ގަވާއިދާ ޚިލާފަށް ކޯސްތައް ހިންގާތީ ކްލިކް ކޮލެޖާއި އެވިޑް ކޮލެޖަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން މިއަދު ފިޔަވަޅު އަޅައިފިއެވެ.
މި ދެ ކޮލެޖަށް އެމްކިއުއޭއިން ފިޔަވަޅު އަޅާފައިވަނީ އެ ކޮލެޖުތަކުން ހިންގާ ކޯސްތަކާ މެދު، އެ އޮތޯރެޓީއަށް ހުށަހެޅުނު މައްސަލައަކާ ގުޅިގެން ހުށައަޅާފައިވާ ޝަކުވާތައް ބެލުމަށް ފަހު ޕްރޮގްރާމް އެކްރެޑިޓޭޝަން ގަވާއިދުގެ ދަށުންނެވެ.
މި ދެ ކޮލެޖަށް އެޅި ފިޔަވަޅުތަކުގެ ތަފުސީލު މިއަދު ސަރުކާރުގެ ގެޒެޓުގައި ޝާއިއުކޮށްފައިވާއިރު އެވިޑް ކޮލެޖާ ބެހޭ ގޮތުން ހިމަނާފައިވާ މައިގަނޑު ޝަކުވާއަކީ ލެކްޗަރާއިންނަށް ދޭންޖެހޭ މުސާރަ ނުދޭތީ ދަރިވަރުންގެ އިމްތިހާން ކަރުދާސްތައް ބައެއް ލެކްޗަރާއިން މާކު ނުކުރުމުގެ ޝަކުވާއެވެ. އަދި އޭގެ ސަބަބުން ޕްރޮގްރާމްތަކުގެ މުއްދަތު އިތުރުވެ، ދަރިވަރުންނަށް ކޯސްތަކަށް އިތުރަށް ފައިސާ ދައްކަން ޖެހުމުގެ ޝަކުވާއެވެ.
އެމްކިއުއޭއިން ވަނީ އެވިޑް ކޮލެޖަށް ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ ޚިލާފަށް އަދި ޕްރޮގްރާމް އެކްރެޑިޓޭޝަނާ ޚިލާފަށް ހިންގާ ކަންކަން ރަނގަޅު ކުރުމަށް އަންގާފައެވެ. އަދި އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫނުކުރާނެ ކަމަށް ބުނެފައެވެ.
ކްލިކް ކޮލެޖާ ބެހޭ ގޮތުން ވެސް ގިނަ ޝަކުވާތަކެއް ހުށަހަޅާފައި ވާއިރު އެމްކިއުއޭއިން ބުނެފައިވަނީ، ކްލިކް ކޮލެޖަށް އީ-ލާނިން ޑެލިވަރީ މޮޑަލިޓީގެ ދަށުން އެއްވެސް ޕްރޮގްރާމެއް ކުރިއަށް ގެންދިއުމުގެ ހުއްދަ އެ އޮތޯރިޓީން ދީފައިނުވާ ކަމަށެވެ.
އެމްކިއުއޭއިން ވަނީ ރާއްޖޭގެ ގައުމީ ސަނަދުތަކުގެ އޮނިގަނޑާއި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅުކުރަން ކްލިކް ކޮލެޖަށް އަންގާފައެވެ. އަދި އެކްރެޑިޓު ނުކޮށް މަތީ ތައުލީމުގެ ޕްރޮގްރާމެއް ހިންގާ މަރުކަޒެއްގެ ގޮތަށް 10،000 ރުފިޔާއިން ވަނީ ޖޫރިމަނާ ކޮށްފައެވެ.
މީގެ އިތުރުން އެ ޕްރޮގްރާމްތައް ހުއްޓުމަށް އަންގާ
ސަނަދު ދިނުމުގެ ހުއްދަ ދޫނުކުރުމަށް ވަނީ ނިންމާފާއެވެ.
އެމްކިއުއޭއިން ބުނީ ހުއްދައާ ނުލައި ހިންގާފައިވާ ހުރިހާ ޕްރޮގްރާމަކަށް ފިޔަވަޅު އަޅާނެ ކަމަށައި ދަރިވަރުންނަށް ލިބޭ ހުރިހާ ގެއްލުމެއްގެ ޒިންމާ އެ ކޮލެޖުތަކުން ނަގަން ޖެހޭނެ ކަމުގައެވެ.