އީރާނުގައި ހުންނަވަނިކޮށް ޝަހީދުކޮށްލައިފައިވާ ހަމާސް ޖަމާއަތުގެ ސިޔާސީ ގޮފީގެ އިސް ވެރިޔާ އިސްމާއީލު ހަނިއްޔާގެ މައްޗަށް ޣައިބަށް ކަށުނަމާދުކޮށް ހުކުރު ޚުތުބާގައި ހަނިއްޔާއަށް ތައުރީފުކޮށް ވާހަކަދެއްކެވި އަލް އަޤްޞާ މިސްކިތުގެ އިމާމު ޝައިޚް އިކްރިމާ ސަބްރީ ހައްޔަރުކޮށްފިއެވެ.
އިސްރާއީލު ސިފައިން ސަބްރީ ހައްޔަރުކޮށްފައި ވަނީ އިއްޔެ މެންދުރުފަހުގެ ވަގުތެއްގައެވެ.
ސަބްރީގެ އާއިލާގެ ގާތް މީހަކާ ހަވާލާދީ މިޑްލް އީސްޓް މޮނިޓާއިން ބުނީ އިސްރާއީލުން ސަބްރީ ހައްޔަރުކޮށްފައި ވަނީ އަލް ސުވާނާ އަވަށުގައި ހުންނަ، ސަބްރީގެ ދިރިއުޅުއްވާ ގެއަށް ގަދަކަމުން ވަދެކަމަށެވެ.
ހައްޔަރު ކުރުމުގެ ކުރިން ޝެއިޚް ސަބްރީ، އަލް އަރަބީ އަލް ޖާދީދަށް މައުލޫމާތު ދެއްވަމުން ވިދާޅުވީ، އިސްރާއީލުގެ ދާޚިލީ ވަޒީރު އިޓަމާރު ބެން-ގްވީރާއި ނޭޝަނަލް ސެކިއުރިޓީ މިނިސްޓަރު މޯޝޭ އާބެލް އިސްކޮށް ހުރެގެން އޭނާއާ ދެކޮޅަށް ކުރާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށެވެ.
އުމުރުން 85 އަހަރުގެ ސަބްރީ ވަނީ މީގެ ކުރިން އިސްރާއީލުގެ ސިފައިން ބެލުމުގެ ދަށަށް އެތައް ފަހަރަކު ގެންގޮސްފައެވެ. އަދި އިރުމަތީ ގުދުސްގައި ހުންނަ އަލް އަޤްޞާ މިސްކިތަށް ވަނުން އެތައް މަހެއް ވަންދެން މަނާކޮށްފައިވެސް އޮތެވެ.
ސަބްރީ އަކީ އިސްރާއީލުން ފަލަސްތީނުގެ ސަރަހައްދުތައް ހިފުމަށް ވަރަށް ބޮޑަށް ފާޑުކިޔުއްވާ ބޭފުޅެކެވެ. އޭނާ ވަނީ 1994އިން 2006 އަށް ޤުދުސްއާއި ފަލަސްތީނު ސަރަހައްދުތަކުގެ މުފްތީގެ މަގާމުވެސް ފުރުއްވައިފައެވެ.