ޒުވާނުންގެ މެދުގައި މިހާރު އެންމެ މަގުބޫލު އެއް ސޯޝަލް މީޑިއާ ޕްލެޓްފޯމް ސެނެޕްޗެޓަށް މުޅިން އާ ފީޗާތަކެއް ތަޢާރަފްކޮށްފިއެވެ.
ސްނެޕްޗެޓުން އާ ފީޗާތަކެއް ތައާރަފް ކުރަނީ އެ އެޕްލިކޭޝަންގެ ތަޖުރިބާ އިތުރަށް ހަރުދަނާ ކުރުމަށާއި އާޓިފިޝަލް އިންޓެލިޖެންސްގެ ބޭނުން ހިފުމުގެ މަގުސަދުގައެވެ.
މަޑުމަޑުން ރޯލްއައުޓް ކުރަމުން އަންނަ މި އަޕްޑޭޓްތަކުގެ ތެރޭގައި ފޮނުވާ މެސެޖުތައް އެޑިޓްކުރުމާއި، ކޮންމެ އިމޯޖީއަކުން ވެސް ރިއެކްޓް ކުރުމާއި، އޭއައި ޕަވާޑް ރިމައިންޑާސެޓް ކުރުމުގެ އިތުރުން އޭއައި ބޭނުންކޮށްގެން ކަސްޓަމް ބިޓްމޯޖީ އައުޓްފިޓްތައް ޖެނެރޭޓް ކުރުމުގެ ގާބިލުކަން ހިމެނެއެވެ.
ސްނެޕްޗެޓުން ދާދި ފަހުން ކުރި އިއުލާނެއްގައި ބުނެފައި ވަނީ ސްނެޕްޗެޓާސްއިން ކޮންމެ ދުވަހަކު އެވްރެޖްކޮށް ފަސް ބިލިއަނަށް ވުރެ ގިނަ ސްނެޕް އުފައްދަނީ ރައްޓެހިންނާ ވިޝުއަލްކޮށް މުއާމަލާތް ކުރުމަށް ކަމަށެވެ.
މީގެ ތެރެއިން އެންމެ އުންމީދީ އެއް ކަމަކީ އެޑިޓޭބަލް ޗެޓްސްއެވެ. މި ފީޗާއިން މެސެޖްތައް ފޮނުވުމަށްފަހު ފަސް މިނެޓް ތެރޭގައި އެ ޗެޓަށް ބަދަލެއް ގެންނަން ބޭނުންނަމަ އެއްވެސް ދަތިކަމެއް ނެތި އެޑިޓްކޮށްލެވޭނެއެވެ. މި ފީޗާ މަސައްކަތް ކުރާނީ ވަޓްސްއެޕްގެ މެސެޖް އެޑިޓިން ކެޕޭސިޓީއާ އެއްގޮތަށެވެ.
ސްނެޕްޗެޓް ޕްލަސް ޕެއިޑް ސަބްސްކްރައިބަރުންނަށް މި ފީޗާ މިހާރު އެކްސްކްލޫސިވް ނަމަވެސް މުސްތަގުބަލުގައި ހުރިހާ ކަސްޓަމަރުންނަށް މި ފީޗާ ފުޅާކުރެވިގެން ދާނެކަމަށް ރިޕޯޓްތައް ބުނެއެވެ.
ހުރިހާ ސްނެޕްޗެޓާތަކަށް ވެސް ވަރަށް އަވަހަށް އިމޯޖީ ރިއެކްޝަންސް ބޭނުން ކުރެވޭނެ ކަމަށާއި، ހަމައެކަނި ބިޓްމޯޖީ އެވަޓާގެ ބަދަލުގައި ކޮންމެ އިމޯޖީއަކުން ވެސް މެސެޖުތަކަށް ޖަވާބު ދެވޭނެ ކަމަށްވެސް ސްނެޕްޗެޓްގެ އަޕްޑޭޓް ރިޕޯޓްގައި ބުނެފައިވެއެވެ.
އަދި އަލަށް އިތުރުކުރާ އަޕްޑޭޓްގައި ސްނެޕްޗެޓްގެ ލޮކޭޝަން ޝެއާކުރުމުގެ ފީޗާ ހިމެނޭއިރު، ސްނެޕް މެޕް މެދުވެރިކޮށް އިމޯޖީ ބޭނުންކޮށްގެން މެޕްގައި ތިބި ރަހުމަތްތެރިންނަށް ރިއެކްޓް ކުރުމުގެ ފުރުސަތު ފަހިކޮށްދީ، އިންޓަރެކްޓިވް ކަނެކްޝަންތައް އިތުރުކޮށްދޭނެއެވެ.
މީގެ އިތުރުންވެސް އޭއައިގެ ގާބިލްކަން ބޭނުންކޮށްގެން ސްނެޕްޗެޓުން ވަނީ އިނޮވޭޓިވް ދެ ފީޗާއެއް ވެސް ތައާރަފްކޮށްފައެވެ.