އިޒްރޭލުން ހުއްޓުމެއް ނެތި ފަލަސްތީނަށް ދެމުންދާ ހަމަލާތަކާ ގުޅިގެން ހަނުހުރުމުގެ ސަބަބުން ލަވަކިޔުންތެރިޔާ ޓޭލާ ސްވިފްޓުގެ ފޭނުން ރަތަށް އަރައިފިއެވެ.
ޓޭލާ ސްވިފްޓަކީ މި ވަގުތު މިއުޒިކް އިންޑަސްޓްރީގައި ހުރި އެންމެ ނުފޫޒު ގަދަ އެއް ފަންނާނެވެ. ޓޭލާގެ އެންމެ ބަހަކުން އަދި އެންމެ އަމަލަކުން ދުނިޔޭގެ އަދި ޚާއްސަކޮށް އެމެރިކާގެ ސިޔާސަތުތަކަށް ވެސް ބަދަލު އަންނަ ތަން ވަނީ ފެނިގެން ގޮސްފައެވެ.
އެންމެ ފަހުން އެ ގައުމުގައި ބޭއްވި ރިޔާސީ އިންތިޚާބުގައި އެކަން ސާބިތު ވެގެން ދިޔައެވެ. ޓޭލާ އެންމެ ފަހަރަކު ވޯޓުލާން ދާން ގޮވާލުމުން އެތައް ލައްކަ ޒުވާން ފޭނުންތަކެއް އިންތިޚާބުގައި ވޯޓުލާން ބައިވެރިވިއެވެ.
މިހާ ނުފޫޒުގަދަ ތަރިއަކު މިފަދަ ދަނޑިވަޅެއްގައި އެއްވެސް އެއްޗެއް ބުނެފައި ނެތުމުން ޓޭލާގެ ފޭނުން، "ސްވިފްޓީސް"އިން ވަނީ އެކަމާ ވަރަށް ހިތްހަމަ ނުޖެހިފައެވެ.
ފަލަސްތީނަށް ކުރާ ހަމަލާތައް އެއްކޮށް ހުއްޓާލައި އިޒްރޭލުގެ އަސްކަރިއްޔާއަށް ފަންޑު ކުރުން ހުއްޓާލުމަށް އެތައް ތަރިންތަކެއް ގޮވަމުންދާ ދަނޑިވަޅެއްގައި ޓޭލާ އަދިވެސް ހުރީ ހަނެވެ.
މިކަމާ ސްވިފްޓީން ހިތްހަމަ ނުޖެހިގެން އެންމެ ފަހުން މުޅި ސޯޝަލް މީޑިއާގައި މިހާރު ގޮވަމުން ދަނީ ޓޭލާ ހަނު ހުރުން ހުއްޓާލައި ފަލަސްތީނާ އެއްކޮޅަށް ވާހަކަ ދެއްކުމަށެވެ. ޓްވިޓާގައި ސްވިފްޓީން ވަނީ މި ހިތްހަމަ ނުޖެހުންތައް ބަންޑުން ކޮށްލައި އެއް އަޑަކުން ޓޭލާއާ ދެކޮޅަށް ނުރުހުން ފާޅުކުރަމުންނެވެ. މިކަން ވަނީ ޓުވިޓާ ޓްރެންޑިންއަށްވެ މި ދެ ދުވަހު އެންމެ ގިނަ ބަޔަކު ޓްވީޓު ކުރި މައުލޫއަށް ވެފައެވެ.
ޓޭލާގެ ޓުއާއަށް ދާ ފޭނުންނަށް ވެސް ގޮވަމުން ދަނީ ފަލަސްތީނުގެ އަޑު ސްޓޭޑިއަމްތަކުގައި އުފުލުމަށެވެ.
ހޮލީވުޑްގެ މަގުބޫލު ލަވަކިޔުންތެރިޔާ ކެލާނީ ދާދި ފަހުން ވަނީ މިއުޒިކް އިންޑަސްޓްރީގައި ހިމެނޭ ފަންނާނުންނަށް ފާޑު ކިޔާފައެވެ. އަދި، ތަނެއްދޮރެއް ނޭނގި އިޒްރޭލަށް ސަޕޯޓު ކުރަމުންދާ ފަންނާނުން ގިނަ ކަމަށާއި އެކަން ހުއްޓަން ވެއްޖެ ކަމަށް ކެލާނީ ވަނީ ބުނެފައެވެ. މިއާއެކު އެތައް ފަންނާނުން އަންނަނީ އެންމެފަހުން ފަލަސްތީނަށް ސަޕޯޓު އޮތްކަމަށް ބުނެ އެކި ފަންޑުތަކަށް ފައިސާ ހޯދުމަށް މަސައްކަތް ފަށާފައެވެ.
ފަލަސްތީނުގެ ރައްޔިތުންގެ ހައްގުތަކުގައި ވަކާލާތުކޮށް ހުއްޓުމެއް ނެތި ވާހަކަ ދައްކައި އެއްވުންތަކަށް ގޮސް އަދި އެކި ގޮތްގޮތުން ފައިސާ ހޯދައިދިނުމަށް އެހީވި ތަރީންގެ ލިސްޓުގެ އެންމެ ކުރީގައި ކެލާނީ ހިމެނޭނެއެވެ. ފަލަސްތީނުގެ ރައްޔިތުންގެ ހައްގުތަކަށް ވަކާލާތުކޮށް ކެލާނީ ވާހަކަ ދައްކަމުން އަންނަތާ އެތައް އަހަރެއް ވެއްޖެއެވެ.