މިދިޔަ އަހަރު ޖޫން މަހު ސިނަމާގައި ރިލީޒްކުރި ފިލްމު "ޒަރަ ހަޓްކޭ ޒަރަ ބަޗްކޭ" މި މަހުގެ 17 ވަނަ ދުވަހު ޖިއޯ ސިނަމާއިން ޕްރިމިއާކުރަން ފަށާނެކަން އިއުލާނުކޮށްފިއެވެ.
ވިކީ ކޯޝަލް އަދި ސާރާ އަލީ ޚާން ލީޑް ރޯލް ކުޅެފައިވާ މި ފިލްމަކީ، މަގުބޫލު ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސްގެ އުފެއްދުމެކެވެ. ފިލްމު "މިމީ" އަދި "އިންގްލިޝް ވިންގްލިޝް" ފަދަ ފިލްމުތައް ޑައިރެކްޓް ކޮށްފައިވާ ލަކްސްމަން އުތޭކަރުގެ މި ފިލްމަކީ ހެއްވާ މަޖާ ހާދިސާތައް ހިމެނޭ ލޯބީގެ ފިލްމެކެވެ.
އާއްމުގޮތެއްގައި ފިލްމެއް ސިނަމާގައި ރިލީޒްކުރާތާ ދެތިން މަސް ފަހުން ޑިޖިޓަލް ޕްލެޓްފޯމްގައި ޕްރިމިއާކުރި ނަމަވެސް ދިނޭޝް ވިޖަންގެ މި ފިލްމު ޑިޖިޓަލް ޕްލެޓްފޯމަކަށް ގެންނަން ނިންމާފައިވަނީ ފިލްމު ރިލީޒްކުރިތާ އަހަރެއްވާން ކައިރިވެފައިވަނިކޮށެވެ.
ފިލްމު "ޒަރަ ހަޓްކޭ ޒަރަ ބަޗްކޭ"ގެ މަންޒަރެއް--ފޮޓޯ/އިންޑިއާޓައިމްސް
ފިލްމު "ޒަރަ ހަޓްކޭ ޒަރަ ބަޗްކޭ"އަށް ލިބުނު ރިވިއުސްތަކަށް ބަލާއިރު ސާރާއާއި ވިކީގެ އޮން ސްކްރީން ކެމިސްޓްރީ ބައެއް ބެލުންތެރިންނަށް ވަރަށް ބޮޑަ ކަމުދިޔައެވެ. ފިލްމުގެ މިއުޒިކަށް ވެސް ގިނަ ބައެއްގެ ތަރުހީބު ލިބުނުއިރު މިއީ ސާރާގެ ކެރިއަރުގައި މިހާތަނަށް ރަނގަޅު ހުށަހެޅުމެއް ދައްކުވައިދިން ފިލްމެއްކަމަށް ގިނަ ބަޔަކު ވަނީ ބުނެފައެވެ.
ވަރަށް ކުޑަ ބަޖެޓަކުން އުފެއްދި މި ފިލްމު ބޮކްސް އޮފީހުގެ 100 ކްރޯޑް ކްލަބުން ޖާގަ ހޯދިއިރު ފިލްމު ޖިއޯ ސިނަމާއަށް ދޫކޮށްލުމަކީ މި ފިލްމަށް އިންތިޒާރު ކުރި ގިނަ ބަޔަކަށް ވަރަށް ވެސް އުފާވެރި ޚަބަރެކެވެ.