ޑެންމާކުގެ ބޮޑުވަޒީރު މެޓް ފްރެޑެރިކްސަންއަށް މަގުމަތިން މީހަކު ހަމަލާދީފިއެވެ.
ޑެންމާކުގެ ނޫހެއްގައިވާ ގޮތުގައި އިއްޔެ އެ ހާދިސާ ހިނގީ އެގައުމުގެ ވެރިރަށް ކޯޕަންހޭގަންގައި، ފްރެޑެރިކްސަން ހިންގަވާފައި ވަޑައިގަންނަވަނިކޮށެވެ.
އެ ހަމަލާ ދިނީ ހިނގައިފައި އައި މީހަކު ކަމަށާއި، އޭނާ ގޮސް ފްރެޑްރިކްސަން ގައިގައި ޖަހައި ކޮއްޕައިލީ ކަމަށް މީޑިއާތަކުން ރިޕޯޓުކުރެއެވެ. އެ ވަގުތު ބޮޑުވަޒީރު ވެއްޓެން ދިޔަ ނަމަވެސް، ބިންމައްޗަށް ނުވެއްޓޭ ކަމަށާއި ހަމަލާއަށް ފަހު ކުޑަ ވަގުތުކޮޅަކަށް ފްރެޑްރިކްސަން ކެފޭއެއްގައި މަޑުކުރެއްވި ކަމަށް ނޫސްތަކުގައިވެއެވެ.
އެ ހާދިސާއާ ބެހޭ ތަފުސީލެއް ބޮޑުވަޒީރުގެ އޮފީހުން ނުދެއެވެ. ނަމަވެސް އެ ހަމަލާ ދިނުމުން ފްރެޑްރިކްސަން ސިހުނު ކަމަށާއި ހަމަލާދިން މީހާ މިހާރު ހައްޔަރުކޮށްފައިވާ ކަމަށް އެ އޮފީހުން ބުންޏެވެ.
ޔޫރަޕިއަން ކޮމިޝަންގެ ރައީސް އާސަލާ ވޮން ޑާ ލަޔަން ވަނީ އެ ހަމަލާ ކުށްވެރިކުރައްވައިފައެވެ. އަދި އެފަދަ އަމަލުތަކަކީ ޔޫރަޕްގައި ގަބޫލުކުރާ ކަންކަމެއް ނޫން ކަމަށާއި އެއީ އުސޫލުތަކާ ޚިލާފު ކަންކަން ކަމަށް އޭނާ ވިދާޅުވިއެވެ.
ބޮޑުވަޒީރަށް ހަމަލާ ދީފައި ވަނީ ޔޫރަޕިއަން ޔޫނިއަންގެ އިންތިޚާބުގައި ޑެންމާކުން މިއަދު ވޯޓުލާން ނިންމައިފައިވާ ދަނޑިވަޅެއްގައެވެ.
ޑެންމާކުގެ ސެންޓާ ލެފްޓް ސޯޝަލިސްޓް ޑިމޮކްރެޓިކް ޕާޓީގެ ލީޑަރު ފްރެޑްރިކްސަން ބޮޑުވަޒީރުކަމާ ހަވާލުވެވަޑައިގަތީ 2019 ވަނަ އަހަރެވެ.
ސާޅީސް ހަ އަހަރުގެ ފެޑްރިކްސަންއަށް ހަމަލާ ދީފައިވަނީ ސްލޮވާކިއާގެ ބޮޑުވަޒީރު ރޮބަޓް ފީކޯއަށް ބަޑީގެ ހަމަލާއެއްދީ ޒަހަމްކޮށްލިތާ، ދުވަސްކޮޅެއް ފަހުންނެވެ. އެ ހަމަލާއަކީ 20 އަހަރަށްވުރެ ގިނަ ދުވަހަށްފަހު ޔޫރަޕްގެ ސިޔާސީ ލީޑަރަކަށް މި ފަހުން ދިން އެންމެ ވަރުގަދަ ހަމަލާއެވެ.
ސިޔާސީ މާހިރުން ފާހަގަކުރައްވާ ގޮތުގައި ސްލޮވާކިއާގެ އިތުރުން މުޅި ޔޫރަޕްގައި ވެސް އޮތީ ބައިބައިވެފައިވާ ސިޔާސީ މާހައުލެކެވެ.