓާއަށް ބޯޅަ ޖައްސާލިތަނެވެ. އަދި މިއާއެކު ޕައު ވިކްޓާ ބާސާގެ ފުރަތަމަ ލަނޑު ކާމިޔާބު ކޮށްދިނެވެ.
މޫސުން ގޯސްވުމުގެ ސަބަބުން ގިނަ އިރުތަކެއް ވަންދެން ކުޅުން މެދު ކަނޑާލަން ޖެހުމުން މިމެޗުގެ ހާފް ޓައިމަށް 15 މިނެޓް ނެގުމުގެ ބަދަލުގައި ދެޓީމުން ވެސް ބެލީ ވަގުތުން ދެވަނަ ހާފު ފެށޭތޯއެވެ. މިގޮތުން ފުރަތަމަ ހާފު ނިމުނު ތާ އެއް މިނެޓްފަހުން ދެވަނަ ހާފުގެ ކުޅުން ފެށިތަން ފެނިގެންދިޔައެވެ.
މިހާފުގެ ވެސް ކުރީކޮޅު މޮޅަށް ކުޅެފައިވަނީ ބާސާއިންނެވެ. ނަތީޖާއަކަށް ވެގެންދިޔައީ މެޗުގެ 54ވަނަ މިނެޓުގައި ވާލޭ ނަގައިދިން ހުރަހަކުން ޕައު ވިކްޓާ ބާސާގެ ލީޑު ފުޅާކޮށްދިނުމެވެ.
މިމެޗުގައި ރެއާލް އިން ކާމިޔާބު ކުރި ހަމައެކަނި ލަނޑު މެޗުގެ 82ވަނަ މިނެޓުގައި އެޓީމަށް ކާމިޔާބު ކޮށްދިނީ ބަދަލު ކުޅުންތެރިޔާ ނީކޯ ޕާޒްއެވެ. މިލަނޑާއެކު އިތުރު ލަނޑެއް ޖަހާ މެޗުގެ ނަތީޖާ ހަމަހަމަ ކުރެވޭތޯ ރެއާލްއިން މަސައްކަތް ކުރި ނަމަވެސް މެޗު ނިމިގެންދިޔައީ ނަތީޖާ މިގޮތުގައި އޮވެގެންނެވެ. މިއާއެކު ބާސާއިން މިވަނީ ޖެހިޖެހިގެން ހަތަރު ވަނަ ފަހަރަށް އެމެރިކާގެ ފަސްގަނޑުގައި ރެއާލް ބަލިކޮށްފައެވެ.