ބިން ކުއްޔަށް ދޫކޮށްގެން އާމްދަނީ ހޯދަން ކުރާ މަސައްކަތުގެ ދަށުން ކ. ތުލުސްދޫއިން ދެތިން ބިމެއް ހަމަޖެހިފައިވާ ކަމަށް މާލެ އަތޮޅު ކައުންސިލްގެ ރައީސް އަޙުމަދު އަނީސް މިރޭ ވިދާޅުވެއްޖެއެވެ.
"ސަން"އާ ވާހަކަދައްކަވަމުން އަނީސް ވިދާޅުވީ ބިން ހޯދަން ކުރާ މަސައްކަތުގެ ދަށުން ދެތިން ބިމެއް އަތޮޅު ކައުންސިލަށް ދިނުމަށް ތުލުސްދޫ ކައުންސިލުން ފާސްކޮށްފައިވާ ކަމަށެވެ.
އެއީ އެ ބިމުން އަތޮޅު ކައުންސިލަށް ލިބޭ ފައިދާއިން ބައެއް، އެ ރަށަކަށް ލިބޭގޮތަށެވެ. އެ ގޮތުން ތުލުސްދޫއިން ލިބިފައިވާ ބިންތަކުން އާމްދަނީ ހޯދުމަށް ޓަކައި މަސައްކަތް ކުރަމުންދާ ކަމަށް އަނީސް ވިދާޅުވިއެވެ.
އަނީސް ވިދާޅުވި ގޮތުގައި އާމްދަނީ ހޯދުމަށް ތުލުސްދޫއިން ތިން ބިމެއްވަރު މީގެ ކުރިން ވެސް އޮތީ ލިބިފައެވެ.
ކ.ތުލުސްދޫ --
އަތޮޅު ކައުންސިލަށް އާމްދަނީ ހޯދުމުގެ ގޮތުން މި މަސައްކަތް ފެށުމަށް ލޯކަލް އޮތޯރިޓީ ކުންފުނި (އެލްއޭސީ) އުފެއްދުމުގެ މަސައްކަތް ކުރަމުންދާ ކަމަށް އަނީސް ވިދާޅުވިއެވެ. އެ ގޮތުން އެ ކުންފުނީގެ ބޯޑު އެކުލަވާލުމުގެ މަސައްކަތާއި، ބޯޑު މެންބަރުން ޓްރެއިންކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
"ކުންފުނި ހެދުނީމާ އަޅުގަނޑުމެން ބޭނުންވާ ގޮތަށް އެ މަސައްކަތް ކުރިޔަށް ގެންދެވޭނީ. އިރާދަކުރެއްވިއްޔާ ވަރަށް އަވަހަށް އެ މަސައްކަތް ނިމޭނެ،" އަނީސް ވިދާޅުވިއެވެ.
މާލެ އަތޮޅަކީ ގިނަ ރިޒޯޓްތައް ހިމެނޭ، އަދި ލޯކަލް ޓޫރިޒަމް ވެސް ވަރަށް ފުޅާ ދާއިރާއެއްގައި ކުރަމުން އަންނަ ސަރަހައްދެކެވެ. އެހެން ނަމަވެސް މާލެ އަތޮޅުގެ މީހުން ދިރިއުޅޭ ކުދި ރަށްތަކުގެ ކައުންސިލްތަކަށް އާމްދަނީ ހޯދޭނެ ފުރުސަތުތައް މަދުވުމުގެ ކަންބޮޑުވުން އޮވެއެވެ.
ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި އަމިއްލަ ފަރާތްތަކާ އެކު ވިޔަފާރިކުރުމާބެހޭ ގަވާއިދެއް އެކުލަވާލައި، އާންމުކުރީ 2021ވަނަ އަހަރުގެ އޭޕްރީލް މަހުގެ ހަތަރުވަނަ ދުވަހެއެވެ.
އެ ގަވާއިދުގެ ދަށުން އުފައްދާ ކުންފުންޏެއްގެ ދަރަންޏަށް ޒިންމާވާން ޖެހޭނީ އެ ކުންފުންޏެއް ހިއްސާވާ ކައުންސިލުން ނުވަތަ ކައުންސިލުތަކުންނެވެ.
އަދި ޒިންމާވާންޖެހޭނީ އެ ކުންފުންޏެއްގެ ހިއްސާއިން އުފެއްދުމަށް ކަނޑައަޅައިފައިވާ ރައުސްމާލުގެ ތެރެއިން އެއްވެސް މިންވަރެއް އެ ކުންފުންޏަށް ދައްކައިފައިނުވާ ނަމަ، އެ މިންވަރަކަށެވެ.
ލޯކަލް އޮޓޯރިޓީ ކުންފުނިތަކުގެ ހިއްސާ ބަދަލުކުރެވޭނީ ހަމައެކަނި ކައުންސިލްތަކުގެ މެދުގައެވެ.