މާލެ އަތޮޅުގެ ތުލުސްދުއާ ފާލަމަކުން ގުޅާލާފައި އޮންނަ މީހުން ދިރިނޫޅެ ފަޅު ރަށެއް ކަމަށްވާ ހުރާގަނޑަށް އުދައަރާ އެ ރަށު ކައިރި ވަރަށް ބޮޑަށް ކިލަނބުވެއްޖެއެވެ.
"ސަން" އަށް މައުލޫމާތުދެއްވަމުން ތުލުސްދޫ ކައުންސިލުގެ ނައިބު ރައީސް މުޙައްމަދު ޝަހީމް ވިދާޅުވީ އެ ރަށް ކައިރީ މޫދު ކިލަނބުވެފައި ވަނީ ހުރާގަނޑަށް އުދަ އަރައި ރާޅާއެކު ރަށުތެރޭގައި ހުރި ޗަކަ ވެލި ފަދަ ތަކެތި އެ ސަރަހައްދުގެ މޫދަށް އެޅުމުން ކަމަށެވެ.
އޭނާ ވިދާޅުވީ އެ ސަރަހައްދަކީ މީގެ ކުރިން ވަރަށް ސާފުކޮށް ރީތިކޮށް އޮންނަ ސަރަހައްދެއް ކަމަށާއި މީގެ ކުރިން އެއްވެސް އިރެއްގައި އެ ސަރަހައްދު އެ ގޮތަށް ކިލަނބުވެފައި އޮށްވާ ފެނިފައި ނުވާ ކަމަށެވެ.
ޝަހީމް ވިދާޅުވީ އުދައާއެކު ރާޅުގަނޑު ރަށުގެ އެއްކޮޅުން އަނެއްކޮޅަށް އަރައި އެރަށް އެއްކޮށް ދޮވެވިފައިވާ ކަމަށެވެ.
"ރާޅު އެއްކޮޅުން އަރައިގެން އަނެއްކޮޅުން ފައިބަނީ." ޝަހީމް ވިދާޅުވިއެވެ.
އޭނާ ވިދާޅުވީ އުދައިގެ ސަބަބުން ތުލުސްދޫގެ މީހުން އުޅޭ ސަރަހައްދަށް އެއްވެސްވަރަކަށް ގެއްލުމެއް ވެފައި ނުވާ ކަމަށެވެ. ނަމަވެސް މިއީ އުދަ އަރާ މޫސުމެއް ކަމުން ކޮންމެވެސް ވަރަކަށް ރަށަށް ރާޅު އަރާކަން ޝަހީމް ވަނީ ފާހަގަ ކުރައްވައިފައެވެ.