އީރާނުގައި ހުންނަވަނިކޮށް މިދިޔަ ބުދަ ދުވަހު ޝަހީދުކޮށްލި ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތުގެ ސިޔާސީ ގޮފީގެ ވެރިޔާ އިސްމާއީލް ހަނިއްޔާގެ ތައުޒިޔާގެ ޕޯސްޓްތަކަށް ހުރަސްއަޅާތީ ކަމަށްބުނެ ތުރުކީން އިންސްޓަގްރާމް ބްލޮކްކޮށްފިއެވެ.
ތުރުކީގެ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީސް އޮތޯރިޓީ (ޓީކޭއެމް)އިން އިއްޔެއިން ފެށިގެން ވަނީ އެގައުމުގައި އިންސްޓަގްރާމަށް ނުވަދެވޭގޮތަށް އިންސްޓަގްރާމް ބްލޮކްކޮށްފައެވެ.
ތުރުކީން އެޅި މި ފިޔަވަޅަށް އިޝާރާތް ކުރައްވާ އެ ޤައުމުގެ ކޮމިއުނިކޭޝަންސް ޑިރެކްޓަރު ފަހްރެޓިން އަލްޓުން ވަނީ އިންއިންސްޓަގްރާމަށް ފާޑު ވިދާޅުވެފައެވެ. އެގޮތުން، އޭނާ އެކްސްގައި ކުރި ޕޯސްޓެއްގައި ވަނީ އިންސްޓަގްރާމުން ހަމާސްގެ ލީޑަރު ހަނިއްޔާ އަވަހާރަވުމާ ގުޅިގެން ތައުޒިޔާގެ މެސެޖުތައް ޕޯސްޓްކުރުން އިންސްޓަގްރާމުން ހުއްޓުވާފައި ވާކަމަށެވެ.
އެކްސްގައި ކުރެއްވި ޕޯސްޓެއްގައި ތުރުކީގެ އިންފޮމޭޝަން ޑިރެކްޓަރު ވިދާޅުވީ މިއީ ސާފު ސެންސާޝިޕެއް ކަމަށެވެ. އެއްވެސް ޕޮލިސީއަކާ އިންސްޓާގްރާމް ޚިލާފުވި ކަމެއް އޭނާ ވިދާޅެއް ނުވެއެވެ.
"ގްލޯބަލް އެކްސްޕްލޮއިޓޭޓިވް ނިޒާމުގެ ޚިދުމަތުގައި ހުންނަ މި ޕްލެޓްފޯމްތަކާ ދެކޮޅަށް އަޅުގަނޑުމެން ވާހަކަ ދެއްކުމުގެ މިނިވަންކަން ދިފާއުކުރާނަން،" އޭނާގެ އެކްސް ޕޯސްޓްގައި އިތުރަށް ވިދާޅުވެފައިވެއެވެ.
ހަނިއްޔާ އަވަހާރަކޮށްލީ ބުދަ ދުވަހު އީރާނުގެ ވެރިރަށް ތެހްރާންގައެވެ. ހަމާސްއާއި އީރާނުން މި މަރުގެ ޒިންމާ އަޅުވާފައިވަނީ އިސްރާއީލުގެ ބޮލުގައެވެ. އަދި ޓެލް އަވީވުން ވެސް މިކަމުގެ ޒިންމާ ވަނީ ނަގާފައެވެ.