މޯލްޑިވްސް ސެންޓާ ފޯ ޕޮލިސީ ސްޓަޑީސް (އެމްސީޕީއެސް)އިން ރާއްޖޭގެ ފޮރިން ޕޮލިސީ ހިމެނޭހެން ހަތަރު ދާއިރާއަކަށް ޢިލްމީ ދިރާސާތަކެއް މިއަހަރު ކުރުމަށް ނިންމައިފިއެވެ.
އެމްސީޕީއެސްއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެމްސީޕީއެސްގެ ބޯޑުގައި ހިމެނިވަޑައިގަންނަވާ ކުރީގެ ބަންޑާރަނައިބު އާޒިމާ ޝަކޫރު ވިދާޅުވީ، މިއަހަރު އެމްސީޕީއެސްއިން ދިރާސާ ކުރަން ނިންމާފައިވާ ދާއިރާތަކުގެ ތެރޭގައި، ރާއްޖޭގެ ތައުލީމީ ދައިރާ، ފޮރިން ޕޮލިސީ، އާބާދީ ބެހިފައި ވާގޮތް އަދި މިންތީގެ ހަމަހަމަކަން އެކުލަވާލުން ހިމެނޭ ކަމަށެވެ.
އެމްސީޕީއެސްގެ މުއައްސިސުންގެ ތެރޭގައި ހިމެނިވަޑައިގަންނަވާ ކުރީގެ ރައީސް ޑރ. މުޙައްމަދު ވަހީދު ހަސަން ވިދާޅުވީ ކޮންމެ މުޖުތަމައެއްގައި ވެސް ކިޔަވައިގެން ތިބި އިލްމުވެރި ތަޖުރިބާކާރުންގެ މަސްއޫލިއްޔަތު ވަރަށް ބޮޑު ކަމަށެވެ. އެގޮތުން ކޮންމެ ގައުމެއްގެ ވެސް ރައުސުލްމާލުގެ ބޮޑު ބައެއް ޚަރަދު ކުރަނީ އުނގަންނައިދޭން ކަމަށްވާއިރު، މުޖުތަމައުގައި ހިނގާ ކަންކަމުގައި ބައިވެރިވުމަކީ ކިޔަވައިގެން ތިބި މީހުންގެ މަސްއޫލިއްޔަތެއް ކަމަށް އެ މަނިކުފާނު ވިދާޅުވިއެވެ.
"ޚާއްސަކޮށް މުޖުތަމައުގައި އިޖުތިމާއީ އަދާލަތު ކުރިއެރުވުމަށް ޓަކައި، އެންމެންގެ މެދުގައި ހަމަހަމަކަން ހިފެހެއްޓުމަށްޓަކައި ކުރަން ޖެހޭ މަސައްކަތްތައް ކުރުމަކީ އެއީ ކިޔަވައިގެން ތިބި މީހުންގެ ކޮނޑުގައި އެޅިފައިވާ ވަރަށް ވެސް ބޮޑު މަސްއޫލިއްޔަތެއް. ގައުމަށް ހެޔޮ ބަދަލެއް ގެނައުމަށްޓަކައި ކިޔަވައިގެން ތިބި އިލްމުވެރި ތަޖުރިބާކާރު މީހުން އަބަދުވެސް މަސައްކަތް ކުރަން ޖެހޭނެ،" ޑރ. ވަހީދު ވިދާޅުވިއެވެ.
އެ މަނިކުފާނު ވިދާޅުވީ އެމްސީޕީއެސް އުފެއްދުމުގެ މަގުސަދަކީ ރާއްޖޭގެ ގައުމީ ތަރައްގީއަށް އަސަރު ކުރާނެ ބައިނަލްއަގުވާމީ އަދި ގައުމީ ފެންވަރުގެ ސިޔާސަތުތަކާއި މައްސަލަތަކާ ބެހޭގޮތުން އެ މަރުކަޒުން އަމިއްލައަށް އިސްނަގައިގެން އިލްމީ އަދި ފަންނީ ދިރާސާތައް ކުރުން ކަމަށެވެ.
"އެކަންކަމުން (އަމާޒަކީ) ގައުމީ ތަރައްގީއަށް ބޭނުންވާނެ ސިޔާސަތު ކަނޑައެޅުމަށް އެހީތެރިވުން އަދި ތަފާސްހިސާބާއި ހެއްކަށް ބިނާވެ، ކަނޑައެޅޭ ސިޔާސަތަށް އެހީތެރިވެދޭނެ ޕްލެޓްފޯމެއް ގާއިމުކުރުން،" ޑރ. ވަހީދު ވިދާޅުވިއެވެ.
މީގެ އިތުރުން ގައުމީ މަސްލަހަތު ހިމެނޭ ކަންކަމުގައި އިލްމީ ދިރާސާތަކާއި ފަންނީ ލަފާ އަދި ބޭނުންތެރި ސައްހަ މައުލޫމާތު ކިޔަވާ ކުދިންނަށާއި ނޫސްވެރިންނަށާއި ދައުލަތުގެ މުއައްސަސާތަކާއި މިފަދަ ކަންކަމަށް ޝައުގު ހުންނަ ހުރިހާ ދިވެހިންނާއި ބޭރުގެ ފަރާތްތަކަށް ފޯރުކޮށްދިނުމަކީ ސެންޓަރުގެ މަގުސަދެއްކަން އެ މަނިކުފާނު ފާހަގަކުރެއްވިއެވެ.
ރާއްޖޭގައި ތިބި، ތަފާތު ދާއިރާތަކުން އިލްމު ހާސިލްކުރައްވާފައިވާ މީހުން މި މަސައްކަތުގައު ބައިވެރިވާނެ ކަމަށް އުއްމީދު ކުރައްވާ ކަމަށް ވެސް ޑރ. ވަހީދު ވިދާޅުވިއެވެ.
އެމްސީޕީއެސް އުފެދިގެން އައިގޮތަށް އަލިއަޅުވާލާ ޑރ. ވަހީދު ވިދާޅުވީ، މިއީ ވަރަށް ކުރިން ފެށިގެން ކުރުމަށް ވިސްނަމުންއައި މަސައްކަތެއް ކަމަށެވެ. އެގޮތުން ދައުލަތުގެ އެކި މަގާމުތަކުގައި ތިއްބެވި އިރުވެސް ރާއްޖޭގެ ބޭރުގައި ހުންނަ މިބާވަތުގެ މަރުކަޒުތަކުގެ ބޭފުޅުންނާ މުއާމަލާތުކުރަން ޖެހޭކަމަށް ޑރ. ވަހީދު ވިދާޅުވިއެވެ.
"އެކަމު އޭރު އަޅުގަނޑުމެން މުއާމަލާތުކުރަމުން ގެންދަނީ ދައުލަތުގެ މުވައްޒަފެއްގެ ގޮތުގައި. އިލްމީ ފެންވަރެއްގައެއް ނޫން. އެހެންވީމައި މިހާރު އަޅުގަނޑުމެން މި ކުރާ މަސައްކަތަކީ އިލްމީ ފެންވަރެއްގައި އެތަންތަނުގައި ތިއްބަވާ ބޭފުޅުންނާ މުއާމަލާތުކޮށް، ބައިނަލްއަގްވާމީ މައްސަލަތަކާއި ގައުމީ މައްސަލަތަކުގައި ވެސް ޚިޔާލު ބަދަލުކޮށް ދިރާސާކުރުމުގެ ފުރުސަތު ހޯދުން،" އެމަނިކުފާނު ވިދާޅުވިއެވެ.