ވެނެޒުއޭލާގެ ރައީސް ނިކޮލަސް މަޑޫރޯ ވެރިކަމުގެ ތިން ވަނަ ދައުރަކަށް އިންތިޚާބުވެވަޑައިގެންފިއެވެ.
ވެނެޒުއޭލާގެ ނޭޝަނަލް އިލެކްޓޯރަލް ކައުންސިލްގެ އިސްވެރިޔާ އެލްވިސް އަމޮރޯސޯ ވިދާޅުވި ގޮތުގައި އިއްޔެ ބޭއްވި އިންތިޚާބުން މަޑޫރޯއަށް ވަނީ 51 އިންސައްތަ ވޯޓު ލިބިވަޑައިގެންފައެވެ.
އޭނާ ވިދާޅުވީ 80 ޕަސެންޓް ވޯޓު ގުނައިފައިވާއިރު، އިދިކޮޅު ކެންޑިޑޭޓް އެޑްމަންޑީ ގޮންޒާލެޒްއަށް ލިބިވަޑައިގަތީ 44 އިންސައްތަ ވޯޓު ކަމަށެވެ.
ނަމަވެސް އެ ނަތީޖާއަކީ އެކްޒިޓް ޕޯލްތަކުން ދެއްކި ނަތީޖާއާ ފުށުއަރާ ނަތީޖާއެކެވެ. އެގްޒިޓް ޕޯލްތަކުން ދެއްކި ގޮތުގައި އިންތިޚާބު ކާމިޔާބު ކުރައްވާނީ އިދިކޮޅު ކެންޑިޑޭޓް ގޮންޒާލޭޒްއެވެ.
އިދިކޮޅު ޕާޓީތަކުގެ ކޯލިޝަނުން ގޮންޒާލޭޒް ވާދަކުރެއްވީ، އިދިކޮޅު މައި ލީޑަރު މާރިއާ ކޮރީނާ މަޗާޑޯ އިންތިޚާބުގައި ވާދަކުރުން މަނާކުރުމުންނެވެ. މި އިންތިޚާބުގައި އިދިކޮޅަށް ކާމިޔާބު ލިބުނުނަމަ، ވެނުޒުއޭލާގައި އޮތް 25 އަހަރުގެ ސޯޝަލިސްޓް ވެރިކަން ނިމުމަކަށް އަންނާނެ ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
ދެހާސް ތޭރަ ވަނަ އަހަރުން ފެށިގެން ވެނުޒެއޭލާގެ ވެރިކަން ކުރަމުން ގެންދަވާ މަޑޫރޯ ސިޔާސީ މައިދާނަށް ނުކުމެވަޑައިގަތުމުގެ ކުރިން މަސައްކަތްކުރެއްވީ ބަސް ޑްރައިވަރެއްގެ ގޮތުގައެވެ.
އޭގެފަހުން އެ ގައުމުގެ ވިޔަފާރިވެރިންގެ ޖަމުއިއްޔާގެ ލީޑަރުކަން ކުރައްވައި، ސިޔާސީ މައިދާނަށް ނުކުންނެވީ 2000 ވަނަ އަހަރެވެ. މަޑޫރޯ ވަނީ އޭރުގެ ރައީސް ހޫގޯ ޗާވޭޒްގެ ވެރިކަމުގެ ސަރުކާރުގެ އިސް މަގާމުތަކެއް ފުރުއްވައިފައެވެ.
ދެހާސް ތޭރަ ވަނަ އަހަރު މަޑޫރޯ ވެރިކަމަށް އަރައިވަޑައިގަތީ 50.62 އިންސައްތަ ވޯޓު ހޯއްދަވައިގެންނެވެ.
ނަވާރަސަތޭކަ ފަންސާހުގެ އަހަރުތަކުގައި ވަރަށް މުއްސަނދި ގައުމެއް ކަމަށްވާ ވެނެޒުއެލާ ވަނީ ފާއިތުވި އަހަރުތަކުގައި އިގްތިސާތީ ގޮތުން ވަރަށް ބޮޑަށް އިނދަޖެހި ފަގީރުވެފައެވެ. ހައިޕާއިންފްލޭޝަން ނުވަތަ އަތް ނުފޯރާ ފަށަށް ތަކެތީގެ އަގު އުފުލި، ފައިސާގެ އަގު ވެއްޓި އާންމުންގެ ދިރިއުޅަމަށް ވަރަށް ބޮޑަށް އަސަރުކޮށްފައިވާއިރު، އެ ގައުމުގެ ގާތްގަޑަކަށް ތިން ބައިކުޅަ އެއްބައި މީހުން ވަނީ ގައުމު ދޫކޮށްފަ ގޮސްފައެވެ.
މީގެ އިތުރުން ހުޅަނގުގެ ދަތިކުރުމުގެ ފިޔަވަޅުތަކުގެ ސަބަބުން އެގައުމުގެ ތެލުގެ ސިނާއަތަށް އިތުރު ގެއްލުންތަކެއް ވަނީ ލިބިފައެވެ.
އެކަމާ ގުޅިގެން މަޑޫރޯގެ މަގުބޫލުކަން ދަށްވެ، 2014 ވަނަ އަހަރުން ފެށިގެން އަ ގައުމުގައި އަންނަނީ މުޒާހަރާތައް ކުރަމުންނެވެ.