އިންޑިއާގެ މަޝްހޫރު ދެ ކޮރިއަގްރާފަރުން ކަމަށްވާ ގީތާ ކަޕޫރު އަދި ޓެރެންސް ލެވިންސާ އެކު ބޮލީވުޑްގެ ކުރީގެ ބަތަލާ ކަރިޝްމާ ކަޕޫރު ފަނޑިޔާރެއްގެ ގޮތުގައި ފެންނާނެކަމަށް ރިޕޯޓުތައް ބުނެފިއެވެ.
ވަރަށް އަވަހަށް މަސައްކަތް ފެށުމަށް ހަމަޖެހިފައިވާ މި ޝޯ އަކީ 'އިންޑިއާސް ބެސްޓް ޑާންސާ'ގެ ނަމުގައި ސޮނީ ޓީވީން ގެނެސްދޭ އެ ސީޒަންގެ ހަތަރުވަނަ ޝޯއެވެ. މި ޝޯ ބެލުންތެރިންނަށް ފެންނާނެ ކަމަށް ލަފާކުރެވެނީ އަންނަ މަހުގެ ފަހުކޮޅުއެވެ.
މީގެ ކުރިން ވެސް ކަރިޝްމާ ވަނީ ބައެއް ރިއަލިޓީ ޝޯތަކުން މެހެމާނެއްގެ ގޮތުގައި ބެލުންތެރިންނާ ބައްދަލުކޮށްފައެވެ. އޭގެ ތެރޭގައި 'އިންޑިއާސް ބެސްޓް ޑާންސާ' އަދި ސްޓާ ޕްލަސްއިން ގެނެސްދިން 'ނަޗް ބަލިޔޭ' ހިމެނެއެވެ. ސްޓާ ޕްލަސްގެ 'ނަޗް ބަލިޔޭ'އިން ކަރިޝްމާ ފެނުނީ ފަނޑިޔާރުންގެ ޕެނަލްއިންނެވެ.
ކަރިޝްމާ ކަޕޫރު ކޮއްކޮ ކަރީނާ ކަޕޫރު ޚާންއާ އެކު "ނަޗް ބަލިޔޭ ޝޯ"ގައި--ފޮޓޯ/އިންޑިއާޓައިމްސް
ފިލްމީ މަސައްކަތްތަކާ ދުރުގައި އުޅުމަށް ފަހު ކަރިޝްމާ އެނބުރި ފިލްމީ ދާއިރާއަށް ނުކުމެފައިވަނީ މި އަހަރުއެވެ. މި އަހަރުގެ މާޗު މަހު ނެޓްފްލިކްސްގައި ޕްރިމިއާކުރި މިސްޓްރީ ކޮމެޑީ ފިލްމު "މާޑަ މުބާރަކް" ކުޅުމުގެ ކުރިން ކަރިޝްމާ ވަނީ ވެބް ސީރީޒްތަކުން ވެސް ފެނިފައެވެ.
އޭގެ ތެރޭގައި 'ޒީ5'އިން ގެނެސްދިން "މެންޓަލްހުޑް" ހިމެނެއެވެ. ކަރިޝްމާ ވަނީ އިންޑިއާގެ ސަހާރާ ޓީވީން 2003ވަނަ އަހަރުން ފެށިގެން 2004ވަނަ އަހަރާ ހަމައަށް ގެނެސްދިން ޓެލެވިޒަން ސީރީޒް "ކަރިޝްމާ-ދަ މިރޭކްލްސް އޮފް ޑެސްޓިނީ"އިން ވެސް ފެނިފައެވެ. އެހެންކަމުން ޓެލެވިޒަން އުފެއްދުންތަކަކީ ކަރިޝްމާއަށް އާ މަސައްކަތެއް ނޫނެވެ. ފިލްމީ ދާއިރާގައި މަސައްކަތް ކުރިއިރު އެންމެ ހުނަރުވެރިކަމާ އެކު ފިލްމުތަކުގައި ނެށުންތައް ހުށަހަޅައިދިން ފިލްމީ ތަރިންގެތެރޭ ކަރިޝްމާ ހިމެނެއެވެ.