ކުދި އަދި މެދުފަންތީގެ ވިޔަފާރިތަކަށް ޚާއްސަކޮށްގެން ރާއްޖޭގައި ދެވޭ އެންމެ ފުރަތަމަ އެވޯޑް ދިނުމަށް ތައްޔާރުވަމުން އަންނަކަމަށް ބިޒްނަސް ސެންޓާ ކޯޕަރޭޝަން (ބީސީސީ)އިން މިއަދު ބުނެފިއެވެ.
އެ ކޯޕަރޭޝަނުން މިކަން ހާމަކޮށްފައިވަނީ ބައިނަލްއަޤްވާމީ ގޮތުން ފާހަގަކުރާ އެންމެ ކުދި، ކުދި އަދި މެދުފަންތީގެ ވިޔަފާރިތަކުގެ ދުވަހުގެ މުނާސަބަތުގައި އެ ކޯޕަރޭޝަނުގެ މެނޭޖިން ޑިރެކްޓަރު އިބްރާހިމް ޒިޔާއު ނެރުއްވި ބަޔާނެއްގައެވެ.
"އެމްއެސްއެމްއީ އެވޯޑް"ގެ ނަމުގައި ދޭ މި އެވޯޑަކީ ކުދި ވިޔަފާރިތަކުން ބައިނަލްއަޤްވާމީ އަދި ޤައުމީ ފެންވަރުގައި ކުރަމުންދާ މަސައްކަތްތަކާއި ހޯދަމުންދާ ކާމިޔާބީތައް ފާހަގަކޮށް ރާއްޖޭގައި ދެވޭ އެންމެ ފުރަތަމަ އެވޯޑެވެ.
މި އެވޯޑަކީ އެކި ދާއިރާތަކުގައި ކުދި ވިޔަފާރިތަކުން ކުރަމުންދާ މުހިންމު މަސައްކަތް ފާހަގަ ކުރުމަށް ކުރެވޭ ވަރަށް މުހިންމު މަސައްކަތަކަށް ވާނެކަމަށް ބީސީސީގެ އެމްޑީ އިބްރާހިމް ޒިޔާއު ވަނީ ވިދާޅުވެފައެވެ.
އަދި މިއީ އެ މަސައްކަތްތަކުގެ އަގުވަޒަންކުރެވި އެ ވިޔަފާރިތަކަށް ކުރިއަށްދިއުމަށް އިތުރު ހިތްވަރެއް ދިނުމަށް ކުރެވޭ މުހިންމު ކަމަކަށް ވާނެ ކަން ޒިޔާއު ވަނީ ފާހަގަކުރައްވާފައެވެ.
ބީސީސީގެ އެމްޑީ އިބްރާހިމް ޒިޔާއު އާއި އިކޮނޮމިކް މިނިސްޓަރު މުޙައްމަދު ސައީދު -- ފޮޓޯ: ބީސީސީ
ރާއްޖޭގައި އަމިއްލަ މަސައްކަތްކުރާ ފަރާތްތަކާއި ވިޔަފާރި ރަޖިސްޓަރީ ކުރުން ލާޒިމްނުވާ ފަށައިގަންނަ ވިޔަފާރިތަކަކީ ދިވެހި އިޤްތިޞާދުގެ ބޮޑު ހިއްސާއެއް އަދާ ކުރާ ފަރާތްތަކަކަށް ވީ ހިނދު، މިފަދަ ވިޔަފާރިތަކަށް ފަހި މާޙައުލެއް ޤާއިމުކޮށް ދިނުމަށް މަސައްކަތް ކުރަމުންދާކަން ޒިޔާއު ވަނީ ހާމަކުރައްވާފައެވެ.
އެގޮތުން ރާއްޖޭގެ ކުދި ވިޔަފާރިތަކަށް، ޚާއްޞަކޮށް ދިވެހި އުފެއްދުންތައް އުފައްދާ ފަރާތްތަކަށް ރާއްޖެއާއި ރާއްޖެއިން ބޭރުން މާކެޓް އެކްސެސް ހޯދައި ދިނުމަށް ބީސީސީން ގިނަ މަސައްކަތްތަކެއް ކުރަމުން ދާކަން ވެސް ޒިޔާއު ވަނީ ފާހަގަ ކުރައްވާފައެވެ.
ރާއްޖެއިން ބޭރުގައި ދިވެހި އުފެއްދުންތައް ވިއްކޭނެ ފުރުޞަތުތަކާއި ބައިނަލްއަޤްވާމީ އެކި ހަރަކާތްތަކުގައި ދިވެހި އުފެއްދުންތައް ބައިވެރިކޮށް އިސްތިހާރު ކުރެވޭނެ ގޮތްތައް ބަލަމުން ދާކަމަށް ވެސް ވަނީ ވިދާޅުވެފައެވެ.
ރާއްޖޭގެ އިޤްތިޞާދުގައި ފަންނުވެރިންގެ ދައުރު ފުޅާކުރުމަށް ބީސީސީން ކުރަމުންދާ މަސައްކަތްތަކާއި އެއްވެސް ސިނާއަތެއް އިސްތިސްނާ ނުކޮށް ހުރިހާ ފަރާތަކަށް ހަމަހަމަ ފުރުސަތުތަކެއް ފަހިކުރުމަށް ބީސީސީން ކުރަމުންދާ މަސައްކަތް ހުއްޓުމެއްނެތި ކުރަމުންދާނެ ކަމުގެ ޔަޤީންކަން ޒިޔާއު ވަނީ ދެއްވާފައެވެ.