ފިންލޭންޑުން އަންނަ ހަފުތާގައި ދޫނި ރޯގާއަށް ވެކްސިން ދޭން ފަށާނެ ކަމަށް އިއުލާނުކޮށްފިއެވެ.
އެ ވެކްސިން ފުރަތަމަ ދޭނީ ޖަނަވާރުތަކާއި ކައިރިން މަސައްކަތްކުރާ ބައެއް މަސައްކަތްތެރިންނަށް ކަމަށް އެ ގައުމުގެ ސިއްހަތާބެހޭ ވުޒާރާއިން ބުނެއެވެ. ފިންލޭންޑު ވާނީ ދޫނި ރޯގާއަށް ވެކްސިން ދޭން ފަށާ ފުރަތަމަ ގައުމަށެވެ.
އެ ގައުމުން ވަނީ މިހާތަނަށް 10،000 ވެކްސިން ގަނެފައެވެ. ކޮންމެ ވެކްސިނެއްގައި ދެ އިންޖެކްޝަން ހިމެނެއެވެ.
"އެ ވެކްސިން އަދި ދޭނީ މަސައްކަތުގެ ސަބަބުން ނުވަތަ އެހެން ހާލަތްތަކުގައި އެވިއަން އިންފްލުއެންޒާ ޖެހުމުގެ ނުރައްކާ ބޮޑު އުމުރުން 18 އަހަރުން މަތީގެ މީހުންނަށް،" ފިންލޭންޑްގެ އިންސްޓިޓިއުޓް ފޯ ހެލްތު އެންޑް ވެލްފެއާ (ޓީއެޗްއެލް)އިން ނެރުނު ބަޔާނެއްގައިވެއެވެ.
ދޫނި ރޯގާ ޖެހިގެން ފާއިތުވި އަހަރުތަކުގައި ދުނިޔޭގެ އެތައް ސަތޭކަ މިލިއަން ޖަނަވާރު މަރުވެފައިވާއިރު، އެ ރޯގާ ވަނީ ބައެއް ހާލަތްތަކުގައި އިންސާނުންނަށް ވެސް ޖެހިފައެވެ. ނަމަވެސް، ފިންލޭންޑުގައި އެ ރޯގާ އަދި އިންސާނަކަށް ޖެހިފައެއްނުވެއެވެ.
ކެހެރި ބޯ ގިނަ އަދަދެއްގެ ޖަނާވަރުތަކުގެ މެދުގައި ދޫނި ރޯގާ ފެތުރެން ފެށުމުން ޖަނާވާރުތަކުގެ އިތުރުން އިންސާނުންނަށް ވެސް އެ ރޯގާ ފެތުރިދާނެތީ އެކަން ހުއްޓުވުމަށް ފިންލޭންޑުން މިދިޔަ އަހަރު ވަނީ 485،000 ޖަނަވާރު މަރާލައިފައެވެ.