ޔޫރޯ ފުޓުބޯޅަ މުބާރާތުގައި ޑެންމާކުން މެޗުގެ ބޮޑުބައި ލީޑުގައި އޮތް ނަމަވެސް, ސްލޮވީނިއާއިން މެޗުގެ ފަހުކޮޅު ކާމިޔާބުކުރި ލަނޑާއެކު މެޗު އެއްވަރުވެއްޖެއެވެ.
މިއީ 24 އަހަރުގެ މެދުކެނޑުމަކަށްފަހު ޔޫރޯގައި ކުޅެމުންދާ ސްލޮވީނިއާއަށް ބޮޑު ކާމިޔާބީއެކެވެ. މެޗު ނިމުނީ 1-1އިން އެއްވަރުވެގެންނެވެ.
އެ މެޗުގައި އެންމެ ޚާއްސަ އެއް ކުޅުންތެރިއަކީ ކްރިސްޓިއަން އެރިކްސަން އެވެ. މި މެޗު ކުޅެފައިވަނީ ޑެންމާކުން ޔޫރޯ 2020ގެ ގްރޫޕް ސްޓޭޖުގައި ކުޅުނު ފުރަތަމަ މެޗުގައި ފިންލޭންޑާ ދެކޮޅަށް ކުޅެނިކޮށް، ޓީމުގެ ތަރި އެރިކްސަން ހިތް ހުއްޓިގެން ދަނޑުމައްޗަށް ވެއްޓުނުތާ 1000 ދުވަސް ފަހުންނެވެ.
ސްޓުޓްގާޓް އެރީނާގައި ކުޅުނު މެޗުގެ ފުރަތަމަ ކޮޅުގައި ގިނަ ވަގުތު ބޯޅަ ހިފަހައްޓައިގެން ނުރައްކާތެރި ޓީމެއްގެ ގޮތުގައި ފެނުނީ ޑެންމާކެވެ. މެޗުގެ 17 ވަނަ މިނެޓުގައި ލީޑު ނެގީވެސް ޑެންމާކުންނެވެ. ޖޮނަސް ވިންޑް ދިން ރީތި ބޯޅައަކުން ޑެންމާކަށް ލަނޑު ކާމިޔާބުކޮށްދިނީ އެޓީމުގެ ތަރި އެރިކްސަނެވެ.
ދެވަނަ ހާފުގެ ކުރީކޮޅުގައި ނުރައްކާ ކުރީ ޑެންމާކެވެ. ނަމަވެސް މި ހާފުގެ ފަހުކޮޅު ބޮޑުބައި ކޮންޓްރޯލުކޮށްގެން މޮޅަށް ކުޅުނީ ސްލޮވީނިއާއެވެ.
މެޗުގެ 76 ވަނަ މިނެޓުގައި ޕެނަލްޓީ އޭރިއާ ބޭރުން ސްލޮވީނިއާގެ ސެސްކޯ ފޮނުވާލި ބާރު ހަމަލާ އަމާޒުވީ ޑެންމާކް ގޯލުގެ އަރިމަތީ ދަނޑިއަށެވެ. އެއަށްފަހު ކޯނަރެއްގެ ތެރެއިން ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއަކުން ސްލޮވީނިއާއަށް އެ ލަނޑު ކާމިޔާބުކޮށްދިނީ އެރިކް ޔަންޒާއެވެ. އޭނާ ފޮނުވާލި މި ބޯޅަ ގޯލުގެ ތެރެއަށް ވަދެފައިވަނީ ޑެންމާކުގެ މޯޓެން ހިޖޫލްމަންޑްގެ ގައިގައި ޖެހިފައި މިސްރާބު ބަދަލުވެގެންނެވެ.
މި ލަނޑަށްފަހު ވެސް ސްލޮވީނިއާއަށް ލީޑުނަގަން ރަނުގެ ފުރުސަތުތަކެއް ލިބުނެވެ.