ޓައިވާނުގެ ވަށައިގެން ޗައިނާއިން ބޮޑު އަސްކަރީ ތަމްރީނުތަކެއް ކުރިއަށް ދަނިކޮށް ޓައިވާނުގެ ރައީސް އެ ގައުމުގެ ސިފައިންނާ ބައްދަލުކުރައްވަމުން ގެންދަވާ ކަމަށް މީޑިއާ ރިޕޯޓްތައް ބުނެފިއެވެ.
ޓައިވާނުގެ އަސްކަރިއްޔާގެ ކޮމާންޑަ އިން ޗީފް އަދި ޓައިވާނުގެ ރައީސް ވިލިއަމް ލައި ޗެންގް-ޓޭ ބުރާސްފަތި ދުވަހު އުތުރު ޓައޯޔުއާން ސިޓީގައި ހުންނަ 66 ވަނަ މެރިން ކޯޕްސް ބްރިގޭޑަށް ޒިޔާރަތްކުރެއްވީ "ގައުމީ އަސްކަރިއްޔާއަށް ހިތްވަރު ދެއްވުމަށް" ކަމަށް އެ ގައުމުގެ ސެންޓްރަލް ނިއުސް އެޖެންސީން ބުނެއެވެ.
އެއްވެސް ބޭފުޅެއްގެ ނަން ހާމަ ނުކުރައްވައި ލައި ވިދާޅުވީ ޓައިވާނަށް ބޭރުގެ ނުރައްކާތައް ކުރިމަތިވެފައިވާ ކަމަށާއި ނަމަވެސް މިނިވަންކަމާއި ޑިމޮކްރަސީގެ އަގު ދިފާއުކޮށް ސަރަހައްދީ ސުލްހަ އާއި ހަމަޖެހުން ހިމާޔަތް ކުރުމުގައި ދެމިތިބޭނެ ކަމަށެވެ.
ޓައިވާނުގެ އަސްކަރިއްޔާއާ ބައްދަލުކުރެއްވުމަށް ލައި ކުރެއްވި ފުރަތަމަ ދަތުރުފުޅަކީ ޗައިނާގެ ޕީޕަލްސް ލިބަރޭޝަން އާމީގެ އީސްޓަން ތިއޭޓާ ކޮމާންޑުން ޓައިވާންގެ ވަށައިގެން ޖޮއިންޓް މިލިޓަރީ ޑްރިލްއެއް ބުރާސްފަތި ދުވަހު ފަށާފައިވާ ދަނޑިވަޅެއްގައެވެ.
އަދި މިއީ ޓައިވާނުގެ ރައީސްކަމުގެ މަގާމަށް ލައި އިފްތިތާހު ކުރި ފަހުން މިފަދަ ޑްރިލްތަކެއް ފެށި ފުރަތަމަ ފަހަރެވެ.
މި ޑްރިލްގައި ޓައިވާން ކަނޑުއޮޅިއާއި، ޓައިވާން އައިލެންޑްގެ އުތުރާއި ދެކުނު އަދި އިރުމަތީ ސަރަޙައްދުގެ އިތުރުން ވަށައިގެންވާ ސަރަޙައްދުތަކުގެ ތެރޭގައި ކިންމެން، މަޓްސޫ، ވޫކިއު އަދި ޑޮންގްޔިން އައިލެންޑްސް ހިމެނެއެވެ.
ތިއޭޓަރު ކޮމާންޑްގެ ތަރުޖަމާނު ލީ ޝީ ވިދާޅުވީ ބުރާސްފަތި ދުވަހުން ފެށިގެން ހުކުރު ދުވަހުގެ ނިޔަލަށް ޖޮއިންޓް ސްވޯޑް-2024އޭ ގެ ނަމުގައި ޖޮއިންޓް ޑްރިލްތަކަށް އަސްކަރިއްޔާއާއި ނޭވީ އާއި ވައިގެ އަސްކަރިއްޔާ އަދި ރޮކެޓް ފޯސް ގުޅިގެން މަސައްކަތް ކުރަމުންދާ ކަމަށެވެ.
އޭނާ ވިދާޅުވީ ޗައިނާގެ އަސްކަރީ ތަމްރީނުތަކަކީ "ޓައިވާނުގެ މިނިވަންކަން" ބާރުތަކުން ހިންގަމުން ގެންދާ ވަކިވެގަތުމުގެ އަމަލުތަކަށް "ވަރުގަދަ އަދަބެއް" ދިނުމާއި ބޭރުގެ ބާރުތަކުން ނުފޫޒު ފޯރުވުމާއި ހިތްވަރު ދިނުމާ ދެކޮޅަށް ހަރުކަށި "އިންޒާރެއް" ދިނުން ކަމަށެވެ.
ޓައިވާނުގެ ރައީސް ވިދާޅުވީ ޓައިޕޭ "ގައުމީ ދިފާއީ އިސްލާހުތައް ކުރިއަރުވައި ގައުމީ އަސްކަރިއްޔާގެ މުޅި ހަނގުރާމައިގެ ގާބިލްކަން އިތުރަށް ހަރުދަނާ ކުރަމުން ގެންދާނެ" ކަމަށެވެ.
"އެކުގައި މަސައްކަތް ކުރާނަން... ޑިމޮކްރެޓިކް ޓައިވާން ހިމާޔަތް ކުރުމުގެ އަޒުމް ދެއްކުމަށް،" އޭނާ ވިދާޅުވި އެވެ.
ޓައިވާންގެ ދިފާއީ ވުޒާރާއިން ބުނީ ޓައިވާންގެ ވަށައިގެން ހަރަކާތްތެރިވާ ޗައިނާގެ ކޯސްޓްގާޑަށް ނިސްބަތްވާ އެއް މަތިންދާބޯޓާއި ޗައިނާގެ ކަނޑުގެ އަސްކަރިއްޔާއަށް ނިސްބަތްވާ އަށް އުޅަނދާއި ހަތަރު އުޅަނދެއް ފެނިފައިވާ ކަމަށެވެ.
"ޓައިވާނުގެ ހުޅަނގު ދެކުނު އަދި ދެކުނުއިރުމަތީ އޭޑީއައިޒެޑް (އެއާ ޑިފެންސް އައިޑެންޓިފިކޭޝަން ޒޯން) އަށް މަތިންދާ ބޯޓު ވަދެފައި ވޭ. ރިޕަބްލިކް އޮފް ޗައިނާ (އާރްއޯސީ) ސިފައިން ވަނީ ހާލަތު މޮނިޓާކޮށް އެގޮތަށް ރައްދު ދީފައި،" ޓައިވާނުގެ އަސްކަރިއްޔާއަށް އިޝާރާތްކޮށް މިނިސްޓްރީން އެކްސްގައި ލިޔެފައިވެއެވެ.
ޓައިވާނުގެ ވުޒާރާއިން ވަނީ ޑްރިލްތައް އިއުލާނުކުރުން ކުށްވެރިކޮށް، އެކަމުގެ ސަބަބުން ސަރަހައްދީ ސުލްހަ މަސަލަސްކަމަށް ނުރައްކާވާ ކަމަށް ބުނެފައެވެ.
"އަޅުގަނޑުމެން މިތިބީ ސާބިތުކަމާއި ކެތްތެރިކަމާއެކު ތައްޔާރަށް. ގައުމީ ސަލާމަތާއި ރައްކާތެރިކަން ހިމާޔަތް ކުރުމުގެ ޔަގީންކަން އެބައޮތް،"
އެއްވެސް ހަމަނުޖެހުމެއް ނުހިންގަން އެދޭ ކަމަށާއި ނަމަވެސް އެކަކަށް ފަހަތަށް ނުޖެހޭނެ ކަމަށް ވެސް މިނިސްޓްރީން ބުންޏެވެ.