ރ. އަތޮޅަށް ގިނަ ޚިދުމަތްތަކެއް ކުރައްވާފައިވާ ސައުދު އިބްރާހީމް (ސައުދުބެ) މިއަދު އަވަހާރަވެއްޖެއެވެ.
ޑިސެމްބަރު 13، 1941 ގައި އުފަންވި، ރ. އިންނަމާދޫ، މެހުރާ، ސައުދުބެ އަވަހާރަވީ 82 އަހަރުގައެވެ.
ރ. އަތޮޅަށް ގިނަ ޚިދުމަތްތަކެއް ކޮށްދެއްވާފައިވާ ސައުދުބެއަކީ އެ އަތޮޅުގެ ގިނަ ބަޔަކު ދަންނަ ބޭފުޅެކެވެ.
"ސަން" އާ ވާހަކަދައްކަވަމުން ސައުދުބެގެ އާއިލީ ބޭފުޅެއް ވިދާޅުވީ، ސައުދުބެ ނިޔާވީ އާލާސްކަންފުޅާ އުޅުއްވުމަށް ފަހު ޓްރީޓޮޕް ހޮސްޕިޓަލުގައި ފަރުވާދެމުން ދަނިކޮށް ކަމަށެވެ.
ސައުދުބެއަކީ ހަތް އަހަރު ރ. އަތޮޅުގެ އަތޮޅު ވެރިކަން ކުރައްވާފައިވާ ބޭފުޅެކެވެ. އަދި އެހެން ބައެއް އަތޮޅު އޮފީސްތަކުގައި ވެސް ސައުދުބެ މަސައްކަތްކުރައްވާފައިވެއެވެ.
ސައުދުބެއަކީ އަތޮޅުގެ ތަރައްގީއަށް ވަރަށް ބައިވަރު މަސައްކަތްތަކެއް ކުރައްވާފައިވާ ބޭފުޅެކެވެ. އޭގެ ތެރޭގައި އަތޮޅުގެ ގިނަ ރަށްތަކުގެ މަގުތައް ތަރުތީބު ކުރެއްވުމުގެ މަސައްކަތް ހިމެނެއެވެ.
ސައުދުބެގެ އަވަހާރަވީއިރު، އޭނާގެ 19 ކުދިން ތިއްބެއެވެ.