ފަރަންސޭސިވިލާތުގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ ޓެނިހުގެ ފިރިހެން ސިންގަލްސް އިވެންޓްގެ ކުއާޓާ ފައިނަލުން ސްޕެއިންގެ ކާލޯސް އަލްކަރާޒް ޖާގަހޯދައިފިއެވެ.
މިމުބާރާތުގެ ކުއާޓާ ފައިނަލްއިން އަލްކަރާޒް ޖާގަ ހޯދާފައިވަނީ އަމިއްލަ ގޮތުން ބައިވެރިވެފައިވާ ރަޝިއާގެ ކުޅުންތެރިއެއް ކަމަށްވާ ރޯމަން ސަފިއުލިންއާ ބައްދަލުކުރި މެޗު ސީދާ ދެސެޓުން ކާމިޔާބު ކޮށްގެންނެވެ. އެއީ ހައެއް ހަތަރެއް އަދި ހައެއް ދެއަކުން މެޗު ކާމިޔާބު ކޮށްގެންނެވެ.
ސިންގަލްސްގައި އަލްކަރާޒްއަށް ކާމިޔާބު ލިބުނު ނަމަވެސް ފިރިހެން ޑަބަލްސްގައި އޭނާ އާއި ރަފައެލް ނަޑާލްވަނީ ކުއާޓަ ފައިނަލްގައި އެމެރިކާގެ އޮސްޓިން ކްރައިޗެކް އާއި ރަޖީވް ރާމްއާ ބައްދަލުކުރި މެޗުން ހައެއް ދެއެއް އަދި ހައެއް ހަތަރަކުން ބަލިވެފައެވެ.
ފިރިހެން ސިންގަލްސް އިވެންޓްގެ ކުއާޓާ ފައިނަލްއިން ވަނީ ސާބިއާގެ ނޯވަކް ޖޯކޮވިޗްވެސް ޖާގަހޯދައިފައެވެ. އޭނާ ކުއާޓާ ފައިނަލްއިން ޖާގަހޯދާފައިވަނީ ޖަރުމަނުވިލާތުގެ ޑޮމިނިކް ކޮއެފާއާ ބައްދަލުކުރި މެޗު ސީދާ ދެސެޓުން ކާމިޔާބު ކޮށްގެންނެވެ. އެއީ ހަތެއް ފަހެއް އަދި ހައެއް ތިނަކުންނެވެ.
މީގެ އިތުރުން ޖަރުމަނުވިލާތުގެ އެލެގްޒެންޑާ ޒުވަރޭވްވަނީ އޮސްޓްރޭލިއާގެ އެލެކްސީ ޕޮޕިރިންއާ ބައްދަލުކުރި މެޗު ކާމިޔާބުކޮށް ކުއާޓާ ފައިނަލްގެ ޖާގައެއް ކަަށަވަރުކޮށްފައެވެ. މިތިން ކުލުންތެރިންގެ އިތުރުން ކުއާޓާ ފައިނަލްއިން ޖާގަހޯދާފައިވާ އެހެން ކުޅުންތެރިންނަކީ ގްރީސްގެ ސްޓެފަނޯސް ސިޓްސިޕާސް، ކެނެޑާގެ ފީލިކްސް އައުގާ އެލީއަސީމް، އިޓަލީވިލާތުގެ ލޮރެންޒޯ މުސޭޓީ، ނޯވޭގެ ކެސްޕާ ރޫޑް އަދި އެމެރިކާގެ ޓޮމީ ޕޯލްއެވެ.
އަންހެން ސިންގަލްސް އިވެންޓަށް ބަލައިލާއިރު ޕޯލަންޑްގެ އީގާ ޝްވާޓެކްވަނީ ސެމީފައިނަލްގެ ޖާގައެއް ކަށަވަރު ކޮށްފައެވެ. އޭނާ ސެމީފައިނަލްއިން ޖާގަހޯދީ ކުއާޓާ ފައިނަލްގައި އެމެރިކާގެ ޑެނީލް ކޮލިންސްއާ ބައްދަލުކުރި މެޗު އެއް ސެޓު އެއް ސެޓުން ދެ ކުޅުންތެރިން އެއްވަރުވެ ތިންވަނަ ސެޓުގައި ހަތަރެއް އެކަކުން ޝްވާޓެކް ކުރީގައި އޮއްވައި ކޮލިންސްއަށް އަނިޔާވެގެން މެޗު ހުއްޓާލަން ޖެހުމުންނެވެ.
މިމެޗުގެ ފުރަތަމަ ސެޓު ހައެއް އެކަކުން ޝްވާޓެކް ކާމިޔާބު ކުރި ނަމަވެސް ދެވަނަ ސެޓު ކޮލިންސްވަނީ ދެެއެއް ހަޔަކުން ކާމިޔާބު ކޮށްފައެވެ.