ތ. ކަނޑޫދޫގައި ފާރެއް ވެއްޓި އަނިޔާވި 10 އަހަރުގެ ކުއްޖާގެ ހާލު މިހާރު ސީރިއަސް ނޫން ކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން މިއަދު ބުނެފިއެވެ.
ފާރެއް ވެއްޓި ކުޑަކުއްޖަކަށް ބޮޑެތި އަނިޔާތަކެއް ލިބުނީ ހުކުރު ދުވަހު ހަވީރު ހިނގި ހާދިސާއެއްގައެވެ.
"ސަން"އަށް މައުލޫމާތު ދެއްވަމުން އައިޖީއެމްއެޗްގެ އޮފިޝަލަކު ވިދާޅުވީ އެ ކުއްޖާގެ ހާލު މިހާރު ސީރިއަސް ނޫން ކަމަށާއި އޮބްޒަވޭޝަންގައި ފަރުވާ ދެމުން އަންނަ ކަމުގައެވެ. މި ހާދިސާގައި ކުއްޖާގެ ހަށިގަނޑުގެ ދެ ތަނެއްގައި ރެނދުލާފައިވާ ކަމަށް ވެސް އައިޖީއެމްއެޗުން ވަނީ ބުނެފައެވެ.
މޫސުން ގޯސްވުމުގެ ސަބަބުން އިތުރު ފަރުވާއަށް މާލެ ގެނައުން ލަސްވެފައި އޮތުމަށް ފަހު، އެ ކުއްޖާ މާލެ ގެނެސްފައިވަނީ އިއްޔެ ހެނދުނު އެއާ އެމްބިއުލާންސްގައެވެ.
ފާރު ވެއްޓުނު ހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށް ފުލުހުން މީގެ ކުރިން ވަނީ ބުނެފައެވެ.
މި ދުވަސްވަރު މުޅި ރާއްޖެއަށް ވެސް މޫސުން ގޯހެވެ. ކަނޑާއި ވައި ވެސް ގަދަވާނެ ކަމަށް ލަފާކޮށް، ރާއްޖޭގެ ބޮޑު ބަޔަކަށް ވަނީ ރީނދޫ ސަމާލު ވެސް ނެރެފައެވެ.